Read Poqomchi Jon 1 Bible Online

Jon 1 - Poqomchi bible

Jon 1

¹Re' i QaJaaw Dios je' wili i xuq'or reh i Jonás rak'uun i Amitai:

²Yu'naak hiy pan nimlaj tinamit Nínive, cha q'or rib'iral keh chi naanusacham kiwach. Ruum re' hin xinq'uhtik chik reh i kiyiib' wach na'ojb'al inki a'n inki.

³Xanaah re' i Jonás ma' xunimaj taj ixq'orarik reh ruum i QaJaaw Dios, xumol la' chi elik xooj kochichii' i palaw wilik ar Jope, re' i kik'ulik sutinoq wii' i barko. Eh ar xureq jinaj i barko ojik i rub'an pan tinamit Tarsis, xutoj roojb'aal, xjohtik reje chupaam, reh chi xooj naq ar.

⁴Eh re' i QaJaaw Dios xutaq'aaj chaloq jinaj i kowlaj teew chinaah i palaw, ruch'ihil i runimaal kaq suut teew jab', je' chi xanaa chik ruxereb'eem i barko noq xk'utinik.

⁵Re' taqe i kib'esanik reh i barko ma' k'isiin ta xchalik kiyo'jiik, eh chi kiju'junaal xkipahqaaj chi naa kitoob'jiik ruum i ki dios. Eh xkikutib'eej pan palaw i ihq, re' naq inkaaj chi kow naa rojiik i barko. Eh re' Jonás ar chupaam i molarik wii' i ihq pan barko, choparik ruum jinaj i runimaal wirik.

⁶Eh re' ink'amwik kib'eeh i kikamanik pan barko je' wili i xuq'or reh i Jonás: Raaj i hat qaman wiraal ¿Chihreet i wirik i na a'n? Wukteen cha q'oreej aaDios nee oon naq inche qoh ruko'leej chupaam i yohb'aal wilkooj wii'.

⁷Eh re' taqe i kikamanik pan barko je' wili i xkiq'or chikiwach: Yu'naak qaq'ijej taq riij reh chi neenqanab'eej awach i wilik ru mahk chi k'ahchi' qak'ulum i ti' k'axik wili, inki taqe. Noq xkiq'ijej riij xkireq chiriij chi re' Jonás wilik ru mahk.

⁸Eh je' wili i xkiq'or reh i Jonás: Chaq'or qeh ¿Chib'ih reet noq xchalik chi qanaah i runimaal ti' k'axik wili? ¿Chib'ih rijariik ab'eeh noq xat chalik ayu' aha' ti chalik aha' aatinamiit? ¿awach ak'un aweh? inki taqe reh.

⁹Re' Jonás je' wili i xuq'or: Re' hin, hin aj hebreo re' k'achlik Dios wilik cho pan taxaaj i nuloq'ej. Re' ixyej-anik reh i palaw wili, ruch'ihil i wach ak'al, inki.

¹⁰Eh xuq'or keh i kikamanik pan barko chi elik i rub'an chuwach i Dios. Re' taqe i winaq re' re' xchalik kiyo'jiik, eh xkipahqaaj reh chi je' wili: ¿Chib'ih reet noq xat elik chuwach aaDios? inki taqe.

¹¹Eh noq xkilow chi ma' k'isiin chik i wuktik i rub'an i rub'ohl i palaw, je' wili i xkiq'or reh i Jonás: ¿Chib'ih i naaqanam awuuk' reh chi neenqajik wach i rujosq'iil i palaw? inki taqe.

¹²Re' Jonás je' wili i xuq'or: Cinakut taq pan palaw, chi je' re' neerumay i rujosq'iil. Re' hin weht'al chi korik chi wuum i hin xchalik i runimaal kaq suut teew jab' taq cha naah, inki.

¹³Eh re' taqe i kib'esanik reh i barko xkesaj wo' naq i kaansil chi rusuutjiik reje i barko chichii' i chiq yuuq', xa re' la' ma' xkian ta rub'aan ruum re' palaw qopik chik wach i rub'an i rujosq'iil, xanponik chik taxaaj i rub'ohl.

¹⁴Noq xkilow chi je' re', je' wili i xkiq'or reh QaJaaw Dios pan kitiij: Chakuy maa qohayeew chi kimik xa ruum i ru mahk i winaq wili. Eh wila' ma' chih ru mahk chawach maakoj pan qanaah i rukimiik. Ruum re' hat QaJaaw Dios xa a'n quuk' aha' wilik inawaaj, inki taqe.

¹⁵Eh xkichop chaloq Jonás xkikut qohoq ko paruchamiil i palaw, eh xanoq wo' xumay i wuktik i rub'ohl.

¹⁶Re' taqe i kib'esanik reh i barko xi yo'jik ruum i re' chu'nchel kik'ux xkiloq'ej i QaJaaw Dios. Eh xkik'at kimayiij chuwach, xkiq'or reh chi ma' naa ta chik kikanaam runimjiik.

¹⁷Eh re' i QaJaaw Dios ruyejaam cho wach jinaj i qamaam kar reh chi xb'iq'arik i Jonás, eh ixib' q'iij ixib' aq'ab' xub'an chupaam i kar.