Read Poqomchi Juan 3 Bible Online

Juan 3 - Poqomchi bible

Juan 3

¹Jinaj i winaq, Nicodemo rub'ihnaal, wihinaq chaloq aj fariseo, k'amal kib'eeh i aj judío.

²Eh re' reh xooj ruuk' i Jesús chaq'ab', je' wili xuq'or reh: Aj Tijineel, re' hoj qeht'al chi re' Dios xtaaq'anik chaaweh chi k'uhb'alinik, ruum ma' jino'q neemb'anik reh taqe i ma' ilooj taj i na a'n i hat wila' ma' chih i Dios ruuk', inki.

³Eh re' i Jesús je' wili i xuq'or: Re' hin xti korik i nuq'or aweh chi awach i ma' x-aasjik ruka'peech, ma' jaruuj naa rilom wach i runimaal i rajaawriik i Dios, inki.

⁴Eh re' i Nicodemo je' wili i xuq'or reh i Jesús: ¿Nik' wach noq nee wo' chik inaasjik ruka'peech i winaq noq rijib' chik? ¿Nee oon i rub'an re' chi nee wo' chik inokik ruuk' i rutuut, eh nee wo' chik inaasjik ruka'peech? inki.

⁵Re' Jesús je' wili i xuq'or reh: Re' hin xti korik i nuq'or aweh chi awach i ma' x-aasjik ruuk' ha', ruuk' i Santolaj Uxlab'al, ma' jaruuj naa rokiik pa runimaal rajaawriik i Dios.

⁶Re' inaasjik ruuk' irutuutrajaaw, xa ruti'jolal wo' riib'. Eh re' inaasjik ruuk' i Santolaj Uxlab'al, Uxlab'al wo' hoq.

⁷Mansahchik ak'ux ruuk' i nuq'or aweh wili chi ajwaal wach chi chu'nchel naa kaasjiik ruka'peech.

⁸Re' teew xa aha' inik'ik hupinoq. Eh nab'iraj wo' naq i choqik i rub'an, xa re' la' ma' aweht'al taj aha' nooj, aha' inchalik eh ma' nawil ta wo' wach. Je' wo' re' i ki-aasjik ruuk' i Santolaj Uxlab'al ma' nilarik ta wo' wach, inki Jesús.

⁹Eh re' i Nicodemo je' wili i xuq'or reh i Jesús: ¿Nik' wach noq wilik i re'? inki.

¹⁰Re' Jesús je' wili xuq'or: Re' hat, hat kaj tijoom i aj Israel, eh ¿nik' wach noq ma' nareq ta chi riij taqe i nuq'or wili?

¹¹Re' hin xti korik i nuq'or aweh chi re' hoj re' inqaq'or i qeht'al, eh hoj wo' q'orol rib'iral i qilom chaloq. Xa re' la', re' taq i hat ma' nanimaj ta wo' taq inqaq'or taq aweh.

¹²Eh wila' ma' nanimaj taq weh noq kinq'orik chi riij i xa na'ojb'al wach ak'al, ¿nik' wach noq nee taq inanimaj weh wila' xinq'orik chi riij i na'ojb'al reh pan taxaaj?

¹³Chakoj taq rehtaal chi ma' awach ta jino'q johtinaq pan taxaaj xa re' wo' hin Ak'uunb'ees Dios nuwii' winaq, xinqajik cho pan taxaaj.

¹⁴Eh nik' wach noq xujosaj i aaq' q'an ch'ihch' ruyej-aal chi ju' chee' i Moisés panchiq yuuq', je' wo' re' hin, Ak'uunb'ees nuwii' winaq ajwaal wach chi naa nujohteesjiik chi ju' i chee',

¹⁵reh chi chu'nchel i naakinimaniik weh, naakehchaam i juneliik k'acharik, inki Jesús.

¹⁶Re' Dios ma' k'isiin ta xuk'ax i tinamit wach ak'al. Ruum, xiruyeew chee hin chi kaj Ko'loom i hin Rak'uun jinaj chi wib'il wiib' chuwach, reh chi chu'nchel i naakinimaniik weh, ma' naa ta rusahchiik kiwach, naa la' ruwihiik kik'achariik chi juneliik.

¹⁷Re' Dios ma' xirutaq'aaj ta chaloq i hin Ak'uunb'ees ayu' wach ak'al chuye'ariik pantojb'al mahk i tinamit, xirutaq'aaj la' chaloq chi kikolob'jiik.

¹⁸Je' re' noq, awach i nimanik weh i hin Ak'uunb'ees Dios, ma' xta tojb'al mahk chinaah. Eh awach i ma' nimanik ta weh, ye'ooj chik i tojb'al mahk chinaah, ruum ma' kirunimaj taj i hin jinaj chi Ak'uunb'ees Dios.

¹⁹Eh ruum taqe yiib' wach inki a'n wilik chik i tojb'al mahk chikinaah. Ruum noq xk'ulik i Saqum ayu' wach ak'al, re' chik i q'equm q'e' xkaaj wach chuwach i Saqum, ruum yiib' wach i kina'ojb'al.

²⁰Chu'nchel i kib'anik reh yiib' wach na'ojb'al inkixowaaj wach i Saqum ma' nkijil ta i koq kiib' ruuk' i Saqum, re' inkaaj chi ma' nelik ta wach Saqum i kiyiib' wach na'ojb'al.

²¹Eh re' taqe i k'ahchi' keeb' i korik, inkijil i koq kiib' ruuk' i Saqum, reh chi neenk'utinik chi chu'nchel i kian, re' aha' wilik iraaj i Dios, inki Jesús.

²²Chi riij i re', re' Jesús ruch'ihil taqe i raj tahqaneel noq xiooj paruyuq'ul i Judea. Eh noq ruch'ihil taqe i raj tahqaneel ar i Jesús, najt xub'an i qasanik ha'.

²³Eh chupaam taqe i q'iij re' re', re' Juan xub'an i qasanik ha' ar Enón, ma' najt ta ruuk' i Salim, ruum ma' k'isiin i raasb'al ha' ar, Eh re' i tinamit kiooj k'oloq ruuk' i Juan i ruqasaj kihaa'.

²⁴Re' qasanik ha' wili re' xub'an i Juan noq komajaa' inkojarik pantz'ilom.

²⁵Eh wilik taqe i raj tahqaneel i Juan xkiwech'uj kiib' ruuk' jinaj i aj judío chi riij i saqb'isanik wachiis imb'aan niimb'al reh i k'uhb'aal.

²⁶Eh xiooj k'oloq ruuk' i Juan je' wili i xkiq'or reh: Qaj Tijineel, re' winaq xwihik cha wuuk' chi juntar i nim ha' Jordán, re' i xaq'or cho reh chib'ih rub'anam, k'ahchi' chi qasanik ha', eh chu'nchel i tinamit k'ahchi' kojiik chi riij, inki taqe.

²⁷Re' Juan je' wili i xuq'or keh: Re' i winaq ma' xtaj i neerub'an wila' ma' re' Dios pan taxaaj inye'wik cho rajaawriik.

²⁸Re' taq i hat xab'iraj taq ruuk' axikin noq xnuq'or chi ma' re' tee hin i Cristo, eh chi xa xinpa'ab'jik chaloq reh chi hin peet b'eeh chuwach chuq'orariik rib'iral i reh.

²⁹Eh noq imb'aan kaxáro, re' ehk'eenb'ees, re' i b'ahiilb'ees inehchanik reh. Re' i ramigo i b'ahiilb'ees insuuqb'ik ruk'ux noq irib'iraj chi q'orik i rub'an i b'ahiilb'ees. Je' wo' re' i rusuqkiil nuk'ux i hin yu'naak, ruum xmanlojik chik wach.

³⁰Re' Cristo, inchol chi neenjohtik i rajaawriik, eh re' hin, neenqajik i wajaawriik, inki Juan.

³¹Re' i xchalik pan taxaaj xiik' naah rajaawriik, eh wilik wo' rajaawriik chinaah chu'nchel i chib'ih jariik i wilik. Eh re' i aj wach ak'al, xa aj wach ak'al wo' hoq, chi riij wo' i wilkeeb' wach ak'al inq'orik.

³²Eh re' i aj pan taxaaj inq'orik chi riij taqe i rilom, i rib'iram chaloq. Xa re' la', ma' awach ta nimanik reh taqe i ruq'or.

³³Raaj awach i nimanik reh i ruq'oral, ruuk' i re' i rureq chi riij chi re' Dios xti korik i ruq'or.

³⁴Re' taaq'amaj cho ruum i Dios, re' wo' taqe i ruq'oral i Dios i ruq'or, ruum re' Dios ma' pajooj taj i Ruxlab'al i ruyeew chinaah.

³⁵Re' Ajaab'ees Dios i ruk'ax i Rak'uun, xuyeew rajaawriik chinaah taqe i xa chib'ih jariik wilik.

³⁶Eh awach i nimanik reh Ak'uunb'ees, wilik i ruk'achariik chi juneliik. Eh awach i ma' nimanik ta reh i Ak'uunb'ees, ma' xta ruk'achariik chi juneliik naa la' ruye'ariik pantojb'al mahk ruum i Dios.