Read Poqomchi Hech 16 Bible Online

Hech 16 - Poqomchi bible

Hech 16

¹Re' Pablo ruch'ihil i Silas koq'uun xiooj k'oloq Derbe je' wo' Listra. Eh ar xkireq jinaj i aj nimaneel, Timoteo rub'ihnaal, rak'uun jinaj ixoq aj nimaneel re' ruuk' i aj judío, eh re' rajaaw aj griego.

²Re' taqe aj nimaneel wilkeeb' Listra, i wilkeeb' Iconio k'ahchi' kiq'orom chi holohik i runa'ojb'al i Timoteo.

³Re' Pablo xuk'am chi riij i Timoteo chi ruto'ool. Xa re' la' xuq'or reh chi peet naa rupoch'ariik naah i ruk'achab', xa reh chi ma' xyoj ta kik'ux i aj judío i wilkeeb' chupaam ye'aab' re' re', ruum chu'nchel kieht'alinik reh chi ma' re' ta aj Judío i rajaaw i Timoteo.

⁴Eh chu'nchel i tinamit ki-ik'ik reje wii' xik'ik ponoq kiq'or keh taqe aj nimaneel chi naa kinimam i k'uhb'aal xkitaq'aaj reje ruq'orariik i kab'laj chi raj tahqaneel i Jesús kuch'ihil taqe i k'amal kib'eeh i aj nimaneel wilkeeb' Jerusaleem.

⁵Eh ruuk' i xik'ik ponoq kiq'or re' re', q'e' xkowjik kik'ux i ju'jun ch'uq chi aj nimaneel chunimjiik i QaJaaw. Eh rajlaal chik q'iij k'ahchi' kik'ihaaxb'iik i aj nimaneel.

⁶Re' Pablo, i Silas ma' xye'arik ta q'ab' keh ruum i Santolaj Uxlab'al chi xkiq'or i ruk'uhb'aal i QaJaaw ar Asia. Ruum i re', xa ik'ik xkian reje i Frigia, i Galacia.

⁷Eh noq xi ponik paruk'ula'tiil Misia, xkikapaaj naq okik i koq i Bitinia. Re' i Santolaj Uxlab'al ma' xuyeew ta q'ab' keh chi xi okik i koq ar.

⁸Ruum i re', xa ik'ik xkian reje i Misia, xiqajik qohoq Troas.

⁹Eh chupaam i aq'ab' re' re', re' Pablo xrilow parusaq wiriik chi jinaj i winaq aj Macedonia pa'lik i koq chuwach. Eh je' wili i xq'orarik reh ruum: Chakuy tiq'ahxoq reje Macedonia, qoh-ohoq tii atoob'eej ar, i nuchjik.

¹⁰Noq xrilow parusaq wiriik i Pablo i wili, re' hin i Lucas ar chik wilkiin ruuk', jumehq'iil xqayejaa' qiib' ree ojik Macedonia. Re' hoj xqareq chi riij chi re' Dios xyuuq'inik qeh, reh chi xooj qaq'or rib'iral ar i ak' k'uhb'aal ar.

¹¹Eh xoj okik reje pan barco ar Troas, chi korik xoj ooj Samotracia, eh chi junwaar-oq chik, xoj ponik ar Neápolis.

¹²Eh noq xoj elik reje ar, chi qooq chik xoj ooj Filipo, eh aj Roma taqe i wilkeeb' chi patinik ar. Re' nimlaj tinamit re' re' paruyuq'ul i Macedonia wilik, eh xama' k'ih ta laj q'iij xoj wihik ar.

¹³Pan jinaj hi'limb'al q'iij xoj elik reje ko chi riij i tinamit, xoj ooj chii' nim ha'. Re' hoj xqakapaaj chi ar wilik jinaj i ye'aab' inki a'n wii' kitiij taqe aj judío. Eh xqatzunaa' qiib' ar, xqatoq'aa' qaq'orom i ak' k'uhb'aal keh taqe ixoq kimolom kiib' ar.

¹⁴Eh chi kixilak re', jinaj ixoq wilik ar, Lidia rub'ihnaal, pan tinamit Tiatira inchalik, aj k'ayen holohaq itz'ihy q'eqjutik ru kaqiil. Re' reh i ruloq'ej wo' i Dios, noq k'ahchi' chi ib'irinik, xch'ub'eesjik wach i ránima ruum i QaJaaw, eh xuyeew ruk'ux chunimjiik i ruq'or i Pablo.

¹⁵Eh re' ixoq re' re' xqahteesjik ruhaa', ruch'ihil taqe awach reh parupaat, xupahqaaj otob'il qeh chi je' wili: Wila' xti kinakoj taq chi hin chik aj nimaneel parub'ihnaal i QaJaaw, taq taq cha a'n apatal wuuk', inki qeh, eh re' hoj xoj kahnik wo' ruuk'.

¹⁶Eh junriim noq ojik inqa a'n chi tiij, jinaj i xq'un xelik cho pamb'eeh chi qak'ulariik wilik ruuk' i ma' tob'laj uxlab'al reh i q'ijinik. Eh k'ayimaj kuuk' taqe i rupatroon, noq i rub'an q'ijinik, ma' k'isiin k'ihaal i rutojb'aal i rumol wach, i ruq'asaj keh i rupatroon.

¹⁷Re' i xq'un xojrutahqeej reje quch'ihil i Pablo, k'erlik chii' chuq'orariik chi je' wili: Re' taqe winaq wili raj kamanoom i Dios taqe wilik cho pan taxaaj, k'ahchi' taq kiq'orom rib'iral aweh i b'eeh reh i ko'lemb'al iib' inki.

¹⁸Eh k'ih laj q'iij xub'an chi je' re' korehtaal xq'uhtik ruk'ux i Pablo chi rib'irjiik, xusutej reje riib', je' wili i xuq'or reh i ma' tob'laj uxlab'al i wilik ruuk' i xq'un: Parub'ihnaal i Jesucristo, i nuq'or aweh chi eleen ruuk' i xq'un, inki. Eh jumehq'iil xkanab'jik ruum i ma' tob'laj uxlab'al.

¹⁹Eh noq xkilow i rupatroon i xq'un chi ma' naa ta chik rusik'ariik kitumiin ruuk' i q'ijinik i rub'an, xkichop i Pablo ruch'ihil i Silas. Eh xkik'am reje chikiwach i q'atal q'orik pan jinaj ye'aab' inkimol wii' kiib' i tinamit.

²⁰Eh xkiq'asaj pan kiq'ab' i q'atal q'orik, je' wili i xkiq'or i koq: Re' taqe aj judío wili k'ahchi' kiyojom ruk'ux qatinamiit.

²¹Re' keh k'ahchi' kik'uhtaam jinaj i na'ojb'al, i ma' ruk'ul ta k'isinoq chi neenqak'ulaa', eh chi neenqatijej qeh, ruum hoj aj Roma, inki taqe.

²²Xkimol cho kiib' i tinamit chukojariik kimahk i Pablo, i Silas. Eh ruum i re', re' taqe q'atal q'orik xkiq'or chi ehteesjoq i kiso' chikiij eh chi kiye'aroq chi tz'uhuum ruuk' q'ab' chee'.

²³Noq kiye'eb'eem chik taqe chi tz'uhuum, xkikoj i koq pantz'ilom i Pablo, i Silas. Eh re' taqe q'atal q'orik xkiq'or reh i cha'jen tz'ilom chi chucha'jeej taqe chi korik.

²⁴Noq xq'orarik reh chi je' re', xukoj taqe i koq ko paruyuhb' i tz'ilom i Pablo, i Silas, Xulutz' paam i kooq chi chee'.

²⁵Eh je' naa chik yejal aq'ab' noq tiij eh tz'uuy inki a'n i Pablo, i Silas chi loq'oomb'al ree Dios. Eh re' taqe i kuch aj tz'ilom k'ahchi' i koq kib'iram.

²⁶Eh chi ma' keht'al, xchalik jinaj i kowlaj yihk, kow xuk'u'yisaj taqe tz'aq ree tz'ilom. Ruum i re', xitehib'ik taqe ru puertahiil i tz'ilom, eh xik'upib'ik taqe karena b'ak'alkeeb' wii' chu'nchel i aj tz'ilom.

²⁷Noq xna'lojik reh i aj cha'jen tz'ilom, i rilow tehinaq chik taqe i ru puertahiil i tz'ilom. Eh xrisaj cho parupaat i ruq'aslaj ch'ihch', naa naq rukansam riib', ruum xukapaaj chi xi elik chu'nchel i wilkeeb' pantz'ilom.

²⁸Eh re' i Pablo, xuk'er reje chii' chuq'orariik reh chi je' wili: Maacansaj awiib' re' hoj wilkooj ayu' chi qunchelaal inki.

²⁹Eh re' i aj cha'jen tz'ilom, xupahqaaj ruq'aaq' rusihq'b'aal. Eh rajimam riib' xokik i koq pantz'ilom, xan b'arb'otik chik noq xuxuk'aa' riib' chuwach i Pablo, chuwach i Silas.

³⁰Eh xrisaj taqe cho pantz'ilom, xupech'uj keh chi je' wili: Hat taq ajaab'ees, ¿chib'ih naq ineenub'an chi neekinko'ljik? inki.

³¹Re' keh je' wili i xkiq'or: Chanimaj i qajaaw Jesucristo nee tiko'ljik i hat, nee wo' kiko'ljik i awach aweh panapaat, inki taqe.

³²Eh xkiq'or wo' reh i cha'jen tz'ilom i ruk'uhb'aal i QaJaaw Jesucristo, eh je' wo' keh chu'nchel i awach reh parupaat.

³³Eh xa chupaam wo' aq'ab' re' re', re' aj cha'jen tz'ilom xutz'aj wach i kiti'kiil xb'aan keh i Pablo, i Silas. Eh xqahteesjik ruhaa' i reh xqajik wo' kihaa' chu'nchel i awach reh parupaat.

³⁴Re' cha'jen tz'ilom xuk'am reje parupaat i Pablo, i Silas, xuyeew kiwa'. Eh ma' k'isiin ta xsuuqb'ik kik'ux kuuk' chu'nchel i awach reh parupaat, ruum xkinimaj i Dios.

³⁵Eh noq xsaq'ik, re' taqe q'atal q'orik wilik taqe polisía xkitaq'aaj reje ruuk' i aj cha'jen tz'ilom xpoon kiq'or reh chi chesaj reje pantz'ilom i Pablo, i Silas.

³⁶Eh re' i aj cha'jen tz'ilom, je' wili i xuq'or reh i Pablo: Re' taqe i q'atal q'orik xkitaq'aaj cho ruq'orariik weh chi naa taq kaat wisam reje pantz'ilom akab'cheel, neerub'an chi nee taq ti elik reje chi ma' xta taq ayo'jiik, inki.

³⁷Eh re' Pablo je' wili i xuq'or keh i polisía: Re' hoj, hoj aj Roma, xojkiyeew chi tz'uhuum chikiwach tinamit, eh xojkikoj pantz'ilom chi komajaa' ta nkiq'at q'orik chi qanaah mi korik chi wilik qamahk oon ma' xta qamahk. Eh yu'naak qohkaaj kesam reje pantz'ilom panke'lik. Ra'j xti ma' ruyeew ta riib' re'. Ko kichaloq wo' peet q'atal q'orik re' re' chi qehteesjiik, kora'j nee qoh elik re', inki.

³⁸Re' taqe polisía xi chalik chi taqarik aha' wilik i xq'orarik reje keh ruum i Pablo, i Silas, xponik kiq'or keh q'atal q'orik, noq xkib'iraj chi aj Roma taqe winaq re' re', xchalik kiyo'jiik.

³⁹Eh re' taqe i q'atal q'orik xiooj chupahqaljiik kuyb'al kimahk reh i Pablo, i Silas, chi riij i xkian. Eh xkesaj taqe pantz'ilom, xkipahqaaj otob'il keh chi kieloq reje chupaam i tinamit re' re'.

⁴⁰Eh noq xi elik reje pantz'ilom i Pablo, i Silas, xiooj wo' chik parupaat i Lidia. Eh ar xkimol kiib' kuuk' taqe aj nimaneel, noq kiye'em chik rukowiil kik'ux, xi elik reje ar.