Read Poqomchi Sof 1 Bible Online

Sof 1 - Poqomchi bible

Sof 1

¹Re' i QaJaaw Dios je' wili i xuq'or reh i Sofonías: Noq xwihik chi reyil Judá i Josías rak'uun i Amón. Eh re' i Sofonías rak'uun i Cusi, re' Cusi rak'uun i Gedalías, re' i Gedalías rak'uun i Amarías, re' i Amarías rak'uun i Ezequías.

²Re' i QaJaaw Dios je' wili xuq'or: Re' hin naa nusacham kiwach chu'nchel i xa chib'ih jariik wilkeeb' wach ak'al.

³Eh naa nusacham kiwach i tinamit, taqe i chikop, taqe tz'ikin kirupinik pan taxaaj, taqe i kar wilkeeb' pam palaw. Eh naa wo' nusacham kiwach i yiib' wach kina'ojb'al, inki.

⁴Eh je' wo' chik wili i xuq'or: Re' hin naa nuye'em taqe panti' k'axik i aj Judá, je' wo' taqe i aj Jerusaleem. Naa wo' nusacham kiwach i ruqox i kitiyoox Baal. Naa wo' nusacham kiwach taqe i k'amal kib'eeh aj tiij kikamanik chikiwach taqe re'.

⁵Eh naa nusacham kiwach taqe i kijohtik chinaah i kipaat chulooq'jiik i q'iij, i poh, taqe ch'umiil. Re' keh inkixuk'aa' kiib' chupahqaljiik i rotob'il i kitiyoox Milcom, eh inkiq'or wo' i nub'ihnaal i hin.

⁶Eh naa nusacham kiwach taqe inkikanaa' nunimjiik, taqe i ma' nkikapaaj ta nusik'ariik ni xata chik inkipahqaaj kina'ojb'al weh, inki.

⁷Re' taq i hat matchoqik taq chik, chayohleej taq wach i QaJaaw Dios, ruum re' reh xailook' chik i ruyeew chaloq i ti' k'axik. Re' reh je' jinaj mayiij i naa ruye'em noq naa rukansam taq aatinamiit i ki-ixowinik taq awach.

⁸Noq naa nuq'asam panti' k'axik i nutinamiit, naa nuye'em taqe chutojariik i kimahk i k'amal kib'eeh. Eh naa nusacham kiwach i rak'uun rixq'uun i kireey, je' wo' taqe inkikoj itz'ihy inkikoj i ma' kinimanik ta weh.

⁹Eh naa nuye'em taqe i pan ti' k'axik taqe aj war, je' wo' taqe inkinujisaj chi xa chib'ih jariik i rupaat i ki dios ruuk' taqe i xankelq'aaj chaloq, ruuk' chukuj q'orik, inki.

¹⁰Re' i Dios je' wili xuq'or: Chupaam taqe i q'iij re' re' kow naakik'erem kichii' chi chii' puerta ink'ayjik wii' kar. Eh naa rib'irjiik chaloq i wilik wii' i rukab' ookb'al, chi xa kichoqik chik noq naa kik'uliik iloq naah taq yuuq' i nixowanik kiwach.

¹¹Naa taq ak'erem aachii' chi oq'ik i hat i wilkaat taq ma' najt ta ruuk' i ye'aab' Mactes, ruum naa kikanteesjiik taqe i aj k'aay wilkeeb' taq chaxilak, je' wo' chu'nchel i kich'aqwik wach tumiin.

¹²Eh chupaam taqe i q'iij re' re', re' hin je' na naa nuqopom nuq'aaq' chi kisik'ariik yiib' wach kina'ojb'al ar Jerusaleem. Eh naa taqe nuye'em chutojariik i kimahk, re' keh xa ch'iklik chik kik'ux, je' rukab' noq intuqlujik i vino, je' wili inkiq'or: Re' Dios xama' xta wo' i neerub'an qeh, inki taqe.

¹³Xanaah re' naa ruq'uchariik i chib'ih keh, naa wo' ruyojariik i kipaat. Eh re' i kipaat naa kiyejaam xama' naa ta wo' kipatinik chupaam, re' i ki uuva naa kitikim xama' naa ta wo' kuk'em keh i riis, inki Dios.

¹⁴K'ahchi' chik ruponiik i q'iij chi re' i QaJaaw Dios naa ruye'em taqe panti' k'axik i yiib' wach kina'ojb'al. Eh xiik' naa ti' kiil i naakik'ulum chupaam i q'iij re' re', nik' ta naq kowiil i winaq xanaa wo' roq'iim ruum i naakik'ulum

¹⁵Chupaam taqe q'iij re' re', re' i QaJaaw Dios naa ruk'uhtaam i rujosq'iil chikinaah taqe re'. Eh jinaj ti'kiil k'uxliis, jinaj yot'oj ánima, jinaj tukinik wachiis, ruum i rusachariik kiwach, naa ruq'equumriik paam i taxaaj, ruum i q'eq suutz', naa ruq'equumriik wach i q'iij.

¹⁶Eh naakixulem chaloq i kituun i naa kichaliik chi q'aq'inik, chikinaah taqe i tinamit kotimaj kiij chi tz'aq, eh wilik kinajt naah tz'aq ko'lemb'al kiib'.

¹⁷Eh naa nuye'em taqe panti' k'axik i aj Judá, i aj Jerusaleem, naa kikahniik chi je' taqe mutz'wach, xak'ul chik naa kojiik chusik'ariik aha' naa kiko'leem kiib', ruum i kimahk chi nuwach, naa ruchihkiik pampooq i kikik'eel, eh re' i kiti'jolal naa rukahniik chi xa tz'aq tz'aq chik, xa je' chik rusaa' wakax, inki.

¹⁸Eh chupaam i q'iij re' re' ni xata naq re' i ki plata, i ki oro naa ruko'liniik keh chuwach i rujosq'iil i QaJaaw Dios. Ruuk' i rujosq'iil jumehq'iil naa rusacham kiwach chu'nchel i k'achareel wach ak'al, je' rukab' i rub'an i xaq q'aaq' noq i ruk'at chu'nchel i xa chib'ih jariik.