Read Poqomchi Juan 14 Bible Online

Juan 14 - Poqomchi bible

Juan 14

¹Re' Jesús je' wili xuq'or: Maatib'isaj taq awánima. Chanimaj taq i Dios, eh kinanimaj wo' taq i hin.

²Parupaat i waJaaw ma' k'isiin i ye'aab' wilik. Wi ta ma' je' re', ma' xnuq'or ta naq taq aweh chi naa rojiik nuyejaam jinaj taq aaye'aab'.

³Eh noq nuyejaam chik taq chaloq aaye'aab', naa wo' chik nuchaliik ruka'peech, naa taq kaat nuk'amam johtoq chi wiij. Reh chi aha' naa nuwihiik hin ar wo' taq naa awihiik i hat.

⁴Re' taq i hat aweht'al taq chik aha' kinooj, aweht'al taq i b'eeh, inki Jesús.

⁵Re' Tomas je' wili i xuq'or reh: Jaaw, re' hoj ma' qeht'al taj aha' naa awojiik Eh ¿nik' wach noq neenqanab'eej i b'eeh? inki.

⁶Eh re' Jesús je' wili i xuq'or reh: Re' hin i b'eeh, re' hin i korik, re' hin i k'acharik, xa wuum i hin naa rub'aan ponik ruuk' i waJaaw wilik pan taxaaj.

⁷Wila' aweht'al taq nuwach i hin, naa wo' taq anab'eem wach i waJaaw. Eh k'ahchi' wo' taq anab'eem wach yu'naak, ruum xawilow taq chik wach, inki.

⁸Eh re' Felipe je' wili i xuq'or ree Jesús: Jaaw, cha k'uhtaaj qeh aaWaJaaw ruuk' i re', neench'iklojik qak'ux, inki.

⁹Eh re' Jesús je' wili xuq'or reh: Felipe, re' hin najtir inutoq'aa' wihik taq chaxilak ¿Mi xakomajaa' inanab'eej nuwach re'? Awach inilwik nuwach i hin, i rilow wo' wach i waJaaw. ¿Chib'ih reet noq inapahqaaj weh chi naa nuk'uhtaam taq aweh i waJaaw?

¹⁰¿Mi ma' nanimaj re' hat chi re' hin wilik wuuk' i waJaaw, eh wilkiin wo' ruuk' i reh? Re' taqe i xa chib'ih jariik i nuq'or taq aweh i hat, ma' xata panuk'ux inchalik re' la' i waJaaw wilik wuuk' i rub'an chee rukamaj wuuk'.

¹¹Re' taq i hat inchol taq animam chi re' hin wilkiin ruuk' i waJaaw, chi re' waJaaw wilik wuuk' i hin. Eh wi ma' xanimaj taq chi je' re', xa re' ta naq taqe i nub'an nee taq inanimaj.

¹²Re' hin xti korik taq i nuq'or aweh chi awach i nimanik weh i hin, nee wo' rub'an i kamanik i nub'an i hin. Eh ma' xata re' re' neerub'an ko ma' k'isiin la' taqe i nimaq wach ma' ilooj taj neerub'an, ruum re' hin naa wo' chik wojiik ruuk' i waJaaw.

¹³Eh chu'nchel taq inawaaj apahqaam ree waJaaw panub'ihnaal, re' hin nee taq i nuyeew aweh, reh chi wuum i hin, Ak'uunb'ees Dios neenye'arik ruloq'il i waJaaw.

¹⁴Eh xa chib'ih pa' jariik taq i neenapahqaaj weh, nee taq i nuyeew aweh, inki Jesús.

¹⁵Wila' korik chi kinak'ax taq chamol taq panawánima i nuk'uhb'aal.

¹⁶Re' hin naa nupahqaam reh i waJaaw chi naa rutaq'aam chaloq jinaj chik i To'ool taq aweh, reh chi naa ruwihiik taq awuuk' chi juneliik,

¹⁷re' i Santolaj Uxlab'al ink'uhtanik reh i korik. Re' taqe i tinamit yiib' wach i kina'ojb'al ma' naa ta kik'ulum kuuk', ruum ma' nkilow ta wach ni xata keht'al wach. Eh re' taq i hat aweht'al taq chik wach, ruum wilik taq chaxilak eh naa ruwihiik taq panawánima chi juneliik.

¹⁸Re' hin ma' naa ta taq kaat nukanaam chi jumpech naa la' wo' chik nusutiniik chaloq taq awuuk'.

¹⁹Eh re' i tinamit yiib' wach i kina'ojb'al ilook' inkimay rilariik nuwach. Eh re' taq i hat naa wo' chik taq awilom nuwach, naa taq aak'achariik chi juneliik, ruum re' hin naa nuk'achariik chi juneliik.

²⁰Eh chupaam i q'iij re' re', re' taq i hat naa taq anab'eem chi re' hin wilkiin ruuk' i waJaaw pan jinaj wach k'uxliis, eh chi re' taq i hat wilkaat taq wuuk' i hin, je' wo' hin wilkiin wo' taq awuuk'.

²¹Awach i ruk'ul paránima taqe i nuk'uhb'aal, eh i runimaj re' re' korik chi kiruk'ax. Eh naa wo' ruk'axariik ruum i waJaaw awach ink'axwik wee hin. Eh naa wo' nuk'axam i hin, naa wo' nuk'uhtaam wiib' reh, inki.

²²Eh re' i Judas, ma' re' taj i Iscariote, xupahqaaj ree Jesús chi je' wili: Jaaw, ¿chib'ih reet noq xa qeh i hoj naa ak'uhtaam awiib', eh ma' naa ta ak'uhtaam awiib' keh i tinamit? inki.

²³Re' Jesús je' wili xuq'or reh: Awach i kiruk'ax, i rumol paránima i nuk'uhb'aal. Re' re' naa ruk'axariik ruum i waJaaw, eh re' hin, re' i waJaaw naa qachaliik chi patinik paránima.

²⁴Eh awach i ma' kiruk'ax taj, ma' rumol ta paránima i nuk'uhb'aal. Re' i k'ahchi' nuq'orom taq aweh, ma' xata nuk'uhb'aal i hin chi wib'il wiib' ruk'uhb'aal la' waJaaw i xtaaq'anik cho weh.

²⁵Re' hin nuq'or taq aweh chu'nchel i wili, ruum ko wilkiin taq awuuk'.

²⁶Eh re' i Santolaj Uxlab'al i ye'el rusuqkiil taq ak'ux naa rutaq'aam chaloq panub'ihnaal i waJaaw, naa wo' chik ruk'uhtaam taq aweh chu'nchel i re' reh chi naa ruk'uliik taq panak'ux chu'nchel i nuq'or taq aweh wili.

²⁷Re' hin naa taq nukanaam aweh i suq kiil k'uxliis. Naa taq nukanaam aweh i suq kiil k'uxliis, ma' je' ta rukab' i suq kiil k'uxliis i ruyeew i wach ak'al. Maatib'isaj taq ak'ux, mat yo'jik taq.

²⁸Eh xab'iraj taq chik chi re' hin naa wo' chik wojiik ruuk' i waJaaw, chi naa wo' chik nuchaliik taq awuuk'. Wita korik chi kinak'ax taq, insuuqb'ik naq taq ak'ux noq xab'iraj taq chi naa wo' chik wojiik ruuk' i waJaaw, ruum re' reh q'e' wilik rajaawriik chi nuwach i hin.

²⁹Re' hin, noq k'ahchi' nuq'orom taq aweh taqe i wili, reh chi naa taq animam na' k'ularoq.

³⁰Re' hin ach ma' najt taq naa nuq'oriik awuuk', ruum xk'ulik chik iloq intaaq'anik chikinaah i tinamit yiib' wach i kina'ojb'al, ro'q ta ma' xta rajaawriik chi nunaah i hin.

³¹Re' taqe re' naa ruk'ulariik reh chi chu'nchel i tinamit naakeht'aliim i chi korik chi nuk'ax i waJaaw, eh chi xa re' wo' nub'an i ruq'or cho weh i reh. Yu'naak taq taq, qoh eloq reje ayu' inki Jesús