Read Poqomchi Juan 13 Bible Online

Juan 13 - Poqomchi bible

Juan 13

¹Ach-oq i iqal i runinq'ijiik i elik chaloq Egipto, re' Jesús reht'al chik chi xponik i ru orahiil chi nareliik reje ayu' wach ak'al, eh chi naa wo' chik rojiik ruuk' i raJaaw pan taxaaj. Re' Jesús xa ruk'ax wo' taqe pampeet i kinimanik reh wach ak'al, eh xa je' wo' re' kik'axariik xub'an noq xooj kuxoq.

²Eh noq wi'k inki a'n ree xq'eq re' Judas, i rak'uun i Simón Iscariote, q'orooj chik paránima ruum i aj Yahm chi naa ruq'asam Jesús chi ma' eht'alimaj.

³Re' Jesús reht'al chi re' Dios xye'wik reh pan q'ab' chu'nchel i xa chib'ih jariik, eh reht'al wo' hoq chi ruuk' i Dios elinaq chaloq, eh chi ar wo' chik naa rojiik wih-oq.

⁴Eh noq wi'k inki a'n naah mexa ree xq'eq, re' Jesús xpa'lojik johtoq, xresaj i runim rooq so' xuk'am chaloq jinaj itz'ihy juxb'al oqis, xub'ak' panyejaal.

⁵Eh xuyeew i ha' chupaam jinaj i ye'aab' ha', eh xutoq'aa' rutz'ajam i kooq chi kiju'junaal i raj tahqaneel, eh xujux wo' chik i kooq ruuk' itz'ihy rub'ak'am panyejaal.

⁶Eh noq xutoq'aa' naq rutz'ajam i koq i rooq i Simón, Pedro i rukab' b'ih je' wili i xuq'or reh i Jesús: Jaaw, ¿mi re' naa wo' atz'ajam taqe i wooq i hin? inki.

⁷Re' Jesús je' wili ruchaq'weesjiik xub'an: Yu'naak majaa' pee neenareq chi riij i k'ahchi' nub'anam, re' wili koq'uun naa areqem chi riij, i nuchjik.

⁸Re' Pedro je' wili i xuq'or: Re' hin ma' jaruuj neenuyeew aweh taqe wooq chi neenatz'aj, inki. Re' Jesús je' wili xuq'or: Wila' ma' xawaaj chi xnutz'aj aawooq, ma' naa ta awokiik paruman wuuk', inki reh.

⁹Eh re' i Simón Pedro je' wili i xuq'or reh i Jesús: Jaaw, wila' je' re', ma' nwaaj ta chi xa re' taqe wooq neenatz'aj inwaaj la' chi neenatz'aj haa' taqe nuq'ab' ruch'ihil i nunaah inki.

¹⁰Eh re' i Jesús je' wili i xuq'or reh i Pedro: Awach i koxub'an ritiin xa re' taqe rooq iraaj tz'ajarik, ruum saq chik wach chu'nchel. Re' taq i hat saq taq chik awach, atoob' ta ma' chawunchelaal ta taq saq awach, inki.

¹¹(Re' Jesús xuq'or keh i raj tahqaneel chi ma' chu'nchel ta saq kiwach, ruum reht'al i reh chi kixilak i keh wilik naa ruk'ayiniik reh chi ma' eht'alimaj.)

¹²Eh noq xukohlaaj rutz'ajariik i kooq i raj tahqaneel, xukoj wo' chik i runim rooq so' xooj wo' chik tzuhnoq nah méxa, eh je' wili i xuq'or keh: ¿Mi nareq aj wo' taq chi riij xnub'an taq aweh?

¹³Re' taq i hat Qaj Tijineel QaJaaw tiki taq weh. Rub'ehel taq inaq'or weh chi je' re', ruum hin wo' hoq.

¹⁴Re' hin, ma' re' ta nkiwii' chi hin taq awaj Tijoom eh chi hin taq aaWaJaaw, xnutz'aj la' taq aawooq je' wo' re' inchol taq a'nam i hat, k'ul taq inchol atz'ajam aawooq chawach.

¹⁵Re' hin xnuk'uhtaaj taq chik chawach nik' wach taq i naa a'nam, reh chi nee taq i na a'n awee i hat nik' wach i xnub'an taq awee hat.

¹⁶Re' hin xti korik taq i nuq'or aweh chi ma' jino'q i xa móso q'e' nim wach chuwach i rupatroon, eh ma' awach ta wo' hoq i xa aj taqareel q'e' nim wach chuwach intaaq'anik cho reh.

¹⁷Eh wila' nareq taq chi riij taqe wili, eh xak'am taq naah rub'anariik, suq laj taq i naa awihiik.

¹⁸Re' hin ma' chawiij ta taq i hat chawunchelaal k'ahchi' nuq'oriik, ruum re' hin weht'al kiwach taqe i nusik'im cho kiwach. Xa re' la' koruman chi naa rojiik eloq wach i ruq'or pan santo laj huuj chi re' i jinaj i rub'an ruwa' wuuk' xsutinik chi ixowan nuwach.

¹⁹Re' taqe wili noq taq k'ahchi' nuq'orom aweh yu'naak, reh chi noq neenk'ularik nee taq inanimaj chi re' hin, i hin aj pan taxaaj.

²⁰Re' hin xti korik taq i nuq'or aweh chi awach ink'ulwik reh i nutaq'aaj reje i hin, re' wo' hin kiruk'ul ruuk', eh awach ink'ulwik wee hin, i ruk'ul wo' ruuk' awach i xtaaq'anik cho wee hin, inki Jesús.

²¹Eh noq ruq'orom chik taqe re' i Jesús, xchalik ruti'kiil i ránima, eh xti xuq'or i korik keh i raj tahqaneel chi je' wili: Re' hin xti korik taq i nuq'or aweh chi jinaj taq i wilik chaxilak i hat naa ruk'ayiniik weh chi ma' eht'alimaj.

²²Re' taqe i raj tahqaneel k'ul xkitz'ehtaaj panaq'kiwach, ruum ma' keht'al taj awach i ruq'or i Jesús.

²³Eh jinaj keh i raj tahqaneel i Jesús, re' i q'e' ruk'ax, wilik i koq chucheel nah mexa noq wi'k inki a'n ree xq'eq.

²⁴Eh re' Simón, Pedro i rukab' b'ih, xa ruuk' q'ab' xub'an reje rehtalil reh i raj tahqaneel i Jesús wilik i koq ruuk' chi chupahqaaj reh i Jesús awach i ruq'or.

²⁵Re' reh xujil i koq riib' ruuk' i Jesús, eh xupahqaaj reh chi je' wili: Jaaw, ¿awach aj wo' naa ruk'ayiniik aweh inaq'or? inki.

²⁶Re' Jesús je' wili i chaq'wik xub'an: Awach pa' aj eh neenuyeew tz'aqik laj kaxlanwi'k re' re' i nuq'or inki. Eh xut'aqsaj i kaxlanwi'k, xuyeew reh i Judas, re' rak'uun jinaj i winaq, Simón i b'ih.

²⁷Eh noq xuk'ul i kaxlanwi'k i Judas, jumehq'iil xokik i aj Yahm paránima. Eh je' wili i xq'orarik reh ruum i Jesús: Chib'ih jariik i k'ahchi' akapaam, cha a'n chi jumehq'iil inki.

²⁸Eh ma' jino'q keh i wi'k inki a'n nah mexa xkireq chi riij chib'ih reet noq xq'orarik ree Judas chi je' re' ruum i Jesús.

²⁹Ruum chi ruuk' i Judas wilik i koxtaal ree tumiin, wilik i raj tahqaneel xikapeb'inik reh chi re' Jesús chi xuq'or ree Judas chi naa ruloq'om i chib'ih jariik i naa rukamaniik keh ree ninq'iij. Eh chi naa rusihim chib'ih keh i neb'aa'.

³⁰Eh noq xuk'ul i kaxlanwi'k i Judas, xelik reje ruuk' i Jesús. Eh chaq'ab' chik xelik reje ar.

³¹Eh elinaq-oq chik reje ar i Judas, re' Jesús je' wili xuq'or: Yu'naak xye'arik chik i nuloq'il i hin, Ak'uunb'ees nuwii' winaq, eh wuum hin xye'arik ruloq'il i Dios.

³²Wila' wuum i hin inye'arik ruloq'il i Dios, naa wo' ruye'em nuloq'il i Dios i hin, Ak'uunb'ees Dios, eh re' wili naa rub'anam chi jumehq'iil.

³³Hat taq kok' wak'uun, re' hin i ach ma' najt taq naa nuwihiik awuuk'. Eh nik' wach i xnuq'or keh i aj Judío je' wo' re' i nuq'or taq aweh i hat, naa naq taq chik kinasik'im ma' naa ta taq chik kiin areqem, ruum ma' naa ta pee taq a'nam i ponik aha' naa wojiik i hin.

³⁴Re' hin i nuq'or taq aweh i jinaj i ak' k'uhb'aal wili, re' chi k'ul taq cha k'ax awiib' chawach. Nik' wach noq ti nuk'ax taq i hin, je' wo' re' inchol taq a'nam i hat k'ul taq cha k'ax awiib' chawach.

³⁵Eh wila' k'ul taq xak'ax awiib' chawach, chu'nchel i tinamit naa kikojom rehtaal chi hat taq waj tahqaneel, inki Jesús.

³⁶Eh re' Simón, Pedro i rukab' b'ih, xupahqaaj ree Jesús chi je' wili: Jaaw, ¿aha' naa awojiik inaq'or? inki. Re' Jesús je' wili xuq'or: Re' hat ma' nee ta pee tiooj chi wiij yu'naak aha' naa wojiik wii' i hin koq'uun la' naa awojiik wih-oq wuuk' ar, inki.

³⁷Re' i Pedro je' wili i xuq'or ree Jesús: Jaaw, ¿chib'ih reet noq ma' nee ta nub'an ojik chawiij yu'naak? Re' hin nuchopom nuk'ux chi neenuyeew wiib' chi kimik chawiij inki.

³⁸Re' Jesús je' wili i xuq'or reh: Korik re' hat xaq'or chi naa aye'em awiib' pankimik chi wiij. Xa re' la' re' hin xti korik i nuq'or aweh chi chupaam aq'ab' yu'naak noq komajaa' inoq'ik imaas, ox pech naa aq'orom chi ma' aweht'al ta nuwach, inki.