Read Poqomchi Zac 4 Bible Online

Zac 4 - Poqomchi bible

Zac 4

¹Re' i ánjel xub'an ruk'utaaj wuuk', xsutinik wo' chik chaloq noq xwilow, xiruksaj, je' rukab' noq inukteesjik i koq jino'q i suq suq ruwiriik, xupahqaaj weh chi je' wilik.

²¿Chib'ih jariik i k'ahchi' awilom wach? inki weh. Re' hin je' wili ruchaq'weesjiik xnub'an: Jinaj i ye'aab' kantela re' ruuk' i oro wuquub' i ye'aab' saqumb'al wilik chinaah k'ahchi' wilom wach, kinki reh. Eh chinaah wilik i ye'aab' aseite, wuquub' i hoop paam ch'ihch' i nik'ik wii' i raseitehiil.

³Eh k'ul tar pantaq rucheel i ye'aab' kantela wilik i ju' i juniwal chi olivo juniwal i wilik parusak'aaj, eh juniwal i wilik parutz'eet, kinki reh.

⁴Eh re' hin xnupahqaaj reh chi je' wili i ánjel k'utaaj i rub'an wuuk': Jaaw, ¿chib'ih iraaj ruq'orom i k'ahchi' wilom wach re' re'? kinki reh.

⁵Re' i ánjel je' wili xuq'or weh: ¿Mi ma' aweht'al re' chib'ih iraaj ruq'orom taqe re'? inki weh. Jaaw ma' weht'al taj, kinki reh,

⁶Re' i ruánjel i QaJaaw Dios je' wili i xuq'or weh: Re' i wili i rehtalil i xuq'or i QaJaaw Dios reh i Zorobabel, chi je' wili: Re' hat ma' re' ta ruuk' q'aq'inik, ma' re' ta ruuk' awansil naa a'nam i nukamaj, ruuk' la' i rajaawriik i Wuxlab'al inki i QaJaaw Dios nim rajaawriik.

⁷Re' ti' k'axik atoob' ta je' najtiil naah i yuuq', re' i Zorobabel ma' k'axik ta noq neerukuy rik'teesjiik. Eh korehtaal i rukoj i tz'apaab' wach ab'aj reh ruyejeb'jiik i rupaat i Dios, kow naakik'erem kichii', chi je' wili: Yohb'aal inche wach holwochiil i xb'aan wili, inko'q taqe.

⁸Eh re' i ruánjel i QaJaaw Dios xq'orik wo' chik wuuk' noq xb'iraj, je' wili i xuq'or weh:

⁹Re' i Zorobabel naa rutik'aniik ruyejeb'jiik i rupaat i QaJaaw Dios, eh re' wo' i reh naa rukuxisaniik wach ruyejeb'jiik, ruuk' i re' naa taq anab'eem i hat chi re' i QaJaaw Dios xtaaq'anik cho weh i hin taq awuuk'.

¹⁰Eh re' i ma' xkichop ta kik'ux reh rutik'ib'jiik i paat re' re', naa rusuuqb'iik kik'ux noq naakilom chi re' i Zorobabel naa rukuxisaniik reh. Eh chi riij i re' je' wili i xuq'or ruánjel i QaJaaw Dios: Re' i wuquub' chi saqumb'al k'ahchi' awilom wach, rehtalil chi re' i QaJaaw Dios i rilow chu'nchel i wach ak'al, inki.

¹¹Re' hin xnupahqaaj b'ila' chik reh i ánjel chi je' wili: Raaj i ka'iwal chi ruche'el olivo wilkeeb' pantaq rucheel i ye'aab' kantela ¿Chib'ih iraaj ruq'orom? kinki reh.

¹²Eh xnupahqaaj wo' reh chi je' wili: Raaj ki'ib' chi q'ab' olivo wilik cho chikinaah i ki'ib' chi hoop paam ch'ihch' re' ruuk' i oro ik'tesb'al i raseitehiil taqe i saqumb'al, ¿chib'ih iraaj ruq'orom? kinki reh.

¹³Re' i ánjel xupaqaaj weh chi je' wili: ¿Mi korik chi ma' aweht'al taj chib'ih iraaj ruq'orom? inki. Korik jaaw ma' weht'al taj, kinki reh.

¹⁴Re' reh je' wili xuq'or weh: Re' i ki'ib' chi q'ab' olivo wili kehtalil i ki'ib' sik'ooj cho kiwach chub'anariik i rukamaj i QaJaaw Dios ehchan reh chu'nchel i wach ak'al, inki weh.