Read Poqomchi Hag 1 Bible Online

Hag 1 - Poqomchi bible

Hag 1

¹Wilik-oq chik rukab' haab' rokiik chi reyil Persia i reey Dario, pank'amb'al rub'eeh i ruwaaq poh, re' i QaJaaw Dios ruuk' chii' i jalal ruq'oral Hageo rub'ihnaal xuq'oreej i wilik chi ajaab'esil Judá Zorobabel rub'ihnaal, rak'uun i Saltiel. Eh xuq'oreej i kajaaw i k'amal kib'eeh aj tiij Josué rub'ihnaal rak'uun i Josadac.

²Eh je' wili i xuq'or i QaJaaw Dios nim rajaawriik reh i Hageo: Re' i tinamit wili inkiq'or noq komajaa' i rureq i q'iij chi naa kiyejaam aha' wilik i yojeel taqe reh i nupaat, inki.

³Xchalik i Hageo xuq'or wo' keh i tinamit i xq'orarik reh ruum i QaJaaw Dios, je' wili i xuq'or:

⁴¿Mi ruq'ijil taq cha weh re' i hat chi k'acharik taq chik i na a'n chupaam i holohaq paat, eh ma' nakapaaj ta taq ruyejeb'jiik taqe i yojinaq reh i rupaat i Dios?

⁵Re' i QaJaaw Dios nim rajaawriik je' wili i xuq'or taq cha weh: Chakapaaj taq riij mi ruk'ul taq i k'ahchi' kaat chi je' re'.

⁶Eh nim wo' naq taq i atik i na a'n, xama' xta wo' taq inamol, i na a'n wo' naq taq awa' xama' ti nujik ta wo' taq, i na a'n wo' naq taq ahaa' xama' nik'ik ta wo' taq aachiqchi'iil, i nab'ur wo' naq taq awiib' xama' tiq'ixiinb'ik ta wo' taq. Eh re' taq i tz'aaq akamaj xa q'e' i nik'ik, xa je' pan hoop laj koxtaal taq inayeew.

⁷Re' hin, hin Dios nim wajaawriik, i nuq'or wo' chik taq aweh chi chakapaaj taq mi ruk'ul taq i na a'n weh chi je' re'.

⁸Hiy la' taq johtoq pantaq rax chee' chak'am taq chaloq taqe i chee' reh chinee taq inayejaa' taqe i yojinaq reh i nupaat, reh chinee suuqb'ik nuk'ux, eh ar taq nee kinaloq'ej.

⁹Re' taq i hat k'ih naq i chib'ih taq aweh inasik', eh xa k'isiin wo' taq inareq. Eh re' inamol taq panapaat, xa ruuk' i junhuup chi wuxlaab' inwesaj taq chawach. ¿Chib'ih reet noq i nub'an taq aweh chi je' re'? Ruum re' taq i hat xa re' taq apaat i hat xayejaa', eh re' i nupaat i hin ma' nakapaaj ta taq ruyejeb'jiik, inki Dios.

¹⁰Eh awuum taq i hat ma' nuyeew ta chik i jab' chinaah i wach ak'al, eh ruum i re' ma' wachinik ta chik taq atik.

¹¹Re' wo' hin xinq'ilwik reh i jab' chi ma' xub'an ta chik chinaah i wach ak'al, chinaah taq i aa-tik wilkeeb' wataq yuuq' k'ixkaab'. Eh ma' xnuyeew ta chik i jab' chinaah taq aa-trigo, chinaah taq aa-uuva, chinaah taq aa-oliva. Xkikuy kihaa' taqe i chikop, je' wo' i tinamit, ruch'ihil taqe i kamanoom, inki i Dios.

¹²Re' i Hageo jalal ruq'oral i Dios xuq'or keh chu'nchel i xq'orarik reh ruum i Dios. Eh noq xrib'iraj i Zorobabel taqe re', re' rak'uun i Salatiel, ruch'ihil i Josué k'amal kib'eeh aj tiij rak'uun i Josadac, kuch'ihil taqe i tinamit ma' k'isiin ta xkiyohleej wach i QaJaaw Dios, xkian i xuq'or.

¹³Re' i Hageo jalal ruq'oral i Dios xub'an ruk'utaaj kuuk' i tinamit parub'ihnaal i QaJaaw Dios, je' wili i xuq'or keh: Re' i QaJaaw Dios je' wili i xuq'or: Re' hin xti korik chi naa nuwihiik kuuk', inki.

¹⁴Eh ruuk' i re', re' i QaJaaw Dios xuyeew rukowiil ruk'ux i Zorobabel rak'uun i Salatiel ajaab'ees ar Judá, eh xuyeew rusuqkiil ruk'ux i Josué rak'uun Josadac kajaaw i k'amal kib'eeh aj tiij, eh xuyeew wo' rusuqkiil kik'ux i tinamit. Ruum i re' xi okik chi rutinamiit i yojinaq taqe reh i rupaat i Dios, inki.

¹⁵Eh xkitoq'aa' kamanik pan kijib' ru ka'winaq rub'eeh i ruwaaq poh, ree rukab' haab' rokiik chi reyil i Dario ar Judá.