Read Poqomchi Jon 4 Bible Online

Jon 4 - Poqomchi bible

Jon 4

¹Eh re' Jonás ma' xponik ta chuwach chi re' Dios ma' xukansaj taqe i aj Nínive, xchalik ruk'aah.

²Eh xub'an rutiij chuwach i Dios, je' wili i xuq'or: QaJaaw Dios ¿Mi ma' re' re' wili xnukapaaj noq kowilkiin cho panutinamiit? Noq xnumol chi elik xinooj naq Tarsis, re' hin wehta'al chi re' hat, hat jinaj Dios q'e' hat atoob', aj keteloom wachiis. Eh ma' jumehq'iil tanchalik aajosq'iil, ruum aj re' noq inaq'or chi naa asacham kiwach i tinamit, ma' na a'n ta wo' chik.

³Ruum aj re' Jaaw, re' hin i nupahqaaj otob'il aweh chi chawesaj inuk'achariik, ruum ma' xta reet chinee kinkimik chuwach chi hin k'achalkiin, inki.

⁴Eh re' QaJaaw Dios je' wilik i xuq'or reh i Jonás: ¿Mi ma' xta reet cha weh chi ma' k'isiin ta xchalik ak'aah? inki.

⁵Re' Jonás xelik chaloq pan tinamit Nínive xooj reje chi korkiil ireelb'aal q'iij, ar xuye'jaa' jinaj i k'isa rumuuj, eh xutzunaa' riib' chi ri'sil, ar xtohq'ik ruy-eem chib'ih i naaruk'ulum i tinamit Nínive.

⁶Eh re' i QaJaaw Dios xuyeew q'ab' chi xk'ihik jinaj i rax k'ahaam chinaah i Jonás reh chi xkahnik chi rumuuj taqe xaq, reh chi xsuuqb'ik ruk'ux. Re' Jonás ma' k'isiin ta xsuuqb'ik ruk'ux chiriij taqe xaq i juniwal chi k'ahaam re' re'.

⁷Eh xa chi junwar xuyeew q'ab' i QaJaaw Dios chi xk'uxarik ruum i haah i raa' i raxk'ahaam re' re', eh xanoq wo' chiqik.

⁸Noq xelik chaloq i q'iij re' i QaJaaw Dios jinaj i tz'a' laj teew xutaq'aaj chaloq parelb'aal q'iij, eh re' Jonás xk'atarik paam i naah ruum i rutz'a'iil i q'iij, eh xchalik ruq'uhtiik. Ruum i re' xupahqaaj rukimiik, je' wili i xuq'or: Re' hin ma' xta reet chinee kinkimik chuwach chi hin k'achalkiin, inki.

⁹Eh re' i QaJaaw Dios je' wili i xuq'or reh i Jonás: ¿Chib'ih reet noq ma' k'isiin ta xchalik ak'aah xa ruum chi xchiqik i rax k'ahaam re' re'? inki. Hoo' re' hin ma' naa ta rik'iik i nuk'aah korehtaal i nukimiik, inki.

¹⁰Eh je' wili i xq'orarik reh ruum i QaJaaw Dios: Jonás chakoj rehtaal chi ma' re' tee hat xatikwik, xatk'isanik reh i rax k'ahaam re' re', eh xa ruuk' i jinaj aq'ab' xk'i'hik, xa parukab' aq'ab' wo' chik xchiqik, re' hat q'e' xaketelaaj wach.

¹¹Ra'j naa chik re' hin ma' neenuketelaaj wach i nimlaj tinamit Nínive, re' i wilkeeb' wii' i jinaj siento miil ruuk' juninaq miil chi tinamit re' i ma' inkikoj ta rehtaal i holohik, i ma' holohik taj, eh re' wo' i wilkeeb' wii' i ma' k'isa chikop, inki reh.