Read Poqomchi Miq 3 Bible Online

Miq 3 - Poqomchi bible

Miq 3

¹Re' i Miqueas je' wili i xuq'or: Re' taq i hat i ti k'amwik kib'eeh i aj Israel, chab'iraj taq i naa nuq'orom aweh ¿Mi ma' ruk'ul naq taq cha weh re' chi re' chik nee taq i na a'n i rub'ehel?

²Eh re' taq i hat inawixowaaj taq wach i holohik, re' i yiib' wach taq inak'ax wach. Je' nanaach'ol taq i rutz'uhmal i kiij i nutinamiit, eh je' inakanaa' taq wach saqum i kib'aqil ruum i ti' k'axik taq i na a'n keh.

³Eh je' nanaak'ux taq chi k'achlik kiwach i nutinamiit, je' nanaach'ol taq i kitz'uhmal, je' nanaapaxej taq i kib'aqil. Eh i na a'n taq keh je' rukab' i na a'n taq reh i tiwik inchaq'teesjik pan xun.

⁴Eh pan jinaj ponoq q'iij nanaq chik aq'oreem taq i QaJaaw Dios, re' reh ma' naa ta taq chik kaat rib'iram. Ma' naa ta chik ruk'uhtaam i rotob'il taq cha naah, ruum xiik' naah yib'kiil wach taq amahk.

⁵Re' QaJaaw Dios je' wili i ruq'or: Re' ink'amwik keh pamahk i nutinamiit re' i jalal nuq'oral inki a'n kiib'. Re' keh inkiq'or rib'iral i rusuqkiil k'uxliis reh inye'wik kiwa', eh re' ma' ye'wik ta kiwa' inkiq'or reh chi naa ruchaliik i q'aq'inik chikinaah.

⁶Re' taq i hat ma' xta chik i naa nuk'uhtaam taq aweh panasaq wiriik, chi riij taqe i naa ruk'ulariik. Eh ma' xta chik taq i naa awilom, naa ruq'equumriik paam taq aana'ojb'al, je' rukab' noq inq'equumbrik i q'iij, inki.

⁷Eh re' naq taqe i aj q'iij, taqe jalal nuq'oral inki a'n kiib' naakik'uhtaam kik'ixb'ilaal, xama' xta chik i naa kiq'orom, noq naakilom chi ma' naa ta chik kichaq'weesjiik ruum i Dios.

⁸Eh re' hin, hin nujinaq ruuk' i ruxlab'al i QaJaaw Dios, i ruyeew nukowiil, i ruk'uhtaaj weh i korik, reh chi neenuq'or keh panaq' kiwach i aj Israel re' taqe i riih rumaam i Jacob chi korik chi ma' nkinimaj ta chik i QaJaaw Dios, chi ma' k'isiin i mahk inki a'n.

⁹Chab'iraj i naa nuq'orom taq i hat k'amal kib'eeh i aj Israel, je' wo' taq i hat i nimaq taq wach ana'ojb'al. Re' taq i hat ma' holohik ta taq inawilow taqe i holohik, re' i holohik re' taq i re' i naasutej chi ma' holohik taj.

¹⁰Inayeew taq runimaal wach i Sión ruuk' ikaansanik taq i na a'n. Eh re' i Jerusaleem ruuk' taqe i yiib' wach na'ojb'al taq i nayeew runimaal wach.

¹¹Eh re' taqe i q'atal q'orik inkik'ul i tumiin chi riij i chukuj q'orik. Re' taqe i k'amal kib'eeh aj tiij koruuk' tumiin inki a'n i k'uhb'alinik. Eh re' taqe i jalal ruq'oral i Dios inki a'n kiib' koruuk' tumiin inkiq'or i k'uhb'aal, eh inkiq'or chi reh i Dios inki a'n je' wili inkiq'or: Re' i QaJaaw Dios wilik quuk' ma' xtaj i yiib' wach neenchalik chi qanaah, inki taqe.

¹²Eh awuum taq i hat i Jerusaleem, i tinamit wilik chinaah i yuuq' Sión naa rukahniik chi ma' xta chik i wilik chupaam xa je' chik jino'q ab'iixb'al, naakich'alojiik i wilkeeb' chupaam. Eh re' yuuq' wilik wii' i rupaat i QaJaaw Dios naa rupoq'iik chaloq i yiib' kiwach ch'ahn chinaah.