Read Poqomchi Juan 17 Bible Online

Juan 17 - Poqomchi bible

Juan 17

¹Ruq'orom-oq chik taqe re' i Jesús, xtz'ehtanik johtoq pan taxaaj, je' wili i xuq'or parutiij: WaJaaw, yu'naak xponik chik i q'iij. Chayeew cho nuloq'il i hin, i hin Awak'uun, reh chi nee wo' i nuyeew aloq'il i hat,

²ruum aye'em wajaawriik chikinaah chu'nchel i tinamit, reh chi naa nuye'em keh i juneliik k'acharik awach taqe i xayeew weh.

³Re' taqe wili inye'wik i juneliik k'acharik: Re' chi naa kinab'eem awach i hat, chi hat i jinaj chi Dios, korik wach ak'ux, eh chi neenkinab'eej nuwach i hin, chi re' hin i Jesucristo, i xinataq'aaj chaloq.

⁴Re' i hin nuk'uhtaam chik aloq'il ayu' wach ak'al, ruum nukohlaam chik rub'aan i xaq'or cho weh chi naa nub'anam.

⁵Yu'naak aj re', waJaaw, inwaaj wo' chik chi nee nayeew weh i nuloq'il ar awuuk', je' rukab' i nuloq'il wilik pampeet noq komajaa' inatz'uhkrisaj chaloq i wach ak'al.

⁶Eh re' taqe i xasik' cho kiwach chi kixilak i tinamit i xayeew taqe weh, xnuyeew chik keh chi naab'jik awach i hat. Re' taqe re', aweh naq taqe, eh xayeew taqe weh, yu'naak xkinimaj chik aq'oral.

⁷Eh keht'al chik chi chu'nchel i xayeew weh, awuuk' wo' hat inchalik,

⁸ruum xnuq'or chik keh aak'uhb'aal aye'em wee hin, re' keh xkinimaj chik. Eh xkikoj wo' chik rehtaal chi re' hin xti korik chi awuuk' kinchalik xkinimaj chi re' hat xat-taaq'anik cho weh.

⁹Re' hin ma' i nupahqaaj ta aweh chi neenatoob'eej taqe i yiib' wach i kina'ojb'al. Chikiij la' taqe i xayeew weh i nupahqaaj otob'il aweh, ruum aweh wo' taqe.

¹⁰Chu'nchel i weh i hin, aweh wo' i hat, eh re' taqe aweh i hat, wee hin wo' hin. Eh re' i nuloq'il, kuuk' i keh ink'utinik.

¹¹Re' hin ma' naa ta chik nuwihiik ayu' wach ak'al. Eh re' keh naa kikahniik wach ak'al, re' hin naa wojiik awuuk'. WaJaaw, wilik aSantohiil chacha'jeej taqe ruuk' i awajaawriik taqe aye'em weh, reh chi xa jinaj chik kiwach je' rukab' i hoj awuuk' i hat xa jinaj qawach.

¹²Eh nik' najtiil xnub'an kuuk' i hin ayu' wach ak'al taqe aye'em weh, xnucha'jeej taqe ruuk' i runimaal awajaawriik. Ma' awach ta chik jino'q i xq'ehb'ik. Xa re' wo' i jinaj xuq'eb' riib' pampeet, reh chi ruuk' i reh xooj eloq wach i tz'ihb'amaj chaloq pan santo laj huuj.

¹³Eh yu'naak xa ojik chik weh awuuk'. Re' taqe wili nuq'or noq ko wilkiin wach ak'al, reh chi re' taqe i aye'em weh neenkireq chi manlik i suq kiil k'uxliis i nuyeew i hin.

¹⁴Re' hin xnuq'or chik keh aq'oral. Xa re' la' inixowjik kiwach kuum i tinamit, ruum re' keh ma' je' ta kikab' taqe re', eh ni xata re' hin je' nukab' taqe i tinamit re' re'.

¹⁵Ma' k'ahchi' ta nupahqaam aweh chi nee taqe nawesaj wach ak'al. K'ahchi' la' nupahqaam aweh chi chako'leej taqe chuwach i aj Yahm.

¹⁶Re' keh ma' je' ta kikab' i tinamit re' re' eh ni xata re' hin je' nukab' taqe i re'.

¹⁷Chayeew cho kisantohiil ruuk' aq'oral, ruum re' aq'oral korik.

¹⁸Eh nik' wach noq xinataq'aaj chaloq i hin chi taqarik ayu' wach ak'al je' wo' re' noq i nutaq'aaj taqe keh chi taqarik chi kixilak i tinamit.

¹⁹Eh kuum i keh, inusantoheej wiib' i hin, reh chi re' keh neen ki santoheej kiib ruuk' i korik.

²⁰Ma' xata chikiij taqe aye'em weh i nupahqaaj awotob'il. Inupahqaaj la' wo' chikiij i naakinimaniik weh koq'uun noq naa kib'iram aq'oral naa kiq'orom i keh.

²¹Reh chi, chi kunchelaal nee kiwihik pan jinaj wach k'uxliis, je' rukab' noq wilkaat i hat wuuk' i hin wilkooj pan jinaj wach k'uxliis. Reh chi neenkinimaj i tinamit chi re' hat xataaq'anik cho weh.

²²Re' hin xnuyeew chik keh i loq'il je' rukab' i xayeew weh i hat, reh chi xa jinaj chik wach kik'ux, je' rukab' noq wilkiin i hin awuuk' i hat xa jinaj wach qak'ux.

²³Reh chi neekinwihik i hin kuuk' i keh, eh wilkaat wo' wuuk' i hat, reh chi neenkian jinaj wach kik'ux chi manlik. Reh chi neenkikoj rehtaal i tinamit chi re' hat xataaq'anik cho weh, eh chi q'e' taqe nak'ax i aye'em weh, je' rukab' i nuk'axariik i hin i na a'n.

²⁴WaJaaw, re' hat xat ye'wik taqe weh. Ruum aj re', inwaaj i hin chi naa kiwihiik ar aha' naa nuwihiik wii' i hin, reh chi neenkilow wach i nuloq'il, re' i loq'il aye'em weh i hat, ruum re' hat xa kinak'ax wo' chaloq pampeet noq komajaa' inatz'uhkrisaj i wach ak'al.

²⁵WaJaaw, korik wach ak'ux, re' i tinamit ma' keht'al taa wach. Re' hin ra'j weht'al awach re'. Eh re' taqe i xayeew weh keht'al chik chi re' hat xataaq'anik cho weh ayu' wach ak'al.

²⁶Eh nuye'em keh chi naab'jik awach i hat. Ma' naa ta nukanaam rub'aan, reh chi neen wihik kuuk' i k'axooj je' rukab' i nuk'axariik i na a'n i hat, reh chi nee kinwihik kuuk' i keh, inki Jesús parutiij.