Read Poqomchi Nah 2 Bible Online

Nah 2 - Poqomchi bible

Nah 2

¹Re' taq i hat aj Nínive k'ulik chik i rub'an iloq cha naah i sachal taq awach, chakoj taq i aj q'atool chupaam taq ab'eeh. Chab'ak' taq nah atuuq i q'aslaj ch'ihch', cha yejaa' taq awiib' reh i q'aq'inik.

²Re' i QaJaaw Dios naa wo' chik ruye'em kiloq'il i aj Israel, re' taqe i riih rumaam i Jacob. Eh naa wo' chik kehchaam i xq'ucharik keh, naa wo' chik rukanaam taqe chi je' rukab' i pampeet, naa wo' chik ruwachiniik i kitik.

³Re' taqe i soldado okik keh chi q'aq'inik taq cha naah, xa kaq chik i kipulato ch'ihch', je' wo' kiso', xa kiyejaam chik kiib' reh i q'aq'inik. Eh re' i kikawayu xankaaj chik ojik chi q'aq'inik, re' taqe i kikareta xa nqop chik ruq'aq'al, reh ojik chi q'aq'inik.

⁴Re' taqe i kikareta xak'ul chik kiooj pantaq b'eeh, xa teheeh chik kiwach, xak'ul chik kiooj pantaq k'aayb'al, xa je' chik kikab' i saqumb'al qoplik ruq'aq'al, eh xa je' chik rukab' i ruch'aab' i kahoq inki a'n

⁵Eh re' reey ar Nínive, xuyuq'eej taqe i ru soldado xak'ul chik inkiq'oj kiib' ruum rutehkiil kiwach, eh re' taqe aj ixowaal ruuk' i qamaam chee' ch'ihch' ju' xkik'er i koq i ru puertahiil i tz'aq.

⁶Eh kitehiwanik i koq taqe i puerta wilkeeb' chi' ha'. Eh re' paat wilik wii' i reey ch'alojik wach ak'al.

⁷Eh re' i rehk'een i reey, eh taqe ixoq kikamanik ruuk' xichoparik kuum i aj ixowaal, xasuq chik kioq'ik, xa je' chik kioq'ik paloma, xankituy chik i koq i chi' kik'ux.

⁸Re' i tinamit Nínive je' rukab' noq i nelik chee ha' noq inhop chaloq i molb'al reh, Atoob' ta naq q'oraroq keh chi tipaa' taq ti sutinoq taq kiuchjoq, xama' jino'q wo' chik keh i naa rusutiniik.

⁹Eh naa wo' rukuxiik kelq'aam i plata, i oro. Re' taqe i aj Nínive xti yohb'aal wach kib'ehomal, xa k'axb'al chik wach.

¹⁰Xa re' la' naa kikahniik chi ma' xta chik wilik keh, xan tz'irik chik kiwach. Eh xanaa chik kib'arb'otik ruum kiyo'jiik, xanaa chik rukarkotiik i pankaa'. Eh xama' xta chik kikowiil, xasaq moq'ik chik naakiponiik.

¹¹Eh ¿Chib'ih jariik i xkik'ul i aj Nínive? Re' i je' naq kikowiil i kaq b'ahlam, je' naq kikab' ixoq kaq b'ahlam, i kiye'aab' i kok' rak'uun b'ahlam ma' xta naq inkiyohleej wach, eh ma' awach ta naq inyohb'isanik keh.

¹²Re' taqe i aj Nínive q'e' naq kow inki a'n kiib', xa awach naq inkikansaj, je' rukab' i rub'an i kaq b'ahlam, ruuk' josq'iil i ruchop i rutiib', i ruyeew reh ixoq kaq b'ahlam, je' wo' keh i kok' rak'uun, i runujisaj chi chikop taqe i ruye'aab'.

¹³Re' i QaJaaw Dios nim rajaawriik je' wili xuq'or: Re' hin ma' nuk'ax ta wach i inki a'n i aj Nínive, naa nuk'atam i kikareta naa reliik rusib'eel. Eh naa nusacham kiwach i kow kiib'. Eh naa nusacham kiwach i kielq'anik taq chib'ih aweh. Naa rukahniik chi ma' xta chik taq awaj taqareel, inki.