Read Poqomchi Hech 1 Bible Online

Hech 1 - Poqomchi bible

Hech 1

¹Re' hin i Lucas, i nuq'or reje aweh i hat, Teófilo, chi chupaam i peet nuhuuj xnutz'ihb'aaj reje aweh, chu'nchel i xk'ulik rub'an, i xk'ulik ruk'uhtaaj i Jesús,

²korehtaal xk'amarik johtoq pan taxaaj. Noq komajaa' inooj, ruuk' i rajaawriik i Santolaj Uxlab'al, xuch'ob' rub'ehel keh i raj tahqaneel rusik'im cho kiwach chib'ih naa kia'nam.

³Eh kamnaq-oq chik i Jesús, xk'aach wo' chik chaloq. Eh chupaam i ka'winaq q'iij, xata wo' jarpech xuk'uhtaaj riib' keh i raj tahqaneel, reh chi xkinimaj chi korik chi xk'aach wo' chik chaloq. Eh xuq'or rub'ehel keh i runimaal i rajaawriik i Dios.

⁴Eh noq ko wilik i Jesús kuuk' i raj tahqaneel, je' wili xuq'or keh: Mat elik pee taq reje Jerusaleem. Chawuy-eej pee taq i ruk'uliik i Santolaj Uxlab'al i ruq'orom cho rib'iral taq aweh i waJaaw, re' wo' i nuq'orom taq weh i hin.

⁵Xti korik chi re' Juan xub'an chaloq i qasanik ha' xa ruuk' ha'. Raaj taq i hat xa pan ajlamaj q'iij inqajik taq ahaa' ruuk' i Santolaj Uxlab'al, inki.

⁶Eh re' taqe kimolom kiib' ruuk' i Jesús, xkipech'uj reh chi je' wili: Jaaw, ¿mi yu'naak i naa wo' chik akojom chi taaq'anik i tinamit Israel? inki taqe.

⁷Eh re' Jesús je' wili xuq'or keh: Re' taq i hat ma' ruk'ul ta chi nee taq inanab'eej chih q'ijil, eh nik' naa rub'anam i waJaaw taqe re'. Xa re' wo' reh reht'al jaruuj i rub'an i re'.

⁸Eh re' taq i hat naa ak'ulum awajaawriik noq naa ruqajiik taq cho cha naah i Santolaj Uxlab'al. Eh ayu' Jerusaleem taq naa atoq'aam reje ruq'orariik i korik chi wiij, naa taq aq'orom Judea, je' wo' Samaria, korehtaal taq inaq'or chi junsuut i wach ak'al, inki.

⁹Ruq'orom-oq chik i Jesús taqe re', xk'amarik johtoq pan taxaaj chikiwach i raj tahqaneel. Eh xa nkilow chik noq johtik i rub'an, xk'ulik b'uuraroq wach ruum i junsahl chi suutz', insachiwanik chikiwach.

¹⁰Kok'ahchi' wo' johtoq keeb' chutz'ehtjiik i Jesús noq johtik i rub'an pan taxaaj. Eh noq xkilow, pa'alkeeb' chik i koq ma' najt ta kuuk' i ki'ib' chi winaq saq saq i kiso'.

¹¹Eh je' wili i xq'orarik keh: Hat taq winaq aj Galilea, ¿chib'ih reet noq ma' namay taq johtoq tz'eht pan taxaaj? Re' Jesús, i xk'amarik johtoq taq chawach, re' wo' chik i reh naa ruqajiik chaloq, nik' wach noq xjohtik pan taxaaj, je' wo' chik re' na' qajoq chaloq, inki taqe.

¹²Chi riij i re', re' taqe i raj tahqaneel i Jesús xi elik wo' chik reje chinaah i yuuq', olivo xiooj wo' chik Jerusaleem. Re' yuuq' re' re' ma' najt ta ruuk' i Jerusaleem, xa je' najtiil inkib'ehuj pantaq hi'limb'al q'iij.

¹³Eh noq xi ponik Jerusaleem, xijohtik chinaah i ka'ch'iht paat i wilik wii' kipatal, i je' wili kib'ihnaal: Pedro, Juan, Jacobo, Andres, Felipe, Tomas, Bartolome, Mateo Jacobo i rak'uun i Alfeo, Simón i kikomoon taqe aj Canaán, eh re' Judas, i ruchaaq' i Jacobo.

¹⁴Chu'nchel i re' eliik inkimol kiib' jinaj wach kik'ux chub'aan i kitiij kuch'ihil taqe i ruchaaq' i Jesús kuch'ihil taqe ixoq junch'uq, kuch'ihil i María re' rutuut i Jesús.

¹⁵Chupaam taqe i q'iij re' re', xkimol kiib' i aj nimaneel wilkeeb' naa jino'q siento ruuk' juninaq, eh re' Pedro xpa'lojik johtoq chi kixilak, je' wili i xuq'or keh:

¹⁶Hat taq nuhermano, xti ajwaal wach chi xooj eloq wach i tz'ihb'amaj cho pan santo laj huuj, re' i ruq'orom i Santolaj Uxlab'al ruuk' chii' i reey David, chi re' i Judas xk'amwik kib'eeh taqe i xichopwik reh i Jesús.

¹⁷Re' Judas re' re' quch aj tahqaneel wo' naq, eh re' wo' naq haa' chi kamanik chi qaxilak.

¹⁸Xa re' la', re' reh, ruuk' i tumiin xkiyeew reh chi riij i yeb'ee wach na'ojb'al xub'an, xuloq' jinaj i ye'aab'. Eh xukut cho riib' pan tik nah xuk'er i paam, xch'a'lojik cho wach saqum chu'nchel i req'saa'.

¹⁹Eh re' i xuk'ul i Judas, jumehq'iil xkinab'eej patineel wilkeeb' Jerusaleem. Ruum i re', xkikoj rub'ihnaal i ye'aab' re' re' chi Acéldama pan kiq'oral i keh (iraaj ruq'orom Ye'aab' Kikik'eel Camnaq)

²⁰Eh chupaam i huuj ree Salmo, je' wili i tz'ihb'amaj: Kahnoq chi ntz'irik paam i rupaat, ma' ta naq chik jino'q i neenkanik paruye'aab', inki. Eh je' wo' chik wili i ruq'or: Tokoom chik chopwoq naah i rukamaj, inki.

²¹Je' re' noq yu'naak, ajwaal wach chi nee nqapab'aa' jino'q i winaq chi jilow i Judas. Wilkeeb' naq taqe winaq chi qaxilak, re' ruuk' taqe i xihuch'ihlinik cho qeh jarub' haab' xwihik chi qaxilak i QaJaaw Jesús.

²²Re' neenqapab'aa' re' re' rilom-oq chaloq noq xqahteesjik ruhaa' i Jesús ruum i Juan, eh korehtaal-oq wo' xrilow noq xjohteesjik pan taxaaj i Jesús. Eh re' reh nee nokik haa' chi qaxilak chi q'orol rib'iral i ruwuktiik chaloq chi k'achlik wach i Jesús, inki i Pedro.

²³Eh xkisik' wo' wach i ki'ib' chi winaq, je' wili kib'ihnaal: José, Barsabás i rukab' rub'ihnaal eh Justo wo' chik inkiq'or reh, eh re' i rukab', Matías i b'ih.

²⁴Eh je' wili i xkiq'or pan kitiij: QaJaaw, xa re' wo' hat ti eht'alinik reh i qánima chi qunchelaal. Yu'naak cha k'uhtaaj qeh awach keh i ki'ib' wili asik'im wach,

²⁵reh chi nee ruchop naah i kamanik ma' xta b'anal reh, re' rub'anariik i taqarik xukanaa' i Judas ruum i ru mahk xub'an. Re' i xukanaa' noq xooj chupaam i ye'aab', ruk'ul chi reh, re' i xuk'ul wii' i ti'laj kimik, inki taqe.

²⁶Eh xkisik' chi riij naab'al reh awach keh i ki'ib' re' re' naakipab'aam. Eh wach naah i Matías xkahnik chi re' reh xokik haa' chi kixilak i junlaj chi tahqaneel.