Read Poqomchi Amo 6 Bible Online

Amo 6 - Poqomchi bible

Amo 6

¹Re' taqe suq wilkeeb' ar Sión, re' taqe i ch'iklik kik'ux chinaah i yuuq' Samaria q'e' ti' i naakik'ulum. Re' taqe i ki'ib' chi tinamit re' re' q'e' nimaq kiwach chi kixilak i tinamit wilkeeb' ar, eh ar inkisik' rukowiil kik'ux i aj Israel

²Hiy taq ar Calne chawil taq chaloq. Eh kore' taq nee tiooj ar Hamat, nee taq tiqajik qohoq Gat i wilkeeb' wii' i aj filisteo. ¿Mi q'e' taq hat chihooj re' hat chikiwach taqe re'? ¿Mi q'e' chihooj re' taq aatinamiit i hat chikiwach i tinamit re' re'?

³Re' taq i hat ma' nawaaj ta naq chi neemponik i q'iij reh i ti' k'axik, xa re' la' chalik taq chik i rub'an cha naah i ti' k'axik.

⁴Re' taq i hat xasuq taq chik hi'lik aweh chuwach ach'aht marfil korjinaq wii'. Eh i nak'ux taq i rak'uun aatentzuun, i rak'uun aa-wakax q'e' q'ina' inawesaj taq cho pankoraal.

⁵Re' taq i hat inaxulej taq aa-suub' xama' inkan ta wo' chi riij taq i naxulej, eh inayejaa' taq i xa reh reh wach chi q'ooj inawaaj naq taq a'nam aweh i xub'an i reey David.

⁶Re' taq i hat i naawuk'ej i riis uuva panimaq kulk eh re' taqe i q'e' k'ih tz'aaq inkohnik laj iq'oom taq inakoj, ma' xta taq inawaaj reh chi k'ahchi' runeb'a'riik taq aatinamiit

⁷Re' taq i hat peet naa ak'amariik reje pan kowlaj kamanik pan tokoom tinamiit, naa rusahchiik wach taq aninq'iij i na a'n re' inareq naq taq wii' i rusuqkiil ak'ux.

⁸Re' i QaJaaw Dios nim rajaawriik xuq'or i xti korik chi je' wili: Re' hin ma' imponik ta chi nuwach chi nkinimb'isaj kiib' i riih rumaam i Jacob. Eh ma' imponik ta chi nuwach taqe i paat imb'aan wii' i q'ataj q'orik, ruum aj re' naa nuq'asam i kitinamiit pan kiq'ab' i aj ixowaal, je' wo' chu'nchel i wilkeeb' ar, inki.

⁹Je' re' noq atoob' ta nee kikahnik lajeeb'-oq chi winaq, pampaat xanaa wo' rukuxiik kikimiik.

¹⁰Eh noq naa rokiik pampaat jino'q i awach reh i kamnaq chi rehtesjiik i ruti'jolal ree ruk'atariik, je' wili i naa ruq'orom i koq reh pampaat i xkahnik chi k'achlik: ¿Mi ko wilik chik jino'q i xkahnik awuuk' chi k'achlik? inko'q. Ma' awach ta chik ach wo' re' hin, Inko'q chaloq Ma' chih chik aq'or ruum nee-oq inaq'or i b'ih i QaJaaw Dios, inuchjoq.

¹¹Ruum re' i QaJaaw Dios ruq'orom chi naa rusacham kiwach chu'nchel chi je' nimaq paat chi je' kok' paat.

¹²¿Mi nee nkian re' i kawáyu johtik chuwach taqe i saqrehp ab'aj? ¿Mi neemb'aan re' i b'anaj arado nah i palaw? Wila' ma' neemb'aan i je' re' ¿Chib'ih reet noq xasutej taq chi reh kaansanik i holohik laj na'ojb'al? ¿Chib'ih reet noq xasutej taq chi ma' holohik taj i korik?

¹³Re' taq i hat insuuqb'ik taq ak'ux ruuk' i xama' xta ruk'am chaloq, je' taq wili inaq'or: Re' hoj xachiqib'il qiib' xqareq i qajaawriik, tiki taq.

¹⁴Re' i QaJaaw Dios nim rajaawriik je' wilik i xuq'or: Re' taq i hat aj Israel, naa nuk'amam taq cho cha naah jino'q i tinamit chi naa taq rusacham awach, ar naa rutoq'aam reje Hamat pantz'eet reh i rookb'aal q'iij, eh naa ruponiik chi chii' i rooq ha' Arabá pansak'aaj reh i rokb'aal q'iij, inki.