Read Poqomchi Hech 11 Bible Online

Hech 11 - Poqomchi bible

Hech 11

¹Re' taqe aj tahqaneel eh je' wo' taqe aj nimaneel wilkeeb' Judea xkib'iraj rib'iral chi wilik taqe i ma' re' ta aj judío xkinimaj i ruk'uhb'aal i Dios.

²Eh noq xsutinik wo' chik cho Jerusaleem i Pedro, xtohq'ik ruwech'ijiik kuum inkinimaj i chi koruman chi npoch'arik naah i k'achab',

³eh xkipech'uj reh chi je' wili: ¿Chaaj reet noq xat ponik cho chi kula'jiik i ma' re' ta taqe ruuk' i hoj, eh xa a'n inche awa' ahaa' kuuk'? inki taqe.

⁴Eh re' Pedro, ko paraa' pari'sil xutus wach ruq'orariik keh taqe i xrilow i xponik rub'an, je' wili i xuq'or keh:

⁵Eh noq wilkiin ar Jope, noq tiij i nub'an, je' wili i xuk'uhtaaj riib' weh panusaq wiriik: Xwilow chik inche wach jinaj i nimlaj itz'ihy b'ak'alkeeb' i pantaq rutz'u'kaal, eh pant'uylik xqajik cho pan taxaaj, xk'ulik qohoq ma' najt ta wuuk'.

⁶Eh noq xwilow chikop taqe i wilkeeb' chupaam: Wilik i kijib' kooq, wilik i josq'laj chikop, wilik i xa kijukem kiib' noq kib'ehik, wilik tz'ikin kirupinik.

⁷Eh xrib'iraj jinaj i q'orik xb'aan chaloq, je' wili i xuq'or cho weh: Pedro, hiy cha kansaj taqe chikop re' re', eh chak'ux aweh, inki.

⁸Re' hin je' wili i xnuq'or: Jaaw, ma' chih taj ruum re' hin ma' jank'al ta i nuk'ux weh i taqe i ch'uwa' kiwach ruum ma' ruk'ul ta chi weh kinki.

⁹Eh re' xq'orinik weh, je' wo' chik wili i xuq'or cho weh: Aha' wilik taqe i rutz'ajam wach i Dios, ma' q'or i hat chi ch'uwa' wach, inki weh.

¹⁰Re' wili oxpech xq'orarik cho weh. Eh chi riij i re', xjohteesjik wo' chik johtoq pan taxaaj i nimlaj itz'ihy ruch'ihil taqe wilkeeb' chupaam.

¹¹Eh chupaam i jumehq' re' re', xiooj k'oloq ixib' chi winaq ruuk' i paat wilkooj wii', kopan tinamit Cesarea xitaq'ab'jik chaloq chi nuk'amariik.

¹²Eh re' Santolaj Uxlab'al xuq'or cho weh chi naawojiik chikiij chi ma' kiib' ta nuk'ux. Eh xinooj wo' hoq, xiooj wo' chi wiij i waqiib' chi hermano wili. Eh xojokik i koq chupaam i rupaat jinaj i winaq, Cornelio rub'ihnaal.

¹³Re' reh xuk'utjaaj qeh nik' wach noq xril wach parusaq wiriik jinaj i ánjel ar parupaat xupab'aa' riib' chuwach, je' b'ila' wili i xq'orarik reh: Chataq'aaj reje awaj taqareel ar Jope, reh chi nenooj ruk'am aweh Simón, Pedro i rukab' b'ih.

¹⁴Re' reh nee ruq'or rukorkiil aweh nik' wach noq neenako'leej awiib' i hat, eh je' wo' taqe awach aweh panapaat, i nuchjik.

¹⁵Eh xa kore' wo' naq xnutoq'aa' ruq'orariik keh i ruq'oral i Dios, xqajik cho chikinaah i Santolaj Uxlab'al, je' wo' rukab' noq xqajik cho chi qanaah i hoj pampeet.

¹⁶Re' hin xk'ulik cho panuk'ux i ruq'orom cho qeh i QaJaaw Jesucristo chi je' wili: Xti korik chi re' Juan xub'an i qasanik ha' xa ruuk' ha', raaj taq i hat naa ruqahteesjiik taq ahaa' ruuk' i Santolaj Uxlab'al, inki.

¹⁷Ma' xta reet i xub'an i Dios chi je' re'. Wila' re' reh xye'wik cho keh i ma' re' ta taqe aj judío i Santolaj Uxlab'al je' rukab' noq xuyeew cho qee hoj i qohnimanik reh i QaJaaw Jesucristo, ¿chib'ih chik wajaawriik re' hin chi neenutoq'aa' nuq'atam wach i Dios? inki Pedro.

¹⁸Noq xkib'iraj chi je' re' taqe hermano ma' xta chik xkiq'or, xkiloq'ej la' i Dios, je' wili i xkiq'or: Xti korik wo' chi re' Dios xye'wik q'ab' keh i ma' re' ta taqe aj judío chi naa kiyot'om i kik'ux chi riij i kimahk reh chi naa kireqem i juneliik k'acharik inki taqe.

¹⁹Eh noq kansamaj chik i Esteban, xtohq'ik rixowjiik kiwach taqe aj nimaneel. Ruum i re' wilik taqe i xkimol reje chi elik pantaq tokoom tinamit. Wilik i xiooj, Fenicia, Chipre, Antioquía. Eh chupaam taqe i tinamit re' re', xa keh taqe aj judío xkiq'or i ak' k'uhb'aal, ma' xkiq'or ta reh taqe i ma' re' ta aj judío.

²⁰Wilik la' taqe i aj nimaneel re' ruuk' taqe aj Chipre re' ruuk' taqe aj Cirene xiooj k'oloq Antioquía. Re' keh ar xkitoq'aa' kiq'orom rib'iral keh i ma' re' ta taqe aj judío i ak' k'uhb'aal, re' i xk'ulik ruq'or i QaJaaw Jesús.

²¹Re' QaJaaw xye'wik kajaawriik chuq'orariik i ak' k'uhb'aal, ma' k'isiin i xkinimaj, eh xkiq'asaj kiib' reh i QaJaaw.

²²Noq xponik rib'iral pan kixikin taqe komoon aj nimaneel wilkeeb' Jerusaleem i k'ahchi' kianam ponoq ar taqe aj nimaneel, xkitaq'aaj reje i Bernabé chi kito'ariik ar Antioquía.

²³Noq xooj k'oloq ar, ma' k'isiin ta xsuuqb'ik ruk'ux noq xrilow chi k'ahchi' cho kitoob'jiik taqe ak' aj nimaneel ruum i Dios. Re' Bernabé xuk'uhb'alej taqe, xuyeew ruman rukowiil kik'ux chunimjiik i QaJaaw.

²⁴Re' Bernabé atoob' wach ruk'ux, wilik ruuk' i Santolaj Uxlab'al, eh i ruyeew ruk'ux chi korik. Eh ma' k'isiin i xkinimaj i QaJaaw chuwach.

²⁵Rub'anam-oq chik kahnoq i wili i Bernabé, xooj pan tinamit Tarso chusik'ariik i Saulo.

²⁶Eh noq xureq, xuk'am cho chi riij Antioquía. Manlik jinaj haab' xi wihik ar kuuk' i aj nimaneel, eh ar xkik'uhtaaj i ruq'oral i Dios keh i ruk'ihaal tinamit. Chupaam taqe q'iij re' re', ar Antioquía xtohq'ik reje ruq'orariik keh i aj nimaneel chi manlik raj nimaneel i Cristo chik i kib'ihnaal.

²⁷Chupaam taqe q'iij re' re', wilik i jalal ruq'oral i Dios xi chalik Jerusaleem xiooj k'oloq ar Antioquía.

²⁸Eh noq kimolom kiib' i aj nimaneel, xupab'aa' johtoq riib' chikiwach i winaq, Agabo rub'ihnaal, jinaj keh i jalal ruq'oral i Dios, xuq'or keh ruuk' i rajaawriik i Santolaj Uxlab'al chi naa ruwihiik i runimaal wi'jaleel chupaam taqe i tinamit re' re' ixk'ularik noq wilik chi ajaab'esil i Claudio.

²⁹Eh noq xb'aan i wi'jaleel, re' taqe aj nimaneel wilkeeb' Antioquía xkichop kik'ux chi xkitaq'aaj reje toob'al keh i aj nimaneel patim taqe Judea, re' q'oreel nik' k'ihaal ixki a'n ruye'ariik chi kiju'junaal.

³⁰Eh re' Bernabé, re' Saulo xi k'amwik reje reh i lemóxna, xponik kiq'asaj pan kiq'ab' taqe i k'amal kib'eeh i aj nimaneel wilkeeb' ar Judea.