Read Poqomchi Hech 2 Bible Online

Hech 2 - Poqomchi bible

Hech 2

¹Eh noq xponik i ruq'ijil i ninq'iij Pentecostes, re' taqe i aj nimaneel jinaj kimolom wii' kiib' pan jinaj paat, eh jinaj wach kik'ux.

²Eh chi ma' keht'al, xkib'iraj jinaj i xa njomik chik xqajik cho pan taxaaj, xa je' chik rukab' i choqik i rub'an i kowlaj teew xa nq'ajb'anik chik paam i paat kimolom wii' kiib'.

³Eh xuk'uhtaaj riib' chikiwach i je' taqe ruwii' i ju' qaaq', eh je' taqe q'aaq' xkich'aqib'eej cho kiib' chikinaah chi kiju'junaal.

⁴Eh chi kunchelaal xokik pan kánima chi manlik i Santolaj Uxlab'al, eh xkitoq'aa' q'orik pan tokoom chik q'orik, re' q'oreel nik' wach xye'arik keh chi q'orarik ruum i Santolaj Uxlab'al.

⁵Eh wilkeeb' chi patal pan tinamit Jerusaleem taqe aj judío, taqe xa aha' kichalik chi junsuut i wach ak'al.

⁶Eh noq xkib'iraj i xa njomik chik xub'an xama' nkireq ta chik chi riij chib'ih naa kia'nam, ruum xkib'iraj chi kiju'junaal chi pan kiq'oral k'ahchi' kiq'oriik taqe ju'jun chi aj nimaneel.

⁷Eh xsahchik kik'ux, xiqaaj kapeew, je' wili i xkiq'or chikiwach: ¿Mi ma' aj Galilea taqe re' chu'nchel i q'orik inki a'n wili?

⁸¿Chib'ih reet noq inqib'iraj taqe chi q'orik inki a'n pan qaq'oral?

⁹Re' wilkeeb' ayu' xa aha' kitinamiit. Wilik i kichalik i Parto, Media, Elam, i hoj i qoh chalik Mesopotamia, Judea, Capadocia, Ponto, Asia,

¹⁰wilik i kichalik Frigia, Panfilia, Egipto, paruyuq'ul i Africa ma' najt ta ruuk' i tinamit Cirene. Wilik i kichalik Roma, wilik wo' i hoj aj judío chi qaasb'al wilkooj ayu'.

¹¹Wilik aj Creta, aj Arabia, Eh xti nqib'iraj inche pan qaq'oral chi qunchelaal i sahchb'al k'uxliis xub'an i Dios inkiq'or, inki taqe.

¹²Eh re' taqe re' sahchinaq kik'ux, kapeew inki a'n xkipech'uj chikiwach chi je' wili: ¿Chib'ih jariik iraaj ruq'orom i wili? inki taqe.

¹³Eh wilik wo' taqe i xa ch'ool inki a'n je' wili xkiq'or: Re' taqe re' xohk'reel taqe ruum aj re' je' re' kiq'orik, inki taqe.

¹⁴Chalik i Pedro xpa'lojik johtoq ruch'ihil taqe junlaj chi aj tahqaneel, kow xuq'or keh chi je' wili: Hat taq aj judío, je' wo' chawunchelaal taq i hat patim ayu' Jerusaleem, chab'iraj taq chi korik i naa nuq'orom taq aweh:

¹⁵Re' hoj, ma' hoj ta xohk'reel je' rukab' taq inakapaaj i hat. Komajaa' ta nare' b'elejeeb'ora ree rujohtiik i q'iij ra'j naa chik re' i xohk'rik neenqa a'n.

¹⁶K'ahchi' la' rojiik eloq wach quuk' ruq'orom chaloq i Joel jalal ruq'oral i Dios noq xuq'or chi je' wili:

¹⁷Pan kuxesb'al taqe ponoq wach ree q'iij inki Dios naa nuqasam qohoq i Wuxlab'al chikinaah chu'nchel tinamit. Re' taqe i kak'uun kixq'uun naa kiq'orariik wib'iral. Re' taqe k'ijolaq wilik i naa nuk'uhtaam chikiwach. Re' taqe i mama' winaq wilik i naa nuk'uhtaam keh pan kiwiriik.

¹⁸Chupaam i q'iij re' re', naa nuye'em i Wuxlab'al pan kánima taqe waj kamanoom, chi winaq chi ixoq, eh naa wo' nukojom taqe chi q'orol wib'iral.

¹⁹Naakilom johtoq pan taxaaj taqe i runimaal sahchb'al k'uxliis naa nuk'uhtaam keh naa wo' nuk'uhtaam wach ak'al i ehtalil: Kik', q'aaq', q'equm paam sib' xa je' chik q'equm paam suutz'.

²⁰Eh noq komajaa' i rureq ruq'ijil i ruk'uliik ruka'peech i QaJaaw, re' q'iij xiik' naah loq'il, eh nim wach, re' q'iij naa ruq'equumriik wach, eh re' poh xa je' chik kik' naa rukahniik.

²¹Eh awach i neenkipahqaaj kuyb'al kimahk parub'ihnaal i QaJaaw neekiko'ljik, inki Dios, inki.

²²Chab'iraj taq i naa nuq'orom i hat taq aj Israel: Re' Jesús aj Nazaret xa re' wo' reh jinaj winaq xye'arik rajaawriik ruum i Dios. Eh xawil taq ruuk' naq'awach, eh aweht'al taq chi korik taqe i runimaal sahchb'al k'uxliis, taqe i ma' ilooj taj, taqe i ehtalil xub'an i Dios parub'ihnaal i Jesús.

²³Eh re' taq i hat, noq xq'ahteesjik taq pan aq'ab' i Jesús, xaq'asaj taq pan kiq'ab' i yiib' wach i kina'ojb'al, eh xkiyeew wach kuruus, ruuk' i re' xakansaj taq. Eh re' Dios xa najtir wo' i ruyejaa' cho wach chi je' re' i xik'ul i Jesús.

²⁴Eh re' Dios xruksaj wo' chik chaloq chi k'achlik wach i Jesús, xuko'leej chuwach i ti'laj kimik xuk'ul, ruum xrilow chi ma' xuyee ta riib' chi xkimik chi jumpech.

²⁵Re' reey David je' wili xuq'or chi riij i Jesús: Re' hin eliik k'ahchi' wilom wach i waJaaw, ma' hin ta rukanaam, xa eliik k'ahchi' kiin rutoob'eem, reh chi ma' xta neenyojwik nuk'ux.

²⁶Ruum aj re', re' wánima, re' nuti'jolal, re' nukapeb'aal xiik' naah suq kiil kik'ux. Ruum xa ruuk' chik i Dios naa nuye'em nuk'ux.

²⁷Re' hat waJaaw, ma' naa ta akanaam chi jumpech i nuti'jolal panjul, eh ma' nee ta wo' nayeew q'ab' chi naa ruq'ajiik panjul i ruti'jolal i Santolaj Awak'uun.

²⁸Re' hat xatk'uhtanik weh i rub'eeh i juneliik k'acharik. Eh wilik jinaj runimaal rusuqkiil nuk'ux, ruum xa awuuk' wo' hat wilik i rusuqkiil k'uxliis reh juneliik, inki.

²⁹Hat taq was nuchaaq', noq i nuq'or i hin chi aweht'al taq chi korik chi re' xikin qamaam David xkimik, eh xmuq'ub'jik, eh aha' xmuhqik wii', ko nqilow wach yu'naak.

³⁰Re' David jalal ruq'oral i Dios wo' noq xwihik chaloq najtir q'iij, eh reht'al i xti korik q'orooj reh ruum i Dios chi jinaj keh i riih rumaam naa rukahniik chi Cristo. Eh re' reh naa ruwihiik cho paruloq'laj ye'aab' chi taaq'anik.

³¹Re' David, je' naa xrilow cho pampeet, ruum ruq'orom chaloq chi naa wo' chik ruwuktiik cho chi k'achlik wach i Cristo. Eh chi re' ruti'jolal ma' naa ta rukahniik panjul chi jumpech, eh chi ma' naa ta ruq'ahiik i ruti'jolal.

³²Re' Dios xruksaj chaloq i Jesús chi k'achlik wach, re' wo' reh inqaq'or rib'iral i hoj, ruum ti xqilow ruuk' naq'qawach.

³³Re' Jesús xjohteesjik wo' chik pan taxaaj ruum i Dios, reh chi xooj tzuhnoq parusak'aaj. Eh re' Santolaj Uxlab'al, i ruq'orom cho rib'iral Ajaab'ees Dios, xuyeew wo' cho chi qanaah, re' taq i kore' xawil, kore' taq i xab'iraj.

³⁴Re' hin i nuq'or taq aweh chi re' David ma' xjohtik ta pan taxaaj chi k'achlik wach, xa je' la' wili i xuq'or: Re' QaJaaw Dios je' wili i xuq'or cho reh i waJaaw: Ti tzuun panusak'aaj.

³⁵Re' hin korehtaal i nuyeew taqe pana wooq i ki-ixowanik awach, inki Dios, inki.

³⁶Chawunchelaal taq i hat aj Israel, chanab'eej taq chi korik chi re' i Jesús wili i xayeew taq chi kimik wach kuruus i hat, eh re' wo' reh xye'arik rajaawriik ruum i Dios chi Ajaab'ees, eh Cristo wo' hoq, ki uchjik ruum i Pedro.

³⁷Noq xkib'iraj chi je' re' ma' k'isiin ta xchalik ruyot'kiil i kánima xkipahqaaj reh i Pedro, eh keh i ruch aj tahqaneel chi je' wili: Qas qachaaq', eh, ¿chib'ih neenqa a'n? inki taqe.

³⁸Re' Pedro je' wili i xuq'or keh: Chayot' taq ak'ux chi riij taq xa a'n, eh qajoq taq ahaa' cha ju'junaal parub'ihnaal i Jesucristo, reh chi neenkuyarik taq amahk, eh re' Dios nee taq i ruyeew chaaweh i Santolaj Uxlab'al.

³⁹Re' Santolaj Uxlab'al, aweh wo' taq i hat noq ruq'orom cho rib'iral i Dios keh wo' taq awak'uun awixq'uun, keh wo' i wilkeeb' cho chi najt yuuq' keh wo' taqe awach iraaj ruyuq'eem ruuk' i QaJaaw i qaDios, inki Pedro.

⁴⁰Eh re' Pedro xuk'uhb'alej xuq'il taqe tinamit ruuk' taqe q'orik wili: Re' taq i hat chako'leej taq awiib' chuwach i ti' k'axik naakik'ulum i yiib' wach i kina'ojb'al, inki.

⁴¹Eh re' taqe i xinimanik reh i ruk'uhb'aal i Pedro xqahteesjik kihaa'. Eh chupaam i q'iij re' re', wilkeeb' naa ixib'-oq miil i xkikoj kiib' chi kixilak aj nimaneel.

⁴²Eh ma' inkikanaa' ta runimjiik ink'uhtjik keh kuum taqe aj tahqaneel k'acharik inki a'n pan jinaj wach k'uxliis pankomonil inki a'n kitiij, eh k'ul inkipuhkaaj i kaxlanwi'k chikiwach.

⁴³Eh ruum taqe i ma' ilooj taj, eh ma' k'isa ehtalil inkik'uhtaaj i raj tahqaneel i Jesús, ma' k'isiin ta nchalik kiyo'jiik chu'nchel i tinamit.

⁴⁴Chu'nchel i aj nimaneel wilkeeb' pan jinaj wach k'uxliis. Eh chib'ih taqe jariik i wilik keh, k'ul inkipuhkaaj chikiwach.

⁴⁵Inkik'ayej i kak'aal je' wo' taqe i xa chib'ih jariik wilik keh, eh re' tz'aaq inkipuhkaaj chikiwach, re' q'oreel awach i ma' xta wilik reh chi kixilak.

⁴⁶Eh eqal eqal inkimol kiib' chupaam i rupaat i Dios. Eh pantaq paat inkipuhkaaj i kaxlanwi'k chikiwach eh inki a'n kiwa' pankomonil pansuqkiil k'uxliis ruuk' loch'ik.

⁴⁷Re' keh inkiloq'ej i Dios, eh q'e' inajawjik kiwach kuum i tinamit. Eh re' taqe i ruko'leej i QaJaaw, eqal eqal k'ahchi' taqe rukojom chi kiman taqe i komoon aj nimaneel.