Read Poqomchi Hag 2 Bible Online

Hag 2 - Poqomchi bible

Hag 2

¹Eh pan jinaj ru ka'winaq rub'eeh i ruwuuq poh ree rukab' haab' re' re', re' i QaJaaw Dios je' wili i xuq'or reh i Hageo jalal ruq'oral:

²Re' hat naa a'nam ak'utaaj ruuk' i wilik chi ajaab'esil ar Judá Zorobabel rub'ihnaal rak'uun i Salatiel, je' wo' ruuk' i kajaaw i k'amal kib'eeh aj tiij Josué rub'ihnaal rak'uun i Josadac, je' wo' kuuk' i tinamit, je' wili i naa aq'orom keh:

³¿Mi ko wilik taq jino'q chaxilak i ilwinaq chaloq i nupaat noq xkorjik cho pampeet chi xiik' naah holwochiil? ¿Mi ma' nakoj taq rehtaal re' i nupaat yu'naak chi ma' je' ta chik holwochiil noq xkorjik cho pampeet?

⁴Re' hat Zorobabel chakowej ak'ux je' wo' hat Josué kajaaw k'amal kib'eeh aj tiij chakowej wo' ak'ux. Eh chawunchelaal taq i hat wilkaat taq paruyuq'ul i Judá chakowej wo' taq ak'ux chi kamanik, re' hin neekinwihik taq awuuk' cha toob'jiik, inki i QaJaaw Dios nim rajaawriik.

⁵Je' rukab' i xnuq'or taq cha weh noq xatwisaj taq chaloq Egipto, chi naa taq nuwihiik awuuk', eh yu'naak xa wilkiin wo' taq awuuk', ruum aj re' maa yohb'isaj taq awiib'.

⁶Re' hin ilook' i rureq i q'iij chi naa nuk'uyu'sam i taxaaj, i wach ak'al, i palaw, ruch'ihil i ye'aab' chiq yuuq'.

⁷Eh naa wo' kib'arb'otiik chi nuwach chu'nchel i nimaq tinamit, eh naa kik'amam chaloq i kib'ehomal chupaam i nupaat, ar naaruwihiik chi manlik inuloq'il, inki i QaJaaw Dios nim rajaawriik.

⁸Chu'nchel i plata, i oro re' hin kinehchanik reh.

⁹Re' i nupaat naarukorjiik ruka'peech xiik' chik naah holwochiil chuwach i wilik naq cho pampeet. Eh naa nuye'em i suq laj wihik chupaam i ye'aab' wili, inki i QaJaaw Dios nim rajaawriik.

¹⁰Eh kijib'-oq chik ru ka'winaq rub'eeh i rub'eleej poh, re' rukab' haab' rokiik chi reyil i Dario, re' i QaJaaw Dios xuq'oreej wo' chik i Hageo i jalal ruq'oral.

¹¹Xuq'or reh chi parub'ihnaal i reh nim rajaawriik chupahqaaj keh i k'amal kib'eeh aj tiij chib'ih inkikapaaj chiriij taqe i k'uhb'aal wili.

¹²Eh re' Hageo je' wili i xuq'or: Re' jino'q i winaq nee ruk'am reje i mayijimaj tiwik rub'otom pan itz'ihy, nenik'ik jurinoq chinaah i kaxlanwi'k, chinaah i riis uuva, chinaah i Aseite, oon chinaah i k'uxb'al wi'k. ¿Mi neenkahnik chi kuxisamaj chik taqe re'? inki. Ma' nee ta inkuxeesjik xa ruum i re', inki taqe i k'amal kib'eeh aj tiij.

¹³Eh re' i Hageo xupahqaaj wo' chik keh chi je' wili: Qaq'or chi wilik jino'q i neerutz'aj i kamnaq, eh nee wo' chik i rutz'aj jino'q keh i chib'ih jariik i xqaq'or, ¿Mi neenkahnik chi ch'uwa' wach? inki. Re' re' ra'j neenkahnik chi ch'uwa' wach re', inki taqe i k'amal kib'eeh aj tiij.

¹⁴Re' i Hageo je' wili i xuq'or: Re' i QaJaaw Dios nim rajaawriik je' wili i xuq'or: Je' wo' re' taqe i tinamit wili chu'nchel inkiyeew chi kimayiij chi nuwach, chu'nchel inki a'n xiik' naah ch'uwa'iil wach.

¹⁵Je' re' noq yu'naak johtoq chi qawach noq komajaa' i ntohq'ik taq ayejaam i nupaat cha kapaaj taq riij chi korik chib'ih taq i na a'nam re' re'.

¹⁶Eh noq inakapaaj taq i hat chi naa taq amolom juninaq-oq koxtaal i wach taq atrigo xalajeeb' wo' tii koxtaal taq inamol. Eh noq inakapaaj taq i hat chi naa taq areqem lajeeb'-oq roxk'ahl ikom i riis taq aa-uuva, xa juninaq wo' tii ikom taq inareq.

¹⁷Re' hin xnusach wach taq i aa-tik inakamaneej wach, ruuk' yab'ilaal, ruuk' saqb'och. Eh re' taq i hat xama' xinanimaj ta wo' taq ruka' pech, inki QaJaaw Dios.

¹⁸Chakoj taq rehtaal chi yu'naak kijib' ru ka'winaq ruk'amam rub'eeh i rub'eleej poh xtohq'ik taq akojom i raa' ch'ikaab' reh i nupaat.

¹⁹Ruum aj re' yu'naak taq johtoq chawach naarunujiik taq inamol wii' i wach taq atik. Yu'naak ma' rub'an ta wach i uuva, i higo, i granado, i olivo, yu'naak taq johtoq chawach naa taq kaat nukuxisam, inki i QaJaaw Dios.

²⁰Re' i QaJaaw Dios chupaam wo' q'iij re' re' xuq'oreej i Hageo jalal ruq'oral, je' wili i xuq'or reh:

²¹Re' hin i nuq'or aweh chi cha q'or reh i Zorobabel wilik chi ajaab'esil ar Judá chi re' hin naanuk'uyu'sam i taxaaj, i wach ak'al.

²²Re' hin naawisam taqe pan kiye'aab' i wilkeeb' chi reyil, naa wo' wisam i kajaawriik i nimaq taq tinamit, naanusacham kiwach. Eh na naanusacham wach i kikareta, eh chi naa rukanteesjiik i kikawayu, je' wo' taqe i iqilkeeb' chiriij, re' keh xak'ul naa kikansam kiib' chikiwach ruuk' q'aslaj ch'ihch'.

²³Re' i QaJaaw Dios nim rajaawriik je' wili i xuq'or: Eh chupaam taqe i q'iij na' k'ularoq taqe i re', re' hat Zorobabel rak'uun i Salatiel waj kamanoom re' hin naanucha'jiniik aweh, je' rukab' noq inchajaljik jino'q ilopq'aaq' kojb'al ehtalil, ruum re' wo' hin xin sik'wik chaawach, inki.