Read Poqomchi Juan 15 Bible Online

Juan 15 - Poqomchi bible

Juan 15

¹Re' Jesús je' wili xuq'or: Re' hin i je' ruche'el i xti korik laj uuva. Eh re' waJaaw i meswik wach.

²Eh re' i je' q'ab' i ruche'el i uva ma' kiwachinik taj, re' reh naa ruyok'wiik iloq reh. Eh wila' kiwachinik, i ruyok' taqe iloq i chiqiij chi kixilak, re' raaj i reh chi kiwachiniik chi korik.

³Re' taq i hat yu'naak saq taq chik wach awánima ruum i nuk'uhb'aal xnuq'or taq aweh.

⁴Re' taq i hat tiwih-oq taq wuuk', je' wo' hin nee i kinwihik taq awuuk'. Re' q'ab' i ruche'el i uuva noq ma' ruchopom ta i koq riib' ruuk' i runimaal, ma' nee ta inwachinik. Je' wo' re' taq i hat ma' jaruuj wo' taq nee tiwachinik wila' ma' wilkaat taq wuuk'.

⁵Re' hin i je' ruche'el i uuva, eh re' taq i hat je' taq hat q'ab' noq wilkaat. Awach i wilik wuuk' i hin, wilkiin wo' ruuk' i reh, re' re' ma' k'isiin ta naa ruwachiniik. Eh wila' ma' wilkiin taq awuuk', ma' xta taq i neena a'n rub'aan.

⁶Awach i xukanaa' i wihik wuuk' naa rehtesjiik reje wuuk'. Naa ruk'ulum reh i je' rukab' i ruk'ul i q'ab' chee' ma' wachinik taj inyok'arik, inkutarik reje wulu', eh inchiqik inkutarik wach q'aaq'.

⁷Wila' re' taq i hat wilkaat taq wuuk', wila' xachop taq ak'ux chub'anariik taqe i nuk'uhtaaj taq aweh, nee taq inye'arik aweh xa chib'ih pa' jariik i nee taq inapahqaaj panatiij.

⁸Re' waJaaw inye'arik ruloq'il noq re' taq i hat tiwachinik taq chi korik chi je' re', naa taq akahniik chi hat manlik waj tahqaneel.

⁹Re' hin q'e' taq ti nuk'ax i hat, je' rukab' nuk'axariik i rub'an i waJaaw i hin. Eh eliik taq wih-oq awuuk' i k'axooj re' re', je' rukab' taq ak'axariik i nub'an i hin.

¹⁰Je' re' noq, wila' nanimaj taq chi korik taqe i nuk'uhb'aal, ma' naa ta nukanaam taq ak'axariik. Je' rukab' i nub'an i hin, i nunimaj chi korik i ruk'uhb'aal i waJaaw, eh re' reh ma' rukanaam ta nuk'axariik.

¹¹Re' hin i nuq'or taq aweh taqe wili, reh chi neen wihik taq awuuk' i suq kiil k'uxliis i nuyeew i hin, eh neemanlojik wach i rusuqkiil taq ak'ux.

¹²Re' wili i nuk'uhb'aal i nuq'or taq aweh: K'ul taq cha k'ax awiib' chawach, je' rukab' taq ak'axariik i nub'an i hin.

¹³Re' i k'axaj iib' q'e' nim wach neen wihik ruuk' jino'q, re' chi nee ruyeew riib' chi kimik chikiij taqe i ramigo.

¹⁴Re' taq i hat, nee taq ti kahnik chi hat taq wamigo, wila' xa a'n taq i nuq'or taq aweh i hin.

¹⁵Re' taq i hat, ma' nee ta chik taq tinukoj chi xa hat numoso, ruum re' i xa móso ma' reht'al taj chib'ih i rub'an i rupatroon naa la' taq kaat nukojom chi wamigo, ruum xnuyeew taq chik aweh chi naab'jik chu'nchel i ruq'orom cho weh i waJaaw.

¹⁶Ma' re' ta taq i hat xatsik'wik cho nuwach i hin, re' la' hin xin sik'wik taq chaawach i hat. Eh xat nutaq'aaj taq reje chi naa taq ak'uhtaam chi tiwachinik taq. Reh chi re' waJaaw nee taq i ruyeew chaaweh chib'ih jariik i nee taq inapahqaaj reh panub'ihnaal i hin.

¹⁷Re' taqe wili i nuq'or taq aweh chi k'ul taq naa ak'axam awiib' chawach, inki Jesús.

¹⁸Re' Jesús je' wili i xuq'or: Wila' xkixowaaj taq awach i hat taqe i tinamit, chanab'eej taq chi peet i hin xkixowaaj nuwach.

¹⁹Eh eliik ta taq wach kuuk' i yiib' wach kina'ojb'al, tikik'ax naq taq. Raaj i wili, re' hin xnusik' taq chaawach chi kixilak i tinamit re' re'. Ruum aj re' inkixowaaj taq awach i hat, ruum ma' eliik ta taq wach ana'ojb'al kuuk' i keh.

²⁰K'oloq taq panak'ux i nuq'orom taq chaaweh chi ma' jino'q i xa móso neeruq'at wach i rupatroon. Je' re' noq, wila' kianam k'axik wee hin, naa wo' kianam k'axik taq aweh i hat. Eh wila' kinimam i nuk'uhb'aal i hin, naa wo' kinimam i nuk'uhb'aal taq naa aq'orom i hat.

²¹Chu'nchel i wili naa taq kianam aweh ruum i nunimjiik, ruum ma' keht'al ta wach awach i xtaaq'anik cho weh i hin.

²²Re' i tinamit ma' xta naq mahk neenkahnik chikinaah wi ta ma' xin chalik chuq'orariik keh i ko'lemb'al iib'. Eh yu'naak ma' nee ta chik inkuyarik i kimahk ruum xkib'iraj chik.

²³Awach inkixowaaj nuwach i hin, iraaj ruq'orom chi nkixowaaj wo' wach i waJaaw.

²⁴Eh ma' xta naq i mahk neenkahnik wi ta ma' xnub'an cho chi kixilak i ma' ilooj taj ma' awach ta imb'anik reh. Eh re' keh atoob' ta xkilow wo' naq taqe i xnub'an, xa konkixowaaj wo' nuwach i hin, je' wo' i waJaaw.

²⁵Eh ruuk' wili k'ahchi' rojiik eloq wach kuuk' i tz'ihb'amaj cho chupaam i k'uhb'aal inkinimaj i keh, re' i ruq'or chi wiij chi je' wili: Naakixowaam wach chi xama' xta rub'ehel, inki.

²⁶Eh na' k'oloq i Santolaj Uxlab'al ye'el taq rusuqkiil ak'ux ink'uhtanik reh i korik, to'ool taq aweh, re' i naa nutaq'aam chaloq i hin parub'ihnaal i waJaaw, re' reh naa ruq'oriik i korik chi wiij i hin.

²⁷Je' wo' taq i hat naa taq aq'orom i korik chi wiij, ruum xanoq wo' pampeet xatoq'aa' taq cho wihik wuuk'.