Read Poqomchi Amo 8 Bible Online

Amo 8 - Poqomchi bible

Amo 8

¹Eh re' i QaJaaw Dios jinaj chik chakach i wach i tik mu'uun xiik' naah q'aniil xuk'uhtaaj weh panusaq wiriik.

²Eh re' Dios xupahqaaj weh chi je' wili: Amós ¿chib'ih jariik i k'ahchi' awilom wach? inki. Re' hin jinaj chakach i wach i tik mu'uun xiik' naah q'aniil k'ahchi' wilom wach, kinki reh. Re' taqe aj Israel je' kiq'aniil taqe i wach i tik re' re', xa ilook' chik i nuyeew taqe chutojariik i kimahk, inki.

³Eh re' taqe i tz'uuy imb'aan chupaam i paat imb'aan wii' i q'ataj q'orik naa rusutiniik chi oq'ik. Eh ma' k'isiin taqe i naa kikanteesjiik ar, re' i kiti'jolal naa rukutariik cho rij paat chi ma' eht'alimaj, inki.

⁴Chab'iraj taq i naa nuq'orom i hat i ti minwik taq keh panti' k'axik i xama' nimaq ta kiwach, eh inaq'uch taq i chib'ih keh i neb'aa'.

⁵Re' taq i hat je' taq wili inaq'or: ¿Kojaruuj chik i ninq'iij reh i ak' poh? ¿Kojaruuj chik i ninq'iij reh i hi'limb'al q'iij reh chi neenqak'ayej i qatrigo taqe naq'wach i qatik chi k'ih neen qayeew wii' nee nqak'isiimb'isaj i qapajb'aal, eh ma' manlik taj i qapexu neenqa a'n?

⁶Eh naa qakanaam chi ma' xta chik chib'ih keh i neb'aa', korehtaal inkik'ayej kiib' quuk' tojb'al reh i kik'aas atoob' ta xa junk'uhl chi xijab' i kik'aas. Eh k'ih naa qak'ayem wii' keh i ruyib'kiil wach i trigo, tiki taq.

⁷Re' QaJaaw Dios ruq'orom i xti korik, je' wili i xuq'or: Re' hin ma' jaruuj naa rusahchiik panuk'ux chi xkinimb'isaj kiwach i riih rumaam i Jacob, je' wo' hoq i xkian, inki.

⁸¿Mi ma' k'uyu'jik re' i wach ak'al ruum i xkian re' re'? ¿Mi ma' nee kioq'ik re' i tinamit ruuk' i ti' k'axik naakik'ulum? Eh chu'nchel i wach ak'al naa ruqajiik naa rujohtiik je' rukab' i rub'an i rub'ohl i nim ha' Nilo wilik ar Egipto.

⁹Re' QaJaaw Dios je' wili i xuq'or: Chupaam taqe i q'iij re' re' naa nuq'equm b'risam wach i q'iij manlik kab'lajora, eh manlik parusaqumaal wach i q'iij naa ruq'equumriik chu'nchel i wach ak'al.

¹⁰Re' taq aa-ninq'iij naa nusutem chi ruti'kiil k'uxliis, re' aa-tz'uuy naa nusutem chi oq'ik, je' rukab' noq inooq'jik i kamnaq. Eh naa taq akojom aq'eq' so', eh chi naa taq ajoyom i rismaal aanaah, naa taq awoq'iim, je' rukab' noq inoq'ik ixoq xkimik i rak'uun xa jinaj chuwach. Chu'nchel naa rusutiniik chi ruti'kiil k'uxliis, inki.

¹¹Re' i QaJaaw Dios je' wili i xuq'or: K'ulik iloq reh i q'iij chi re' hin naa nutaq'aam i wi'jaleel chinaah chu'nchel i tinamiit wach ak'al. Xa re' la' ma' re' ta wi'jaleel reh wi'k ha', wi'jaleel la' reh i rib'irjiik i nuq'oral.

¹²Re' keh xak'ul chik naa kojiik pansak'aaj reh i rookb'aal q'iij, eh pareelb'aal i q'iij, nah taq palaw chi rusik'ariik i nuq'oral naa naq chik kaajwaam rib'irjiik xa re' la' xama' naa ta wo' chik kireqem.

¹³Re' taqe i holohaq xq'un, taqe i kowlaj k'ijool naakiq'ehb'iik wach ak'al ruum i ruchiqkaal kichii' reh i rib'irjiik i nuq'oral.

¹⁴Eh re' taqe i kiq'orik i korik parub'ihnaal i tiyoox wilik Samaria. Re' taqe i kiq'orik parub'ihnaal i tiyoox wilik Dan, taqe i kiq'orik pankib'ihnaal i kitiyoox i aj Beerseba, naa rusachariik kiwach, inki.