Read Poqomchi Mal 4 Bible Online

Mal 4 - Poqomchi bible

Mal 4

¹Re' i QaJaaw Dios je' wili i xuq'or: Re' hin xti korik i nuq'or chi ilook' ink'uloq i ruq'ijil i ti' k'axik chi je' jino'q runimaal q'aaq' chikinaah taqe i yiib' wach kina'ojb'al, je' wo' chikinaah chu'nchel i nimaq kiwach inki a'n kiib', xa je' chik kik'ahtik chiq k'im noq naakik'ahtiik chi sachb'al kiwach chi jumpech.

²Re' taq i hat i tiyohlinik weh naa taq ruk'uliik i loq i korik laj na'ojb'al taq cha naah, je' rukab' noq insihq'inik chaloq i q'iij, ruuk' taqe i ruchaab' i ruk'am chaloq i ko'lemb'al taq awiib'. Ruuk' i re' naa taq apisk'aniik panawoq, je' rukab' noq kipisk'anik pankooq i kok' wakax noq kielik cho pankiwab'aal.

³Eh na' ponoq i q'iij re' re' k'ahchi' nuyejaam wach, re' taq i hat naa taq awesam i kajaawriik i yiib' wach kina'ojb'al, je' nanaa taq ayeq'em taqe panawooq, je' rukab' imb'aan reh i ch'uwa'.

⁴Eh k'oloq taq panak'ux i nuk'uhb'aal nuq'orom cho reh i waj kamanoom Moisés, chinaah i yuuq' Horeb. Re' taqe i nuk'uhb'aal re' re' xnuq'or chaloq, re' naq chi chu'nchel i aj Israel naakinimaniik reh.

⁵Eh noq komajaa' i nub'an i q'ataj q'orik re' re', kopeet naa nutaq'aam taq reje chaxilak jinaj i jilow i Elías, wihinaq cho chi jalal nuq'oral. Re' q'iij re' re' xiik' naah loq'il, eh ma' k'isiin i yo'jik naarub'aan.

⁶Re' i waj taqareel re' re', naaruq'oriik chi re' taqe i tuutb'ees, i ajaab'ees, naa kik'amam kiib' panotob'il kuuk' i kak'uun kixq'uun. Eh wila' ma' xkian, re' hin, naarukuxiik nusacham kiwach, inki i QaJaaw Dios nim rajaawriik.