Read Poqomchi Hech 23 Bible Online

Hech 23 - Poqomchi bible

Hech 23

¹Re' Pablo xutz'ehtaaj reje panaq'kiwach i juntzuhb' chi q'atal q'orik, je' wili i xuq'or keh: Hat taq was nuchaaq', re' hin xasaq wo' cho wach i nukapeb'aal chuwach i Dios, eh xa ko je' wo' yu'naak, inki.

²Eh re' i Ananías, i kajaaw i k'amal kib'eeh aj tiij, xuq'or reje keh i wilkeeb' ma' najt ta i koq ruuk' i Pablo chi kiyeew i koq chi q'ab'iis i wareeh.

³Eh re' Pablo, je' wili i xuq'or reh: Re' Dios naa rusak'wiik awee hat, i xak'ul i na a'n awach. Wila' tzunulkaat cho ar chuq'atariik q'orik chi nunaah je' rukab' i ruq'or i najtir k'uhb'aal, ¿chihreet noq inataq'aaj nusak'ariik? Ruuk' i xaq'or re' re', ma' nanimaj taj i ruq'or i najtir k'uhb'aal, inki.

⁴Re' i wilkeeb' ar je' wili i xkiq'or reh i Pablo: ¿Mi ma' tiyo'jik re' i hat chu b'ajariik i kajaaw i k'amal kib'eeh aj tiij raj kamanoom i Dios? inki taqe.

⁵Re' Pablo je' wili i xuq'or: Hat taq was nuchaaq', cha kuy taq numahk. Re' hin ma' weht'al taj chi re' reh i kajaaw i k'amal kib'eeh aj tiij, ruum pan santo laj huuj i ruq'or chi je' wili: Maab'aj i wilik chi ajaab'esil chinaah aatinamiit, inki.

⁶Re' Pablo xrilow chi re' taqe q'atal q'orik kimolom kiib' ar. Wilik i aj, saduceo, wilik aj, fariseo chi kixilak. Ruum i re', xuq'or chi kow i Pablo chi je' wili: Hat taq was nuchaaq', re' hin, hin wo' aj fariseo, eh aj fariseo wo' taqe nutuut wajaaw. Re' hin k'ahchi' ruq'atariik q'orik chi nunaah, ruum i nunimaj chi kik'aach wo' chik chaloq i kamnaq, inki.

⁷Eh noq xuq'or i Pablo chi je' re', xkitoq'aa' kiwech'um kiib' chikiwach i aj fariseo kuuk' i aj saduceo. Ruuk' i re', ka'ch'uq xi elik,

⁸ruum re' taqe i aj saduceo ma' nkinimaj taj chi kik'aach wo' chik chaloq i kamnaq, eh ma' nkinimaj taj chi wilkeeb' taqe ánjel chi wilik ránjel rut'iosil i ju'jun. Re' taqe i aj fariseo keh inkinimaj.

⁹Chi kunchelaal k'erik kichii' chi q'orik. Eh wilik taqe i kik'uhtanik ree i najtir k'uhb'aal kuuk' taqe aj fariseo xipa'lojik johtoq eh xkiq'or chi je' wili: Re' winaq wili ma' xtaj i yeb'ee wach rub'anam. Ma' qeht'al taj mi xa ránjel rut'iosil jino'q xq'orik reh oon jino'q ánjel xq'o'rinik cho reh, inki taqe.

¹⁰Eh ruum chi qopik chik wach i rub'an i choqik xkian, xyojik i kajaaw i soldado, xukapaaj chi nee-oq inkixereb'eej i ruti'jolal i Pablo. Eh xutaq'aaj kik'amariik i soldado, reh chi xkesaj chaloq i Pablo chi kixilak, xkik'am wo' chik i koq pampaat wilkeeb' wii' i soldado.

¹¹Eh parukab' aq'ab' chik, xuk'uhtaaj riib' i QaJaaw reh i Pablo parusaq wiriik, je' wili i xq'orarik reh: Pablo, cha chop ak'ux, ruum nik' wach noq xaq'or i korik chi wiij ayu' Jerusaleem, je' wo' chik re' noq naa rojiik aq'orom i korik chi wiij ar Roma, i nuchjik.

¹²Eh parukab' chik q'iij, wilik taqe i aj judío xkian jinaj wach kik'ux chukanteesjiik naq i Pablo. Eh xkiq'or i b'ih i Dios noq xkiq'or i korik chi naa pee kikuyum nik'-oq najtiil kiwa', korehtaal inki a'n rukanteesjiik i Pablo.

¹³Ma' xata ka'winaq chi kiib' taqe i winaq i xiq'orik reh chi je' re' i naa kianam.

¹⁴Xiooj kuuk' i kajaaw i k'amal kib'eeh aj tiij, je' wo' kuuk' i k'amal kib'eeh i aj judío chuq'orariik keh chi je' wili: Re' hoj xqaq'or chik i b'ih i Dios chi korik chi ma' xta pee chik i naa qak'uxum wila' komajaa' inqakansaj i Pablo.

¹⁵Yu'naak taq i hat eh awuch'ihil taqe junch'uq chi kajaaw tinamit nee taq inooj apahqaaj reh i kajaaw soldado chi chuk'am taq cho chawach i Pablo i iqal Nee tii chik taq inaq'or reh chi naawaaj taq apahqaam reh i ru mahk. Eh re' hoj nenooj qak'ul pam b'eeh reh rukanteesjiik, inki taqe.

¹⁶Eh re' rak'uun i ranaab' i Pablo xrib'iraj i xkiyejaa' wach taqe winaq re' re' xooj ruq'or ree Pablo ar chupaam i paat wilkeeb' wii' i soldado.

¹⁷Re' Pablo xuyuq'eej reje jinaj keh i k'amal kib'eeh soldado, je' wili xuq'or reh: Cha a'n otob'il chak'am reje weh i k'ijool wili ruuk' i kajaaw soldado xa jinaj naq i q'orik ajwaal wach naa ruq'orom reh, inki.

¹⁸Eh re' reh xuk'am wo' reje i k'ijool ruuk' i kajaaw i soldado, eh je' wili i xuq'or reh: Re' Pablo, i wilik pantz'ilom, xiruyuq'eej ruuk', eh xuq'or weh chi naa nuk'amam cho awuuk' i k'ijool wili, ruum wilik b'ila' i naa ruq'orom aweh, inki ponoq.

¹⁹Re' kajaaw i soldado xuchop chi q'ab' i k'ijool, eh xresaj reje chi rutkeel, xupech'uj reh chi je' wili: Ak'un, ¿chib'ih naq inche jariik i q'orik naa aq'orom weh? inki reh.

²⁰Re' k'ijool je' wili i xuq'or reh: Re' taqe aj judío kian jinaj wach kik'ux, chi naa ruchaliik kipahqaam aweh chi i iqal i nak'am reje i Pablo chikiwach i q'atal q'orik, xa re' tii chik i ru mahk naa kipahqaam reh naa kianam kiib'.

²¹Jaaw, manimaj keh, ruum ma' xata ka'winaq chi kiib' i winaq i naakikeb'aam kiib' chi ruyub'jiik. Eh xkiq'or chik i b'ih i Dios chi korik chi ma' naa ta pee kianam kiwa' kihaa' chi komajaa' inkikansaj i Pablo. Eh yu'naak i kiyejaam chik kiib' xa re' chik naakuy-eem chib'ih inen naq'or i hat, inki reh.

²²Eh re' kajaaw i soldado xuch'aq reje i k'ijool, eh xuq'or reje reh chi ma' awach ta aj eh naa ruk'uhtjaam i xponik q'oraroq reh.

²³Re' kajaaw soldado xuyuq'eej i ki'ib' chi k'amal kib'eeh ru soldado. Eh xuq'or keh chi kipab'aa' ki'ib'-oq siento i soldado reh chi nee kiooj chi kooq Cesarea b'elejeeb' ora aaq'ab', eh lajeeb' rukajwinaq i nee kiooj rij kawáyu, ki'ib' siento i neenkik'am kiq'as ju' ch'ihch'.

²⁴Xuq'or keh chi kisik' i kawáyu ree roojb'aal i Pablo. Eh xuq'or keh chi kib'esaj reje parukorkiil, reh chi suq ruk'ux noq neemponik chuwach i q'atal q'orik, Félix rub'ihnaal.

²⁵Xuyeew keh jinaj i huuj je' wili i ruq'or i chupaam:

²⁶Re' hin i Claudio Lisias, xin taaq'anik reje aweh i huuj wili i hat Félix, q'atal q'orik nim wajaawriik, xnutaq'aaj reje rusuqkiil ak'ux.

²⁷Eh inuq'or reje aweh chi wilik taqe i aj judío xichopwik reh i winaq wili, eh xanaa naq chik kikansam. Noq xb'iraj chi aj Roma i winaq naa naq kikansam, xinooj chi ruko'ljiik wuch'ihil taqe nu soldado.

²⁸Eh re' hin xwaaj nunab'eem chib'ih jariik i ru mahk chikiwach. Ruum aj re', xnuk'am reje chikiwach i juntzuhb' chi q'atal q'orik chi kixilak i aj judío.

²⁹Eh xnureq chi riij chi xa ruum chi ma' runimaj taj i k'uhb'aal inkinimaj i keh inkitz'aq ru mahk. Eh ma' xta rub'ehel chi neenkanteesjik, eh je' wo' chi neenye'arik pantz'ilom.

³⁰Eh xq'orarik weh chi re' taqe aj judío k'ahchi' kiyejaam wach rukanteesjiik. Ruum aj re', xnutaq'aaj reje awuuk', xnuq'or keh i kitz'aqwik ru mahk chi ko awuuk' chik i hat neenooj kiyejaa' wach chib'ih jariik i ru mahk chikiwach, inki reje panhuuj.

³¹Re' taqe soldado xkinimaj wo' hoq nik' wach i xq'orarik keh. Xkisaj chaloq i Pablo eh xkik'am reje chaq'ab' kopan tinamit Antípatris.

³²Re' taqe soldado i xiooj chi kooq xi sutinik wo' chik cho parukab' q'iij chupaam i paat wilkeeb' wii'. Eh re' taqe i xiooj rij kawáyu, ko xiooj chukanab'jiik i Pablo.

³³Noq xi ponik Cesarea taqe soldado, xkiyeew i huuj pan q'ab' i q'atal q'orik, Félix rub'ihnaal, eh xkiq'asaj wo' hoq i Pablo chuwach.

³⁴Rukohlaam-oq chik rilariik wach i huuj i q'atal q'orik, xupech'uj ree Pablo aha' i rutinamitaal. Eh noq xrib'iraj chi Cilicia inchalik,

³⁵je' wili xuq'or reh: Kore' chik naab'iram aweh na' kik'oloq iloq taqe i kitz'aqwik amahk, inki reh. Eh xutaq'aaj cha'jen ree Pablo chupaam i paat ruyejaam i Herodes.