Read Poqomchi Juan 2 Bible Online

Juan 2 - Poqomchi bible

Juan 2

¹Eh ixib'-oq chik q'iij rub'aan taqe re', xb'aan jinaj i kaxáro pan tinamit Caná wilik paruyuq'ul i Galilea, eh wilik ar i rutuut i Jesús.

²Re' Jesús ruch'ihil taqe i raj tahqaneel xiyuq'ub'jik haa' chuninq'ijiik i kaxáro.

³Eh re' i rutuut i Jesús, je' wili i xuq'or: Wak'uun, xk'uhlik i riis ki uuva. ¿Ma' nee ta naa rub'an chi neenatoob'eej taqe? inki.

⁴Re' Jesús je' wili i xuq'or: Tuut, ¿chib'ih reet noq inaq'or weh chi je' re'? Re' hin komajaa' ta imponik i ru orahiil chi naa nub'anam i nukamaj, inki.

⁵Eh re' i rutuut i Jesús je' wili i xuq'or keh i puhk inki a'n: Re' taq cha a'n chu'nchel i nee taq ruq'or aweh i Jesús, inki.

⁶Eh ar wilkeeb' i waqiib' chi nimaq ikom, ab'aj kiyej-aal, ye'aab' kihaa' i aj judío tz'ajb'al kiib' niimb'al reh i k'uhb'aal. Re' taqe nimaq taq ikom re' re', je' naa ox ox ikom chi ha' paam i ju'jun.

⁷Re' Jesús je' wili i xuq'or keh i puhk inki a'n: Chanujisaj taq chi ha' taqe ikom wili, inki. Re' keh xkinujisaj wo' chi korik taqe ikom.

⁸Eh re' i Jesús xusutej chi riis uuva i ha', eh je' wili i xuq'or keh: Chalik taq reje i ha' re' re'. Chak'am taq reje reh inilwik reh i ninq'iij, inki. Re' taqe i aj puhk xkik'am wo' reje.

⁹Eh re' inilwik reh i ninq'iij xunik'eej i ha' xsutinik chi riis uuva, eh ma' reht'al taj aha' xchalik. Xa re' wo' taqe i aj puhk kieht'alinik reh aha' xponik kilik. Eh re' inilwik reh i ninq'iij xutaq'aaj ruk'amariik i b'ahiilb'ees,

¹⁰je' wili i xuq'or reh: Chu'nchel i winaq peet inkuk'ej i sik'oj wach riis uuva. Eh noq re' taqe i ulaa' k'ih chik i kuk'em, kora'j inkuk'ej re' i riis uuva ma' sik'ooj ta wach. Eh re' hat xamol peet i riis uuva sik'ooj wach, kore' pantz'apaab' wach reh i ninq'iij naa ruk'jiik, inki.

¹¹Eh re' xub'an re' re' i Jesús ar pan tinamit Caná wilik ar Galilea. Re' re' i peet ma' ilooj taj xuk'uhtaaj ruuk' i re' xuk'uhtaaj i ruloq'il. Eh re' taqe i raj tahqaneel xkichop kik'ux chunimjiik i reh.

¹²Chi riij i re', re' Jesús xooj pan tinamit Capernaum ruch'ihil i rutuut, ruch'ihil taqe i ruchaaq', ruch'ihil taqe i raj tahqaneel. Ar xwihik chuwach i ki'ib' ixib' q'iij.

¹³Re' Jesús xooj Jerusaleem ruum xailook' chik i runinq'ijiik i elik chaloq Egipto.

¹⁴Eh noq xokik i koq i Jesús parupaat i QaJaaw, xureq taqe ar i k'ayen b'ooyax, i k'ayen tentzun, i k'ayen paloma. Eh tzunulkeeb' wo' nah kiméxa taqe i kich'aqwik wach tumiin.

¹⁵Re' i Jesús, xub'arkiij wach, rutz'uhuum. Ruuk' i re', xresaj taqe chaloq parupaat QaJaaw chu'nchel i aj k'aay kuch'ihil i kitentzuun, i kib'ooyax. Eh xutilej wach ak'al i kitumiin i kich'aqwik wach tumiin, xuk'ahwaaj reje wulu' i kiméxa.

¹⁶Eh je' wili i xuq'or keh i k'ayen paloma: Chawesaj taq reje ayu' chu'nchel i wili. Maayejaa' taq chi k'aayb'al i rupaat i waJaaw inki.

¹⁷Eh re' taqe i raj tahqaneel i Jesús, xk'ulik cho pankik'ux i tz'ihb'amaj cho pan santo laj huuj chi je' wili: WaJaaw nuDios, re' hin q'e' nuk'ax aapaat, inki.

¹⁸Eh re' taqe i aj judío je' wili i xkiq'or reh i Jesús: ¿Chib'ih jino'q i ma' ilooj taj neenak'uhtaaj qeh, reh chi neenqanimaj chi wilik awajaawriik chub'aan taqe re'? inki taqe.

¹⁹Re' Jesús je' wili i xuq'or keh: Chayoj aj taq re' hat i rupaat i QaJaaw wili. Eh re' hin xa chuwach ixib' q'iij nee wo' chik inwuksaj, inki.

²⁰Eh re' taqe i aj judío, je' wili xkiq'or reh: Re' rupaat i QaJaaw wili, waqiib' roxk'ahl haab' xkorjik wii'. Eh ¿nik' wach noq inaq'or i hat chi xa chuwach ixib' q'iij neenaawuksaj? inki taqe.

²¹Noq xq'orik chi riij i rupaat QaJaaw i Jesús, xak'ahchi' rujalwachem ruuk' i ruti'jolal i reh.

²²Eh noq xwuktik wo' chik chaloq i chi k'achlik wach, re' taqe i raj tahqaneel xk'ulik cho pankik'ux i ruq'orom i Jesús. Eh xkinimaj chi chi riij i reh inq'orik i tz'ihb'amaj cho pan santo laj huuj. Eh xkinimaj wo' hoq i ruq'orom i Jesús.

²³Noq wilik Jerusaleem i Jesús chupaam i runinq'ijiik i elik chaloq Egipto, ma' k'isiin i tinamit xkinimaj i Jesús, ruum xuk'uhtaaj keh i ma' ilooj taj ma' ha' ta chi je'.

²⁴Re' Jesús ma' ruum tee re' xuch'ikaa' ruk'ux kuuk', ruum reht'al i kánima chi kunchelaal taqe re'.

²⁵Eh ma' ruman taj chi awach ta xq'orik reh nik' wach noq wilkeeb' i tinamit, ruum re' reh reht'al chib'ih i wilik cho paránima i ju'jun.