Read Poqomchi Miq 6 Bible Online

Miq 6 - Poqomchi bible

Miq 6

¹Eh re' taq i hat aj Israel chab'iraj taq i ruq'or i QaJaaw Dios chi je' wili: chayuq'eej taq awuuk' taqe i yuuq', cha q'or taq chi korik chi wilik taq amahk, ponoq chinaah taqe yuuq' taq aq'oral.

²Chab'iraj taq i hat yuuq' k'ixkaab' chi re' i hin Dios k'ahchi' nujosq'iil kuuk' i nutinamiit Israel naa nuq'atam q'orik chikinaah ruum i kimahk inki.

³Eh je' wo' chik wili i xuq'or i QaJaaw Dios: hat taq nutinamiit ¿Chib'ih i ma' holohik taj xub'an taq aweh, eh chib'ih taq xat nuch'itaaj wii'? Inwaaj taq chi neenaq'or weh.

⁴Re' hin ma' xta xinq'ehb'ik taq wii' chawach, re' hin xineesanik taq cha weh panti' k'axik Egipto. Re' noq xnutaq'aaj taq reje chawehteesjiik i Moisés i Aarón, i María, reh chi xkik'am taq cha b'eeh.

⁵Re' taq i hat nutinamiit k'oloq taq panak'ux chib'ih xat rutaqchi'ij taq cho wii' i Balac, kireey i aj Moab. Eh chib'ih xat ruchaq'weej wii' i Balaam rak'uun i Beor, eh chib'ih taq i xak'ul noq xat ik'ik taq ar Sitim, eh Gilgal. Re' hin xintoob'inik taq aweh, ruum aj re' ma' xta taq xak'ul, inki Dios.

⁶¿Chib'ih jariik i ruk'ul chi naaqaye'em reh i QaJaaw Dios, nik' wach rulooq'jiik naa qa'nam? ¿Mi re' chi neenuyeew i k'atoj mayiij chuwach, oon re' chi nee nuk'am reje chi numayiij i peet rak'uun i nuwakax jinaj haab' i wilik reh?

⁷¿Mi neensuuqb'ik ruk'ux re' i QaJaaw noq neenuyeew chi numayiij i ruk'ihaal q'ina' laj imas tentzun? Eh ¿Mi neensuuqb'ik ruk'ux re' chi neenuyeew chi numayiij chuwach i xata wo' jarub' lemeta chi aseite? ¿Mi neerukuy re' i numahk chi neenuyeew chi numayiij chuwach i peet wak'uun?

⁸Re' i QaJaaw Dios ma' re' ta taqe re' iraaj, re' i rupahqaaj aweh i QaJaaw Dios i hat re' taqe i wili: Re' chi naa a'nam taqe i ruk'ul chi b'anarik, eh chi naa ruwihiik i ketelinik wachiis awuuk', re' chi naa aloch'om awiib' chi runimjiik aaDios.

⁹Re' i QaJaaw Dios k'achi' taq kaat ruq'oreem panatinamiit, wilik runa'ojb'al awach inyohlinik reh aab'ihnaal. Eh chakoj taq rehtaal awach inaakiye'ariik chutojariik i kimahk, eh awach naa ruye'wiik keh chutojariik i kimahk.

¹⁰Re' i yiib' wach runa'ojb'al ma' k'isiin i rub'ehomal wilik xa ruuk' i leq' rureqem tz'aaq, eh re' i rupexu ma' manlik ta impajwik, re' taqe re' ma' imponik ta chi nuwach i hin.

¹¹Eh ¿Nik' wach noq neenukuy ru mahk inelq'anik ruuk' i rupexu i rukoj chi pajb'al, eh ma' manlik ta impajwik?

¹²Re' taqe i b'ehomaq wilkeeb' chupaam i tinamit wili inkelq'aaj chib'ih reh i neb'aa', eh xa re' i chukuj q'orik inkaaj, xa re' i rujot'ariik i kitinamiit inki a'n

¹³Re' hin naa taq kaat nuye'em chutojariik taq amahk, eh naa taq nusacham awach ruum taq amahk i na a'n.

¹⁴Naa wo' naq taq a'nam awa' ahaa' xama' naa ta wo' taq anujiik, xama' naa ta wo' taq amayam i kuyuj wi'k. Eh naa wo' naq taq amolom chib'ih aweh xama' naa ta wo' taq akolom riij, eh wila' xakol taq riij, aj q'aq'ineel naa kisachwik wach.

¹⁵Eh naa wo' naq taq atikim chib'ih aweh xama' naa ta wo' kiwachiniik, naa wo' naq taq ake'em wach i aseituna xama' xta wo' taq aseite naa awisam. Eh naa wo' naq taq ayeq'em paam i uuva xama' xta wo' taq i riis naa awuk'em.

¹⁶Ruum xak'am taq naah i ruk'uhb'aal, eh aha' wilik i rub'an i reey Omri rub'ihnaal, je' wo' hoq i rub'an i reey Acab, xa a'n taq aweh inki a'n i keh. Re' hin naa nub'anam ti' k'axik taq aweh, naa taq ak'uhtaam ak'ixb'ilaal taq i hat i aj Jerusaleem, ruum ma' xinanimaj ta taq, inki i Dios.