Read Poqomchi Amo 3 Bible Online

Amo 3 - Poqomchi bible

Amo 3

¹Hat taq aj Israel chab'iraj taq i ruq'or chawiij i QaJaaw Dios chawunchelaal i xat risaj taq chaloq Egipto je' wili i xuq'or:

²Eh xa re' wo' naq taq i hat xnusik' taq chaawach Chi kixilak i tinamit wach ak'al. Ruum aj re' naa taq kaat nuye'em chutojariik amahk ruum i ma' k'isa yiib' wach na'ojb'al taq i na a'n, inki.

³¿Mi neerub'an chi neenkuhch'ileej kiib' i ki'ib' chi ma' nkaaj ta kiwach?

⁴Eh ¿Mi neeruk'er chii' kaq b'ahlam panch'ahn noq komajaa' i ruchop i rutiib'? Eh ¿Mi neeruk'er chii' i rak'uun kaq b'ahlam parujuul noq komajaa' i ruchop i rutiib'?

⁵Eh ¿Mi neenchoparik jino'q i tz'ikin wach ak'al rupinik i rub'an wila' ma' xkojarik i xirob'? Eh ¿Mi neenq'orik i xirob'aal mi ma' chih i xuchop?

⁶Eh ¿Mi ma' neekiyo'jik re' i tinamit wila' inxuuljik i tuun pan jino'q tinamit? Eh ¿Mi wilik i ti' k'axik neenchalik chinaah i tinamit wila' ma' re' i Dios neen ye'wik reh?

⁷Eh re' i QaJaaw Dios ma' xtaj i ti' k'axik i ruyeew chaloq chi ma' ta nee ruyeew chi naab'jik keh taqe i jalal ruq'oral.

⁸Eh wixq'orik i kaq b'ahlam ¿Mi ma' neekiyo'jik re' tinamit? eh wila' xuq'or i QaJaaw Dios chi naa ruq'orariik rib'iral, ¿Mi neerub'an re' chi ma' nee ta q'orarik rib'iral?

⁹Re' taq i hat je' wili i naa taq aq'orom chupaam taqe paat imb'aan wii' taaq'anik ar Asdod, eh chupaam taqe i paat imb'aan wii' taaq'anik ar Egipto: Chamol taq awiib' chinaah i yuuq' Samaria, nee taq inawilow i tukinik wachiis, taqe i yiib' wach na'ojb'al k'achi' keeb' ar, tiko'q taq keh.

¹⁰Re' QaJaaw Dios je' wili i xuq'or: Re' keh ma' inki a'n taj i korik inkimol wach pankipaat inki a'n wii' i taaq'anik inkiq'uch reh i kas kichaaq' pank'aah, inki.

¹¹Eh je' wili i ruq'or i QaJaaw Dios: Re' taqe i ki-ixowanik taq awach k'ul naa kichaliik naakich'ahaam i paat i nako'leej taq wii' awiib', eh naa kelq'aam i chib'ih taq aweh wilik chupaam taq aapaat.

¹²Re' i QaJaaw Dios je' wili xuq'or: Re' cha'jen tentzun neeruq'uch i rutentzuun panchii' i kaq b'ahlam xa re' la' xa re' wo' ki'ib' chi rooq, i ruqox i xikin neeruq'uch. Je' wo' re' taq hat aj Israel, xakiib' ixib' wo' taq i naa ako'leem awiib' ar Samaria. Yu'naak kosuq taq hi'lik aweh chinaah taqe i holohaq ch'aht ar Damasco, inki.

¹³Re' QaJaaw Dios nim rajaawriik je' wili i xuq'or: Re' taq i hat cha q'or taq rib'iral i ti' k'axik naakik'ulum taqe i riih rumaam i Jacob.

¹⁴Eh re' hin naa nuye'em taqe chutojariik i kimahk i aj Israel ruum i yiib' wach na'ojb'al inki a'n Eh naa nuyojom kiartaal ar Bet-el, eh re' i kuk'aa' i artaal naakiyok'ariik naa kiq'ehb'iik wach ak'al.

¹⁵Eh naa nusacham wach i kipaat kiwihik wii' pan siq'jil, i kipaat kiwihiik wii' pan q'ilej. Eh naa nusacham wach i kipaat marfil korjinaq wii', je' wo' i kipaat inki a'n wii' i taaq'anik, inki i QaJaaw Dios.