Read Poqomchi Hech 19 Bible Online

Hech 19 - Poqomchi bible

Hech 19

¹Noq ko wilik i Apolos pan tinamit Corinto, re' Pablo reh nah taq yuuq' pantaq rax chee' xuk'am reje noq xooj Éfeso. Eh k'ih taqe aj nimaneel xponik rureq ar,

²Re' Pablo xupech'uj keh chi je' wili: ¿Mi xak'ul taq i Santolaj Uxlab'al noq xanimaj taq i QaJaaw Jesús? inki. Re' keh je' wili i xkiq'or: Re' hoj ni xata qib'iram rib'iral chi wilik i Santolaj Uxlab'al, inki taqe.

³Eh xupech'uj wo' chik keh chi je' wili: ¿Nik' wach i qasanik ha' taq xak'ulum? inki. Eh re' keh je' wili i xkiq'or: Re' qasanik ha' qak'ulum je' rukab' i qasanik ha' rub'anam i Juan aj qasan ha', inki taqe.

⁴Re' Pablo je' wili i xuq'or keh: Hoo', korik noq re' Juan xuqasaj cho kihaa' i xkiyot' kik'ux chi riij i kimahk. Xa re' la', i xuq'or wo' keh chi naa kinimam i k'ulik iloq reh chi riij i reh, iraaj ruq'orom chi re' QaJaaw Jesús, inki keh.

⁵Noq xkib'iraj chi je' re' i aj nimaneel wilkeeb' Éfeso, xqahteesjik kihaa' parub'ihnaal i QaJaaw Jesús.

⁶Eh noq xuyeew kab'chel i q'ab' i Pablo wach kinaah, xk'ulik qohoq i Santolaj Uxlab'al chikinaah, eh kitoq'aa' q'orik pan tokoom q'orik xkian chik ruq'orariik i ruk'uhb'aal i Dios.

⁷Eh re' taqe i aj nimaneel re' re', kab'laj chi winaq taqe.

⁸Eh re' Pablo ixib' poh ruq'or i ruk'uhb'aal i QaJaaw Jesús chi ma' xta k'isinoq ruyo'jiik chupaam i paat inlooq'jik wii' i Dios. Eh i rub'an ruk'utaaj kuuk', xuq'or keh nik' wach noq wilik i runimaal rajaawriik i Dios.

⁹Eh wilik taqe i xi ib'irinik reh i k'uhb'aal xkikowb'isaj i kánima, ma' xinimanik taj xkib'aj i ak' k'uhb'aal chikiwach i tinamit. Eh xrilow chi je' re' i Pablo, xukanaa' taqe kahnoq, xuk'am taqe reje aj nimaneel pan jinaj paat rub'an wii' i tijinik jinaj i winaq, Tirano rub'ihnaal. Ar xub'an i k'uhb'alinik i Pablo chu'nchel q'iij.

¹⁰Eh je' re' i xub'an chuwach i ki'ib' haab', korehtaal xkib'iraj i ruk'uhb'aal i QaJaaw Jesús chu'nchel i patineel wilkeeb' paruyuq'ul i Asia, chi je' taqe aj judío, chi je' taqe ma' re' ta aj judío.

¹¹Eh re' Dios xuyeew rajaawriik i Pablo chub'anariik taqe i nimaq kiwach ma' ilooj taj.

¹²Ruum i re', wilik pech noq xa re' rusu't, eh xa re' ruso' rukojom chik cho chi riij i Pablo, ink'amarik reje keh taqe yowaab', eh inik'tesjik chikinaah. Xa ruuk' taqe re' kik'achjik ruuk' i kiyab'ilaal, eh xi elik wo' taqe i ma' tob'laj uxlab'al kuuk' taqe i wilik ma' tob'laj uxlab'al kuuk'.

¹³Eh wilik taqe aj judío xak'ul kiooj pantaq b'eeh xkaaj naq chi parub'ihnaal i Jesús inkesaj i ma' tob'laj uxlab'al kuuk' yowaab'. Eh je' wili i xkiq'or reh taqe ma' tob'laj uxlab'al: Eleen taq reje kuuk' i yowaab' parub'ihnaal i Jesús, re' i k'ahchi' ruq'orom rib'iral i Pablo, inki taqe.

¹⁴Je' wo' naq wili inki a'n chaloq kiwuqcheel i rak'uun jinaj i aj judío, Esceva rub'ihnaal, re' ruuk' i k'amal kib'eeh taqe aj tiij.

¹⁵Eh noq xkaaj naq kesam i ma' tob'laj uxlab'al je' wili i xq'orarik keh ruum: Re' hin weht'al wach i Jesús, eh je' wo' hoq i Pablo. Eh re' taq i hat, ma' weht'al ta taq awach, ki uchjik.

¹⁶Eh re' winaq i wilik ma' tob'laj uxlab'al ruuk' xukut reje riib' chikinaah i xiesanik naq reh i ma' tob'laj uxlab'al. Eh xti xrisaj i ransil noq xub'an keh chikuncheel, xuq'ojib'eej taqe xuhopib'eej i kiti'jolal. Eh t'usulkeeb' chik noq xi elik reje pampaat.

¹⁷Eh re' xkik'ul re' re', chu'nchel i patim ar Éfeso xi-ib'irinik reh, chi je' taqe aj judío, chi je' taqe ma' re' ta aj judío. Eh ma' k'isiin ta noq xiyo'jik. Ruum taqe xk'ularik re' re', ma' k'isiin taqe i xiye'wik runimaal wach i QaJaaw Jesús.

¹⁸Eh k'ih wo' taqe i re' ruuk' i kinimam chik i Dios kiooj k'oloq chuq'orariik chikiwach i tinamit taqe i yeb'ee wach na'ojb'al kianam chaloq pampeet.

¹⁹Eh ma' k'isiin wo' taqe i kitijem naq cho keh i warinik xkik'am chaloq i kihuuj reh warinik, eh xkik'atib'eej wach q'aaq' chikiwach i tinamit. Noq xkib'ir riij i tz'aaq i kihuuj re' re', lajeeb' roxk'ahl miil chi tumiin re' ruuk' i plata xooj eloq chikiwach.

²⁰Je' re' noq, xooj rib'iral i ruk'uhb'aal i QaJaaw Jesús xa aha' yuuq' eh xk'utinik wo' wach taqe i xub'an ruuk' i rajaawriik.

²¹Eh re' Pablo xuchop ruk'ux chi xooj chi kilariik aj nimaneel wilkeeb' Macedonia i wilkeeb' Acaya, eh korehtaal xi ponik Jerusaleem. Eh xuq'or chi noq ik'inaq chik ar ajwaal wach chi naa rojiik rilom taqe aj nimaneel wilkeeb' Roma.

²²Je' re' noq, re' Pablo xutaq'aaj reje Macedonia ki'ib' keh i ruto'ool, re' Timoteo ruch'ihil i Erasto. Eh re' reh ko k'ih q'iij xkahnik kahnoq Asia.

²³Chupaam chaloq i q'iij re' re', xwihik jinaj runimaal choqinik iib' ar Éfeso chi riij i ak' k'uhb'aal.

²⁴Re' choqinik iib' re' re' xtohq'ik ruum jinaj i winaq, Demetrio rub'ihnaal ch'eyel i plata, i ruyejaa' taqe chi kok' paat rujalwaach i rupaat ixoq tiyoox, Diana rub'ihnaal, eh k'ih taqe rutoj kikamanik ruuk'.

²⁵Eh re' Demetrio xumol kiwach i re', xumol wo' kiwach eliik wach i kikamaj ruuk', je' wili i xuq'or keh: Hat taq ajaab'ees, aweht'al taq i hat chi ruuk' i qakamaj wili inqareq qatumiin.

²⁶Re' taq i hat inawilow, inab'iraj taq chi re' Pablo k'ahchi' ruq'orom keh i tinamit chi re' taqe tiyoox i xa kiyej-aniik winaq ma' re' ta taqe dios. Eh re' i ruq'or re' re', ma' k'isiin chik i xinimanik reh. Ma' xata re' ayu' Éfeso k'ahchi' ruq'orom, je' wo' re' i xub'an chaloq chupaam i ruyuq'ul i Asia.

²⁷Re' wili yohb'aal, ruum re' qak'aay naa rojiik sahchoq wach. Eh re' rupaat i runimaal wach ixoq tiyoox, Diana, neenooj sahchoq wach. Eh chi je' re', ma' naa ta chik ruponiik panaq' wachiis i runimaal wach ixoq tiyoox wili, re' inye'arik ruloq'il kuum i tinamit wilkeeb' paruyuq'ul i Asia eh je' wo' kuum chu'nchel i tinamit xa aha' yuuq', inki, Demetrio.

²⁸Noq xkib'iraj i wili taqe tinamit, yohb'aal wach noq xchalik kik'aah, xkik'er kichii' chuq'orariik chi je' wili: Nim rajaawriik i qatiyoox Diana i hoj aj Éfeso inki taqe.

²⁹Ruuk' i re', xyoj kik'ux i patineel wilkeeb' ar. Eh junokiik taqe chuchopariik i Gayo ruch'ihil i Aristarco. Re' keh aj Macedonia taqe, re' i ki uhch'ihlinik ree Pablo. Eh xiqerjik reje kuum i aj Éfeso.

³⁰Re' Pablo xraaj naq i koq okik chi kiq'orob'jiik i tinamit. Eh re' taqe aj nimaneel ma' xkiyeew ta q'ab' reh chi xokik i koq ar.

³¹Eh wilik wo' chi kixilak taqe q'atal q'orik wilkeeb' cho paruyuq'ul i Asia, re' ruuk' taqe ramigo i Pablo, xkitaq'aaj cho ruq'orariik reh chi ma' ruk'ul ta chi neerumin i koq riib' ar.

³²Eh chi kixilak i tinamit kimolom kiib' ar, xa reh reh wach inkik'er wii' kichii', ruum re' i tinamit sahchinaq kik'ux. Eh re' i ruk'ihaal ni xata keht'al chib'ih aj chaj-iij kimolom kiib'.

³³Eh k'ih i k'amal kib'eeh i aj Judío ximihnanik cho reh i Alejandro, reh chi xik'ik cho chikiwach, eh chi naa rilom i k'ahchi' ruk'ulariik. Re' Alejandro xub'an reje i q'ab', reh chi neenkimay choqik i tinamit, ruum re' reh xraaj naq rub'anam ruk'utaaj kuuk', chi kiko'liik aj Judío re' re'.

³⁴Raaj noq xkireq chi riij i tinamit chi re' Alejandro aj judío wo' i reh, ki'ib' naa ora xkik'er kichii' chi kunchelaal chuq'orariik chi je' wili: Nim rajaawriik i qatiyoox Artemisa i hoj aj Éfeso inki taqe.

³⁵Eh re' i aj tz'ihb' wilik ar, je' wili xuq'or noq xuq'il taqe ruuk' i choqik xkian: Hat taq aj ayu' Éfeso, re' taq i hat aweht'al taq chi chu'nchel i tinamit kieht'alinik reh chi wach naah i qatinamiit ayu' kanlik i rucha'jaljiik i rupaat i qa-ixoq tiyoox Diana i b'ih xiik' naah nimaal wach, je' wo' rucha'jaljiik i rujalwaach i q'ehb'inaq cho pan taxaaj.

³⁶Re' wili ma' awach ta nee nq'orik chi ma' korik taj. Je' re' noq, chamay taq i choqik i hat. Ma' awach taq ayeew panti' k'axik chi ma' akapaam ta taq riij chi korik chib'ih taq i na a'nam,

³⁷ruum re' taqe winaq wili i xak'am taq cho ayu', ma' xtaj i yiib' wach kianam chupaam i rupaat i qatiyoox, eh ma' kib'ajam ta wo' chaloq i qa-ixoq tiyoox.

³⁸Eh wila' re' Demetrio ruch'ihil i kikamanik ruuk' wilik i xmahkunik chikiwach, inkaaj kijalam, wilkeeb' taqe q'atal q'orik ar ohoq kiq'or, eh chi kiju'junaal neenkiyejaa' wach ar chib'ih jariik i kik'axkiil.

³⁹Eh wila' re' taq i hat ko wilik taq inawaaj apahqaam, kore' chik neen korjik wach noq naa rub'aan jino'q chik moloj iib' chi korik.

⁴⁰Ruuk' i xk'ularik yu'naak, jinaj yohb'aal wilkooj wii' hoj, ruum nee-oq qoh kikoj chi hoj ixowan wach i ajaab'ees. Eh wila' xkipahqaaj qeh chib'ih reet i choqinik iib' wili, re' hoj ma' nee ta nqaq'or chib'ih reet, ruum xama' xta rub'ehel noq xb'aan i wili, inki.

⁴¹Noq xukohlaaj ruq'orariik taqe re' i aj tz'ihb', xuch'aq taqe reje i tinamit kimolom kiib' ar.