Read Poqomchi Amo 7 Bible Online

Amo 7 - Poqomchi bible

Amo 7

¹Re' Amós je' wilik xuq'or: Re' hin i xuk'uhtaaj weh i QaJaaw Dios panusaq wiriik chi k'ahchi' rutz'uhkrisam i ma' k'isa nimaq chili'l. Reh chi naa kik'uxum i wach chu'nchel i tik, re' i nelik koq'uun, re' noq elinaq chik inye'arik ree i reey.

²Eh noq re' taqe nimaq chili'l xkitz'ap wach i tik, je' wili i xnuq'or reh i QaJaaw Dios: Jaaw cha kuy qamahk i hoj, hoj aj Israel, hoj riih rumaam i Jacob maayeew tii chi qanaah i ti' k'axik re' re' ruum ma' nee ta nqa a'n ruko'ljiik qiib', ruum xama' hoj ta wo' tii k'ih.

³Eh re' i QaJaaw Dios xujal wach i rukapeb'aal, je' wili i xuq'or: Ma' naa ta nuye'em qohoq i ti' k'axik re' re', inki.

⁴Eh re' i QaJaaw Dios xuk'uhtaaj wo' chik weh panusaq wiriik chi xuqasaj chaloq i q'aaq' pan taxaaj yohb'aal wach i qopik i rub'an reh tojb'al kimahk i tinamit. Eh ruum i rutz'a'iil xchiqik chik i palaw, je' wo' taqe i yuuq' k'ixkaab'.

⁵Eh re' i hin je' wili i xnuq'or: Jaaw cha kuy maayeew tii cho chi qanaah i ti' k'axik re' re' i hoj, hoj riih rumaam i Jacob ruum ma' nee ta qako'leej qiib' chuwach, ruum xama' hoj ta wo' tii k'ih, kinki.

⁶Eh re' i QaJaaw Dios xujal wach i rukapeb'aal je' wili xuq'or: Re' hin ma' naa ta nuye'em i ti' k'axik re' re', inki.

⁷Re' i QaJaaw Dios je' wo' chik wili i xuk'uhtaaj weh panusaq wiriik: Re' QaJaaw pa'lik i koq chuwach i tz'aq pab'amaj chi korik ruuk' plomo eh ruyohq'eem wo' chik jinaj i plomo b'amb'al tz'aq.

⁸Eh re' i QaJaaw Dios xupahqaaj b'ila' weh chi je' wili: Amós ¿chib'ih jariik i k'ahchi' awilom wach? inki. Re' hin je' wili xnuq'or reh: Jinaj i plomo b'amb'al tz'aq ayohq'eem, kinki reh. Je' wili i xuq'or weh i reh: Ruuk' aj i plomo wili naa nupajam i nutinamiit Israel, ruum re' hin ma' naa ta chik nukuyum kimahk nik'-oq najtiil, inki.

⁹Re' taqe i ye'aab' kiloq'inik wii' i riih rumaam i Isaac naa rusachariik kiwach, eh re' taqe i paat kiloq'inik wii' i riih rumaam i Israel naakiyojib'iik. Eh naa nusacham wach ruuk' q'aslaj ch'ihch' i Jeroboam, haa' taqe i rak'uun rixq'uun.

¹⁰Re' i Amasías k'amal kib'eeh aj tiij ar Bet-el je' wili i xutaq'aaj ruq'orariik reh i Jeroboam kireey i aj Israel: Re' Amós i ruyeq' panak'al awajaawriik, ma' k'isiin i ruq'or keh i tinamit chawiij. Re' taqe i tinamit ma' nkikuy ta chik i ruq'or.

¹¹Ruum re' reh je' wili i ruq'or: Re' i Jeroboam naa rukanteesjiik ruuk' q'aslaj ch'ihch', eh chu'nchel i tinamit Israel naa kik'amariik reje pankowlaj kamanik pan tokoom tinamit, inki.

¹²Eh re' Amasías je' wili i xuq'or reh i Amós: Re' hat inaq'or chi wilik ink'uhtjik aweh, eleen reje ayu' reh chi ma' nee ta tikimik hiy ar Judá ar neena a'n awa' ahaa', eh neenaq'or i ruq'oral i Dios.

¹³Ayu' Bet-el matchalik chik chuq'orariik i ruq'oral i Dios, ruum re' i ye'aab' wili re' inloq'inik wii' i reey, eh re' i wilik wii' i ru nimlaj paat, inki.

¹⁴Eh re' Amós je' wili i xuq'or reh Amasías: Re' hin ma' hin ta jalal ruq'oral i Dios, ma' re' ta wo' re' nukamaj. Xa ruuk' la' tii nuk'isatz'aaq inkiyeew chi riij i cha'jinik tentzun inwik'saj wii' i q'iij, eh xa ruuk' i sik'ij higo i nub'an pantaq ch'ahn.

¹⁵Xa re' la' re' i QaJaaw Dios x-esanik cho weh chi cha'jinik tentzun je' wili i xuq'or weh: Yu'naak hiy cha q'or keh i nutinamiit Israel chi ma' holohik ta kib'anik, inki.

¹⁶Eh re' hat inab'iraj i ruq'oral i QaJaaw Dios, inaq'or chi ma' naa ta nuq'orom keh i aj Israel chib'ih naa rub'anam i Dios kuuk'. Eh ma' nawaaj taj chi wilik i naa nuq'orom chikiij i riih rumaam i Isaac, inki.

¹⁷Ruum aj re' je' wili i xuq'or i QaJaaw Dios chawiij: Re' awehk'een naa rub'anam i k'oyomal pan tinamit, eh re' taqe awak'uun awixq'uun naa kikanteesjiik ruuk' q'aslaj ch'ihch', re' awak'aal naa ruch'aqib'iik keh i tokoom. Eh re' hat ar naa akimiik chi kixilak i ch'uwa' kiwach, re' taqe i aj Israel naa kik'amariik reje pan tokoom tinamit, inki.