Read Poqomchi Hab 3 Bible Online

Hab 3 - Poqomchi bible

Hab 3

¹Re' wili i rutiij xub'an i Habacuc jalal ruq'oral i Dios:

²QaJaaw Dios noq xb'iraj rib'iral nik' nimaal taqe i a'nam chaloq xanoq wo' xnuyohleej awach. Re' hin i nupahqaaj otob'il aweh chi cha a'n tii quuk' i hoj yu'naak taqe i a'nam chaloq re' re'. Chaketelaaj tii qawach atoob' ta k'achi' aajosq'iil chi qanaah.

³Re' hin xwilow panusaq wiriik chi chalik i rub'an i QaJaaw Dios wilik ruSantohiil chupaam i ye'aab' Temán, chalik i rub'an chinaah i yuuq', Parán. Eh re' i ruloq'il xk'utinik pan taxaaj, je' wo' chinaah i wach ak'al.

⁴Eh sutimaj riij chi saqum, xa wilik chik i ruch'aab' i saqum i nelik chaloq chupaam kab'chel i q'ab'. Re' taqe re' ink'uhtanik reh chi wilik rajaawriik.

⁵Xa re' la' noq komajaa' ink'uloq i QaJaaw peet xik'ik i runimaal yab'ilaal. Eh noq ik'inaq chik i QaJaaw Dios jinaj chik inchel i runimaal kaq tz'a' xik'ik.

⁶Eh re' i QaJaaw Dios i rupab'aa' riib' chi rilariik reje i wach ak'al, re' i nimaq tinamit, inchalik kib'arb'otiik chuwach. Re' taqe i rax chee' kitoqib'ik chuwach. Eh re' taqe i yuuq', jumehq'iil i rusach kiwach. Raaj i ruk'uhb'aal i Dios reh xa wilik wo' chi juneliik.

⁷Re' hin xwilow noq xkik'ul i ti' k'axik taqe i wilkeeb' ar Cusan. Eh xwilow noq xakib'arb'otik chik ruum kiyo'jiik taqe i aj Madián.

⁸QaJaaw Dios ¿Mi k'ahchi' re' aajosq'iil chinaah taqe i nim ha'? ¿Mi k'ahchi' re' aajosq'iil chinaah taqe i palaw noq xapab'aa'? Re' hat xa a'n taqe i re', reh chi xi ik'ik aatinamiit panha' chiriij i kikawayu, chupaam i kikareta, reh chi ma' xta xi uchjik.

⁹Re' hat je' naa ruuk' flecha xako'leej taqe. Eh aq'orom wo' chaloq i korik chi naa ako'leem aatinamiit xako'leej wo' taqe, xa teh wo' kiik'b'aal panyejaal taqe i nim ha'.

¹⁰Eh kiyo'jik chawach taqe i yuuq', re' hat ti ye'wik chaloq i runimaal jab', ruuk' i re' xnujik i ha' wach ak'al. Re' i palaw xan telelinik chik ruum rujosq'iil, i nelik reje i rub'ohl.

¹¹Eh xwilow chi wilik b'ila' chik panaq'ab' i flecha, je' wo' i ch'ihch' k'ulq'as xa saqrepik chik i reeh. Re' i q'iij, i poh xama' kik'uyu'jik ta chik pan kiye'aab' noq xkilow awach.

¹²Re' hat xayeew aajosq'iil chinaah chu'nchel i wach ak'al, eh xa yeq'eeb'eej panawooq taqe i tinamit ruum aajosq'iil.

¹³Re' hat xat chalik chi kiko'ljiik aatinamiit, chi ruko'ljiik i reey asik'im wach, ruum i re' xasach kiwach i k'amal kib'eeh i yiib' wach kina'ojb'al, je' rukab' noq insacharik wach jino'q i paat inyojib'ik haa' i ch'ikaab' reh.

¹⁴Eh xayeew q'ab' chi xa ruuk' i flecha xi kanteesjik taqe i k'amal kib'eeh i soldado. Re' taqe i wilkeeb' chiriij taqe i kawáyu xkikut kiib' chinaah taqe i tinamit ma' awach ta inko'linik keh, re' inkaaj i keh chi naa kisacham wach chi ma' eht'alimaj.

¹⁵Re' i hat xayeew q'ab' chi xkiq'at wach i palaw aatinamiit, chiriij taqe i kawáyu, atoob' ta xayohb'aal wo' naq chik wach i ha', je' wo' i rupuuh.

¹⁶Eh noq xwilow panusaq wiriik taqe re' xinyo'jik, xama' kinchol ta chik q'orik, xa kib'arb'otiik chik i pan waa' xama' xta naq chik k'isinoq nukowiil. Atoob' ta je' re' i k'ahchi' nuk'ulum, kok'ahchi' wuy-eem ruuk' q'unil chi re' i QaJaaw Dios naa taqe ruye'em panti' k'axik i ki-ixowinik qawach.

¹⁷Eh re' hin ma' k'isiin ta naa rusuuqb'iik nuk'ux ruuk' i QaJaaw Dios, atoob' ta ma' neenixmak'inik i higo, atoob' ta ma' nee tan wachinik i uuva, atoob' ta ma' neenwachinik i olivo, atoob' ta ma' xta chik taqe i tentzun, i wakax pankoraal. Re' hin xama' naa ta wo' rutib'iik nuk'ux.

¹⁸Ma' k'isiin la' naa rusuuqb'iik nuk'ux ruuk' i QaJaaw Dios, naa rusuuqb'iik nuk'ux ruuk' ruum re' reh waj ko'loom.

¹⁹Eh re' i QaJaaw Dios inye'wik rukowiil nuk'ux, re' reh inye'wik rukowiil taqe i wach nuch'ehk, reh chi kow kimb'ehik, je' kowiil imb'ehik i keej, Eh kiruyeew chupaam i ye'aab' aha' ma' xta neenuk'ul.