Read Poqomchi Juan 10 Bible Online

Juan 10 - Poqomchi bible

Juan 10

¹Re' Jesús je' wili i xuq'or keh: Re' hin xti korik taq i nuq'or aweh: Awach i ma' re' ta chi chii' i ru puertahiil i kikoraal i tentzun inokik, tokoom chik inooj johtoq, re' re' ajileq' eh aj kaansoom.

²Eh re' i manlik aj cha'jen tentzun reh, xti chi chii' i puerta inokik i koq.

³Eh re' aj cha'joom i ruteh i puerta. Eh inokik i koq, i ruyuq'eej taqe i rutentzuun ruuk' i kib'ihnaal, eh re' keh inkib'iraj wo' i ruq'oral. Eh i resaj taqe chaloq chi riij i koraal i rutentzuun.

⁴Eh resam-oq chik taqe chaloq chu'nchel i rutentzuun, inooj chi peet b'eeh chikiwach. Re' taqe rutentzuun inkitahqeej wo' hoq, ruum keht'al wach i ruq'oral.

⁵Re' taqe i rutentzuun ma' nkitahqeej ta i ma' keht'al ta wach kielik chuwach, ruum ma' keht'al taj nik' wach kiq'orik taqe i ma' keht'al ta wach, inki Jesús.

⁶Re' Jesús xuq'or keh i jalwaach q'orik wili, xa re' la' re' keh xama' xkireq ta wo' chi riij chib'ih i xraaj ruq'orom keh ruuk' i re'.

⁷Eh je' wo' chik wili i xq'orarik keh ruum i Jesús: Re' hin xti korik taq i nuq'or aweh chi re' hin i Puerta i kiokik wii' taqe i tentzun.

⁸Eh chu'nchel i k'ulinaq chi peet b'eeh chi nuwach i hin, ajileq', aj kaansoom taqe, eh ma' xinimjik ta wo' kuum taqe i tentzun.

⁹Re' hin i Puerta. Awach inokik wuum i hin, re' re' naa ruko'ljiik, eh naa rukahniik chi je' rukab' i tentzun i nelik inokik pan koraal, eh i rureq ruwa'.

¹⁰Re' i ajileq', xa re' i leq', xa re' ikaansanik, xa re' sachooj xchalik rub'an. Raaj i hin, xin chalik chuye'ariik taq aweh i k'acharik, reh chi naa taq ruwihiik aak'achariik chi juneliik.

¹¹Re' hin i Atoob'laj aj Cha'joom. Re' i atoob'laj aj cha'joom i ruyeew riib' pankimik chi riij taqe rutentzuun.

¹²Eh re' aj cha'joom xa re' i rutojb'aal i ruk'ax, noq i rilow chi nk'u'loq i xojb' i rukanaa' taqe kahnoq i tentzun, i rumol chi elik, ruum ma' re' ta wo' i reh i manlik cha'joom, eh ma' re' ta wo' reh taqe i tentzun. Eh re' xojb', i ruchop taqe i tentzun, k'ul i rutukej kiwach.

¹³Re' i winaq re' re' i rumol chi elik, ruum re' reh xa re' wo' i rutojb'aal iraaj, eh re' taqe i tentzun ma' xta raaj reh.

¹⁴Re' hin i Atoob'laj aj Cha'joom. Weht'al kiwach nutentzuun, eh re' taqe i wee hin keht'al wo' nuwach,

¹⁵je' rukab' noq reht'al nuwach i waJaaw i hin, je' wo' re' noq weht'al wach i reh. Je' re' noq, re' hin i nuyeew wiib' pankimik chikiij taqe i nutentzuun.

¹⁶Eh wilik taqe i nutentzuun ma' re' ta ruuk' i wilkeeb' ayu' pan koraal. Re' keh naa wo' nuk'amam taqe cho ayu', naa kib'iram i nuq'oral, xa jinaj chik kiwach naa rukahniik, eh xa jinaj chik chi aj cha'joom i naa rucha'jiniik keh.

¹⁷Re' waJaaw kiruk'ax, ruum i nuyeew wiib' pankimik, reh chi naa wo' chik nuk'ulum i nuk'achariik.

¹⁸Ma' tokoom taj naa rukansaniik weh xanaa la' nuye'em wiib' chi kimik. Ruum re' hin wilik wajaawriik chuye'ariik wiib' chi kimik, eh wilik wajaawriik chuk'ulariik wo' chik i nuk'achariik. Re' i wili xuq'or cho weh i waJaaw, inki Jesús.

¹⁹Eh noq xkib'iraj i q'orik wili taqe i k'amal kib'eeh i aj judío, xyoj wo' chik kik'ux chikiwach.

²⁰Eh wilik taqe i xkiq'or chi je' wili: ¿Chib'ih reet noq inkinimaj i ruq'or i winaq re' re'? Re' reh wilik i ma' tob'laj uxlab'al ruuk', eh ahqaal inki taqe.

²¹Wilik xiq'orik reh chi je' wili: Ma' awach taj i wilik ma' tob'laj uxlab'al ruuk' nee nq'orik chi je' rukab' i reh. Re' ma' tob'laj uxlab'al ma' nee ta ruteh inaq'kiwach taqe i moywach inki taqe.

²²Ar Jerusaleem paruq'ijil jab', k'ahchi' kik'sam i ninq'iij, re' i ruhab'ul i rusulariik i rupaat i Dios.

²³Eh re' Jesús b'ehik i rub'an ar chi muuj i rupaat i Dios, re' i Muuj Salomón rub'ihnaal.

²⁴Eh xkisutej riij i Jesús, eh xkipahqaaj reh chi je' wili: ¿Xti ko jaruuj aj wo' nateh wach qeh chib'ih a'nam? Wila' re' i hat i Cristo, xti cha q'or qeh yu'naak chi jumpech, inki taqe.

²⁵Eh re' Jesús je' wili i chaq'wik xub'an: Re' hin nuq'orom taq chik aweh awach i hin, eh ma' nanimaj ta taq weh. Re' taqe i ma' ilooj taj i nub'an ruuk' i rajaawriik i waJaaw ink'uhtanik reh chi korik awach i hin.

²⁶Eh re' taq i hat ma' nanimaj ta taq, ruum ma' hat ta wo' taq haa' chi kixilak taqe i nutentzuun.

²⁷Re' taqe i nutentzuun i hin inkinab'eej i nuq'oral, eh re' hin weht'al wo' kiwach, eh kinkitahqeej wo' hoq.

²⁸Eh re' wo' hin kinye'wik keh i juneliik k'acharik. Eh ma' jaruuj naa rusahchiik kiwach, eh ma' awach ta neenq'uchwik keh panuq'ab'.

²⁹Re' waJaaw xye'wik weh taqe nutentzuun xiik' naah i rajaawriik chikiwach chu'nchel chib'ih i wilik. Eh ma' awach ta neenq'uchwik keh pan q'ab' i waJaaw.

³⁰Re' i waJaaw, eh re' hin, xa jinaj qawach, inki Jesús.

³¹Xkib'iraj chi je' re' taqe i k'amal kib'eeh i aj judío, xkichop taqe chaloq ab'aj kantesb'al naq reh i Jesús.

³²Je' wili i xq'orarik keh ruum i Jesús: Ruuk' i rajaawriik i waJaaw, ma' k'isiin otob'il xnub'an taq chawach. ¿Aha' wilik ximahkunik wii' ruuk' taqe re', ruum kinawaaj taq kinakansam chi ab'aj? inki.

³³Re' taqe i k'amal kib'eeh i aj judío je' wili i xkiq'or reh: Re' hoj ma' ruum taj i holohik laj na'ojb'al i na a'n tiqaaj kaat qakansam chi ab'aj, ruum la' chi naq'ehtaaj i Dios ruuk' taqe aq'oral. Xanaah re', xa hat wo' winaq, eh inakoj inchaa wiib' chi Dios, inki taqe.

³⁴Eh je' wili i xq'orarik keh ruum i Jesús: Chupaam i k'uhb'aal ye'ooj taq chaaweh i hat tz'ihb'amaj, chi re' Dios awach i kinimanik reh ruq'or chi dios taqe, inki.

³⁵Wila' tz'ihb'amaj cho pan santo laj huuj chi re' Dios xukoj taqe cho chi dios awach taqe aj eh xuq'or i ruk'uhb'aal, ma' nee ta ruyee riib' chi neen q'orarik chi ma' korik taj.

³⁶Eh re' hin, re' wo' Dios xsik'wik cho nuwach, eh xirutaq'aaj chaayu' wach ak'al. Eh ¿nik' taq wach noq inaq'or i hat chi xnuq'ehtaaj i Dios, ruum chi xnuq'or wiib' chi hin Rak'uun i reh?

³⁷Wila' ma' k'ahchi' kiin taqe i rukamaj i waJaaw, i ruk'ul chi ma' nee ta taq kinanimaj.

³⁸Eh wi xnub'an i rukamaj i waJaaw, ro'q ta ma' nee taq kinanimaj i hin, cha nimaj taq aha' wilik i neenub'an. Reh chi nee taq inanab'eej chi re' i waJaaw wilik wuuk' i hin, eh re' hin wilkiin ruuk' i waJaaw, ki uchjik ruum i Jesús.

³⁹Eh xkaaj wo' naq chik kichopom i Jesús xa re' la', re' reh ma' xuyeew ta wo' riib' keh.

⁴⁰Chi riij i re', re' Jesús xooj wo' chik parelb'aal q'iij ree nim ha' Jordán. Ar xwihik chupaam i ye'aab' re' xub'an cho wii' qasanik ha' i Juan pampeet.

⁴¹Eh ma' k'isiin i xiooj ilwoq reh i Jesús, je' wili xkiq'or: Re' Juan aj qasan ha' ma' xta jino'q ma' ilooj taj xuk'uhtaaj xa re' la', re' i xuq'or chi riij i winaq wili xti korik, inki taqe.

⁴²Eh ma' k'isiin i xinimanik reh i Jesús chupaam i ye'aab' re' re'.