Read Poqomchi Zac 5 Bible Online

Zac 5 - Poqomchi bible

Zac 5

¹Re' hin i xk'uhtjik weh panusaq wiriik, i jumb'oht chi huuj b'ehik i rub'an panteew k'ultar tz'ihb'amaj wach.

²Eh re' i ánjel xupahqaaj weh chi je' wili: ¿Chib'ih jariik i k'ahchi' awilom wach? inki. Re' hin k'ahchi' wilom wach i junb'oht chi huuj lajeeb' b'ara rooq, eh ho'oob' b'ara i runimaal wach, kinki reh.

³Eh je' wili i xuq'or weh: Chuwach i huuj re' re' tz'ihb'amaj chi naa kiye'ariik panti' k'axik i tinamit chi junsuut i wach ak'al. Juntar tz'ihb'amaj wii' chi naa rusachariik kiwach i aj jileq', eh chi juntar tz'ihb'amaj chi naa rusachariik kiwach taqe inki q'or i b'ih i QaJaaw Dios chi xama' xta rub'ehel.

⁴Re' hin naa nuye'em i ti' k'axik pankipaat taqe i kib'anik i leq' je' wo' pankipaat taqe i kiq'orik reh i nub'ihnaal chi xama' xta rub'ehel. Re' i ti' k'axik re' re' ar naa ruwihiik korehtaal insahchik wach chu'nchel chib'ih keh, inki i QaJaaw Dios nim rajaawriik, inki.

⁵Re' i ánjel k'utaaj i rub'an wuuk' xelik chaloq chi jumehq'iil noq xwilow, je' wili i xuq'or weh: Chakoj rehtaal i k'ahchi' awilom wach re' re', inki weh.

⁶Re' hin xnupahqaaj b'ila' reh chi je' wili: Raaj i re' ¿chib'ih iraaj ruq'orom? kinki reh. Re' reh je' wili i xuq'or weh: Re' chakach re' re' rehtalil i pajb'al reh i kimahk i tinamit chi junsuut i wach ak'al, inki.

⁷Eh re' i chakach re' re' plomo ch'ihch' i tz'apb'al naah. Noq xkiteh johtoq naah i chakach jinaj chik ixoq tzunlik chupaam noq xwilow.

⁸Re' ixoq rehtalil i yiib' wach na'ojb'al imb'aan, inki weh. Eh re' i ánjel xumihnaaj chik qohoq ixoq panchakach, xutz'ap wo' chik naah ruuk' i tz'apb'al naah plomo ch'ihch'.

⁹Eh jinaj wo' chik i xwilow wach panusaq wiriik, ki'ib' chik taqe ixoq xi k'uloq, wilik kixiik' je' rukab' i ruxiik' i nimlaj chikop rupinik chik inki a'n xkichop johtoq panteew i chakach reh pajb'al.

¹⁰Re' hin xnupahqaaj reh i ánjel chi je' wili: ¿Aha' inkik'am reje i chakach pajb'al? kinki reh.

¹¹Re' reh je' wili xuq'or weh: Ar xkik'am reje chupaam i ye'aab' Sinar. Eh ar naa kiyejaam jinaj i paat ye'aab' reh. Noq kiyejaam chik naakiye'em chinaah jinaj i ye'aab' reh, inki weh.