Read Poqomchi Juan 19 Bible Online

Juan 19 - Poqomchi bible

Juan 19

¹Eh noq xrib'iraj chi je' re' i Pilato, xutaq'aaj rutz'uhumjiik i Jesús.

²Re' taqe i soldado xkijitz' jinaj i corona k'iix, xkikoj wach naah i Jesús, eh xkikoj chi riij jinaj itz'ihy q'eqjutik ru kaqiil.

³Eh je' wili i xkiq'or reh: Atoob' reh i kireey i aj judío maje' inki taqe reh. Eh k'ih pech xkisak' i koq i panaq'wach.

⁴Re' i Pilato xelik wo' chik cho rij paat je' wili i xuq'or keh i aj judío: Chawilow taq re' winaq wili xnuk'am wo' chik taq cho chawach, reh chi nee taq inawil chi ma' xta ru mahk xnureq, inki.

⁵Xelik cho ar i Jesús, wilik chik i k'ix corona wach naah, eh wilik chi riij itz'ihy q'eqjutik ru kaqiil. Eh je' wili i xq'orarik keh ruum i Pilato: Re' re' taq chawach i winaq xak'am taq cho weh inki.

⁶Eh noq xkilow wach i Jesús taqe i kajaaw k'amal kib'eeh aj tiij, taqe i kicha'jinik reh i rupaat i Dios, je' wili i xkiq'or: Chakoj wach kuruus, Chakoj wach kuruus inki taqe. Re' Pilato je' wili i xuq'or: Chak'am taq reje, chayeew taq wach kuruus i hat, ruum re' hin ma' xta ru mahk xnureq, inki.

⁷Re' taqe i aj judío je' wili i ruchaq'weesjiik xkian: Re' hoj wilik jinaj i k'uhb'aal inqanimaj, i ruq'or chi re' winaq wili i ruk'ul chi naa rukanteesjiik, ruum xukoj riib' chi Rak'uun i Dios, inki.

⁸Noq xrib'iraj chi je' re' i Pilato, xokik ruman i ruyo'jiik.

⁹Eh xuk'am wo' chik i koq i Jesús. Chupaam i paat intaaq'anik wii' xupahqaaj reh ar chi je' wili: ¿Aha' aj wo' ti chalik i hat? inki reh. Re' Jesús ma' jino'q chi q'orik xchaq'wik.

¹⁰Re' i Pilato je' wili i xuq'or reh i Jesús: ¿Chib'ih reet noq ma' kinachaq'weej taj? ¿Mi ma' aweht'al re' hat chi wilik wajaawriik reh aakojariik wach kuruus, eh wilik wo' wajaawriik reh awoq'tesjiik reje? inki.

¹¹Re' Jesús je' wili ruchaq'weesjiik xub'an: Ma' xta naq k'isinoq awajaawriik chi nunaah ma' ta ruye'em cha wajaawriik i Dios. Ruum aj re', awach i xq'asanik weh panaq'ab', xiik' naah i ru mahk i reh chawach i hat, inki.

¹²Eh chupaam i jumehq' re' re', re' Pilato xraaj naq roq'taam i Jesús. Eh re' taqe i aj judío kow xkiq'or chi je' wili: Wila' xawoq'taaj reje i winaq re' re', neetikahnik chi ma' hat ta chik ramigo i ajaab'ees aj Roma, ruum awach i rukoj riib' chi reey inkahnik chi raj ixowaal i ajaab'ees aj Roma inki taqe.

¹³Eh noq xrib'iraj chi je' re' i Pilato, xuq'or chi naa rehtesjiik cho ar i Jesús, eh jumehq'iil wo' chik xutzunaa' riib' i reh aha' i rub'an wii' i q'ataj q'orik, Tusuj ab'aj rub'ihnaal, eh pan hebreo Gabata.

¹⁴Eh je' naa kab'lajora i q'iij, noq ach je' ne'eel neenb'aan okik chupaam i runinq'ijiik i elik chaloq Egipto, re' Pilato je' wili i xuq'or keh i aj judío: Re' re' taq aareey, inki keh.

¹⁵Eh re' keh kow xkiq'or chi je' wili: Chakansaj la'. Chakoj wach kuruus inki taqe. Re' Pilato je' wili i xuq'or keh: ¿Mi ruk'ul taq cha weh re' chi neenukoj wach kuruus taq aareey? inki. Re' keh je' wili i xuq'or: Re' hoj ma' xta chik jino'q qareey tokoom, xa re' wo' hoq ajaab'ees aj Roma inki taqe.

¹⁶Xrib'iraj chi je' re' i Pilato, xuq'asaj pan kiq'ab' i Jesús, reh chi re' naq i keh naakikojwiik wach kuruus. Eh re' keh xkik'am wo' reje i Jesús.

¹⁷Eh re' Jesús rutehlaam chik i rukuruus noq xelik reje ar. Xooj chupaam i Ye'aab' ruB'aqil Naah Camnaq rub'ihnaal, (eh Gólgota rub'ihnaal pan hebreo)

¹⁸Eh chupaam i ye'aab' re' re' xkikoj wach kuruus i Jesús. Xkikoj wo' wach kuruus i ki'ib' chi winaq, ju'jun pantaq rucheel.

¹⁹Eh re' i Pilato xutaq'aaj rukojariik jinaj i ehtalil wach kuruus chinaah johtoq i Jesús je' wili i ruq'or i tz'ihb'amaj chuwach: Re' wili Jesús aj Nazaret i kireey i aj Judío, inki.

²⁰Ma' k'isiin i aj judío xi ilwik wach chib'ih ruq'or i ehtalil re' re', ruum re' ye'aab' xkikoj wii' wach kuruus i Jesús ma' najt ta ruuk' i tinamit wilik. Re' i ehtalil re' re' tz'ihb'amaj pan hebreo, pan griego, pan latin.

²¹Xkilow chi je' re' i kajaaw i k'amal kib'eeh aj tiij, xkiq'or reh i Pilato chi je' wili: Maatz'ihb'aaj ar chi kireey i aj Judío: Chatz'ihb'aaj la' ar chi rukoj riib' chi kireey i aj Judío, inki taqe.

²²Eh re' Pilato je' wili i xuq'or: Aha' wilik i xnutz'ihb'aaj, xnutz'ihb'aaj chik. Ma' nee ta chik i rub'an chi neenuyoj wach, inki.

²³Eh noq kikojom chik wach kuruus i Jesús taqe i soldado, xkik'am chaloq i kijib' chi ruso' xkich'aq chikiwach ju'jun keh i xkik'am i soldado. Eh xkik'am wo' chaloq i rub'urb'aal Jesús, ma' xta b'ojb'al reh, xa jinaj rukemariik, xelik cho chi ralaq xponik ko chi rooq,

²⁴re' taqe i soldado je' wili xkiq'or chikiwach: Manqaxih i rub'urb'aal qaq'ijej pee riij awach pa' eh neenkahnik, inki taqe. Je' aj re' noq xooj eloq wach i tz'ihb'amaj chaloq pan santo laj huuj chi je' wili: Xkich'aq chikiwach i nuso', xkiq'ijej riij i nub'urb'aal, inki. Je' re' i xkian taqe i soldado.

²⁵Eh re' i María i rutuut i Jesús wilik i koq ruuk' i rukuruus. Eh wilik i koq ar ixoq ruchaaq' i rutuut i Jesús. Wilik i koq ar i María, re' i rehk'een i Cleofas. Eh wilik i koq ar i María aj Magdala.

²⁶Eh noq xrilow i Jesús chi wilik i koq ar i rutuut, eh chi wilik i koq ruuk' i rutuut i raj tahqaneel q'e' ruk'ax, je' wili i xuq'or reh i rutuut: Tuut, yu'naak re' re' i naa rukahniik chi awak'uun, inki reh.

²⁷Eh jumehq'iil xuq'or reh i raj tahqaneel q'e' ruk'ax chi je' wili: Re' re' i naa rukahniik chi atuut, inki reh. Re' i raj tahqaneel re' re' chi jumehq'iil xuk'am reje parupaat i rutuut i Jesús.

²⁸Eh chi riij i re', ruum chi reht'al chik i Jesús chi chu'nchel xooj eloq wach, eh chi xooj eloq wach i ruq'or i tz'ihb'amaj cho pan santo laj huuj, je' wili xuq'or noq wilik wach kuruus: Chiqiij nuchii', inki.

²⁹Eh jinaj i nimlaj xaro wilik ar, nujinaq chi ch'amlaj vino. Xkik'am chaloq i jinaj i potz potz paam yoob'en ha', xkimuhaa' chupaam i vino re' re', xkib'ak' chi ju' jinaj i q'ab' chee', xkiyeew johtoq chi chii' i Jesús.

³⁰Eh noq ruyob'em chik i ch'amlaj vino i Jesús, je' wili xuq'or: Yu'naak xooj chik eloq wach chu'nchel, inki. Eh chi riij i re', xuq'oyaa' chaloq i naah eh xkimik.

³¹Eh ruum chi ach je' ne'eel neenb'aan okik chupaam i hi'limb'al q'iij re' imb'aan wii' i runinq'ijiik i elik chaloq Egipto. Re' taqe i k'amal kib'eeh i aj judío ma' xkaaj taj chi xi kahnik wach kuruus ixib' re' re', ruum chi looq' keh i hi'limb'al q'iij. Ruum aj re', xkiq'or reh i Pilato chi chutaq'aaj rutoqariik i kituuq wilkeeb' wach kuruus, reh chi naa rehtesjiik cho ar i kiti'jolal.

³²Re' Pilato xutaq'aaj wo' taqe reje i soldado. Re' keh peet xkitoq kab'chel i rutuuq i winaq jinaj chi riij i re', xkitoq wo' chik kab'chel i rutuuq i jinaj, re' taqe i xikojarik wach kuruus pantaq rucheel i Jesús.

³³Eh noq xkijil i koq kiib' ruuk' i Jesús, noq xkilow kamnaq chik. Ruum i re', ma' xkitoq ta chik kab'chel i rutuuq.

³⁴Ma' re' ta nkiwii' chi kamnaq chik i Jesús, jinaj la' i soldado xhopwik reh i panjojol ruuk' q'as ju' ch'ihch'. Eh jumehq'iil xelik chaloq i kik' ruch'ihil ha'.

³⁵Re' ink'utjanik reh taqe wili, re' i jinaj i xti x-ilwik cho reh, eh xti korik i xuq'or. Eh reht'al chi korik i xuq'or, reh chi nee wo' taq inanimaj i hat.

³⁶Re' taqe wili xb'aan, reh chi xooj eloq wach i tz'ihb'amaj chaloq pan santo laj huuj, re' i ruq'or chi je' wili: Ma' naa ta kitoqom jino'q i rub'aqil, inki.

³⁷Eh wilik wo' chik i ruq'or wii' chi je' wili pan santo laj huuj: Re' i xkihopib'eej i ruti'jolal, naakilom i koq i panaq'wach, inki.

³⁸Eh chi riij i re' jinaj i winaq, José rub'ihnaal, aj Arimatea, raj tahqaneel i Jesús xponik rupahqaaj reh i Pilato chi nee ruk'am i ruti'jolal i Jesús, xa re' la' chi q'eeqmaal xub'an, ruum inyo'jik chikiwach i k'amal kib'eeh i aj judío. Re' i Pilato xuyeew wo' q'ab'. Eh re' José xuqasaj wach kuruus i ruti'jolal i Jesús, xuk'am reje.

³⁹Eh re' i Nicodemo, re' i poninaq cho q'o'rinoq reh i Jesús pan jinaj chaq'ab', xponik wo' haa' i reh. Xuk'am reje i k'isiin ma' jinaj kintaal chi ink'ohnik laj iq'oom mirra, ink'ohnik laj chee' ruyej-aal.

⁴⁰Eh re' José ruch'ihil i Nicodemo xkik'am reje i ruti'jolal i Jesús. Xkib'ot reje pan itz'ihy xkimuhaa' chupaam ink'ohnik laj iq'oom re' re', ruum je' re' i okrinaq taqe wii' i aj judío noq inkimuq'aa' i kikamnaaq.

⁴¹Eh aha' xkojarik wii' wach kuruus i Jesús ma' najt ta ar wilik i junseht chi tik chee'. Eh chupaam i tik chee' re' re', ko xk'otarik i koq jinaj i jul muq'umb'al kamnaq komajaa' ta awach imuhqik chupaam.

⁴²Eh chupaam i jul re' re', xkimuq'aa' i ruti'jolal i Jesús, ruum re' i jul re' re' xama' najt ta ar wilik, ruum chi xa k'isiin chik ma' kiokik chupaam i q'iij kihi'lik wii' i aj judío.