Read Poqomchi Nah 1 Bible Online

Nah 1 - Poqomchi bible

Nah 1

¹Chupaam i huuj wili xutz'ihb'aaj i Nahúm aj Elcos chib'ih i xk'uhtjik reh parusaq wiriik, ruum i Dios. Re' noq xq'orarik reh chib'ih i ti' k'axik naakik'ulum i aj Nínive.

²Re' i QaJaaw Dios iraaj chi xa re' reh naa runimjiik, i ruq'aj wach keh i xa re' i yiib' wach na'ojb'al inki a'n Eh i ruyeew i rujosq'iil chikinaah awach i ki-ixowanik wach.

³Re' i QaJaaw Dios ma' jumehq'iil ta inchalik rujosq'iil, xa re' la' wilik rajaawriik. Eh ruyeew taqe chutojariik i kimahk i aj mahk, eh imb'ehik chinaah taqe i kaq suut teew, je' wo' chinaah taqe i suutz'.

⁴Re' reh i ruq'il i palaw, i ruchiqsaj, eh i ruchiqsaj chu'nchel i nim ha'. Eh rukansaj i ch'ahn ar Basán, je' wo' tik wilik chuwach i yuuq' Carmelo. Eh ruchiqsaj taqe i uhtz'ub' ar Líbano.

⁵Eh chuwach i Dios xa kib'arb'otiik chik ruum kiyo'jiik taqe najt kinaah yuuq', taqe i rub'ohl yuuq'. Eh kik'uyu'jik i wach ak'al ruum, eh kib'oqibik, je' wo' chu'nchel i wilkeeb' chupaam.

⁶Eh ¿awach neenkuywik reh i rujosq'iil i Dios? ¿Awach i neeruko'leej riib' chuwach? ruum re' reh je' rukab' i q'aaq' noq ruyeew i rujosq'iil, eh kipaxik taqe ab'aj chuwach.

⁷Re' i QaJaaw Dios xiik' naah rotob'il, ruum i ruyeew rukowiil kik'ux taqe i ti' wilkeeb', eh i ruko'leej taqe i awach i kiye'em kik'ux ruuk'.

⁸Eh noq naa taqe ruye'em panti' k'axik i ma' kinimanik ta reh je' naa narumuq'aam kinaah ruuk' ha'. Eh je' naa pa runimaal q'equm naa kikahniik taqe i ki-ixowanik awach.

⁹Eh raaj taq i hat aj Nínive ¿Chib'ih reet noq inakapaaj taq i ma' holohik taj chi riij i QaJaaw Dios? Re' reh naa rusacham taq awach, xa ruuk' i junriim, ma' kota naa ruk'ihpechem.

¹⁰Re' taq i hat je' taq akab' i k'iix wilkeeb' pantaq ab'iix, ruuk' taq i na a'n, eh je' wo' taq akab' taqe i xohk'reel, ruum taq i na a'n re' re', naa taq ak'atariik je' rukab' noq ink'ahtik i chiq sohk'.

¹¹Eh chaxilak taq i hat wilik inyej-anik wach i yiib' wach na'ojb'al chi riij i QaJaaw Dios, re' jinaj chi aj taq chi' yiib' wach i runa'ojb'al.

¹²Re' i QaJaaw Dios je' wili i xuq'or keh i aj Israel: Atoob' ta xiik' naah kik'ihaal i aj Asiria nee kichalik taq cha naah, re' hin naa nusacham kiwach. Re' hin xatnuyeew taq panti' k'axik, xa re' la' ma' naa ta chik taq kaat nuye'em panti' k'axik.

¹³Re' hin naa wesam taq cha naah i ahl laj ihq, eh naa nuchejem taq awach ruum b'ak'ooj taq awach ruuk' taq i na a'n, inki.

¹⁴Eh re' i hat kireey i aj Nínive, i ruq'or Dios chi ma' jino'q aawiih aamaam naa rokiik chi reyil chajilow. Eh naa nusacham kiwach pankipaat taq i aatiyoox haab'imaj chee' taqe korjinaq wii', eh ar naa aamuhqiik i hat ruum ayiib' wach aana'ojb'al, inki.

¹⁵Chab'iraj taq, xk'uloq chik chinaah taqe yuuq' i k'ahchi' cho chuq'orariik rib'iral i suq rib'irjiik re' inq'orik rib'iral i suq kiil k'uxliis. Re' taq i hat aj Judá, xponik chik i q'iij chi naa taq a'nam aninq'iij. Eh ma' jaruuj chik q'iij naa kichopom taq anaah i yiib' wach kina'ojb'al, ruum re' keh xsacharik chik kiwach.