Read Poqomchi 2 Kor 10 Bible Online

2 Kor 10 - Poqomchi bible

2 Kor 10

¹Re' hin i Pablo, parub'ihnaal i Jesucristo wilik chaq'lamiil, wilik otob'il ruuk', i nupahqaaj taq reje otob'il aweh. Xa re' la', wilik b'ila' kiq'orik reh chi noq wilkiin taq chaxilak, xa hin b'ila' chik chaq'laam. Eh noq najt wilkiin taq awuuk', panaqaaw b'ila' taq tinuq'o'reej reje panhuuj.

²Eh re' hin i nupahqaaj taq otob'il aweh chi noq nee kinooj k'oloq taq awuuk', makinamin taq chupaam chi kow nee nuq'o'reej taqe i kitz'aqwik qamahk, re' i kiq'orik reh chi xa runa'ojb'al winaq inqaq'or. Re' hin nuchopom nuk'ux chi naa nuk'ulb'ilem taqe.

³Korik noq re' hoj xa hoj wo' winaq, xa re' la' ma' qoh peletohinik ta chik je' rukab' i peleto inki a'n i winaq.

⁴Re' inqakoj chi ko'lemb'al qiib' i hoj chuwach i q'orik inkitz'aq chiqiij ma' re' ta rajaawriik jino'q winaq. Re' la' i rajaawriik i Dios, re' i rub'an rusachariik wach i kajaawriik i kow inki a'n kiib'.

⁵Eh inqasach wo' wach i kina'ojb'al taqe i kikaqrik, ruum chi ma' nkaaj ta chi nqayeew chi naab'jik i ruk'uhb'aal i Dios. Chu'nchel i ma' holohik taj inkikapaaj chiqiij inqakanaa' pan q'ab' i Jesucristo, reh chi neenkinimaj i reh.

⁶Re' hoj neenqayeew taqe chutojariik i kimahk i ma' kinimanik ta reh i Dios. Eh re' taq i hat ma' nee ta taq ti qayeew chutojariik amahk, wii' xat nimanik taq.

⁷Re' taq i hat xa re' wo' taq inawilow i runa'ojb'al i ruk'uhtaaj i ju'jun. Je' re' noq, wila' awach taq aweh i ruq'or cho paruk'ux chi re' reh raj kamanoom i Jesucristo, inchol rukapaam riij noq hoj wo' raj kamanoom i Jesucristo i hoj.

⁸Eh atoob' ta kow nee taq tinuq'o'reej k'isinoq ruuk' wajaawriik, re' hin ma' xta neekink'ixik wii'. Ruum re' QaJaaw xuyeew qajaawriik reh i ruye'ariik rukowiil taq ak'ux, ma' hoj ta inche yojol taq ak'ux.

⁹Re' hin ma' nwaaj ta chi nee taq inakapaaj chi xa yohb'esb'al taq aweh i nub'an reje ruuk' i nuuhuuj.

¹⁰Eh wilik b'ila' kiq'orik reh taq chaxilak chi je' wili: Re' taqe q'orik i rutaq'aaj cho panhuuj i Pablo kowlaj q'orik. Raaj noq wilik chi qaxilak, xa inyo'jik chi q'orik, xama' xta inokik wii' i ruq'or, inki b'ila' taqe.

¹¹Eh re' inq'orik reh chi je' re', inchol runab'eem chi nik' wach i q'orik inqakoj reje pan qahuuj noq najt wilkooj noq inqataq'aaj taq reje aweh, je' wo' re' taq aq'orob'jiik neenqa a'n noq nee qoh wihik taq chaxilak.

¹²Re' hoj ma' nqaaj ta chi neenqa a'n eliik wach qana'ojb'al, oon neenqapaj qiib' kuuk' taqe i xa nkiyeew runimaal kiwach chi kib'il kiib'. Re' keh kimemil inki a'n wii' noq inkiyeew runimaal kiwach, eh k'ul inki a'n eliik wach i kina'ojb'al.

¹³Re' hoj ma' nee ta nqanimb'isaj qawach chub'aan i kamanik ma' ye'ooj ta q'ab' qeh chi naa qa'nam. Re' la' Dios ink'uhtanik qeh ko aha' naa qaponiik chub'aan i rukamaj. Eh re' wo' Dios xye'wik q'ab' qeh chi xoj ponik taq awuuk' ko ar Corinto.

¹⁴Ruum aj re', ma' k'ahchi' ta qaq'ahxiik pan tokoom ye'aab' chuq'orariik i k'uhb'aal. Awuuk' la' taq i hat xoj ponik chi peet. Re' hoj i xoj ponik chi peet taq awuuk' chuq'orariik taq aweh i ru ak' k'uhb'aal i Jesucristo.

¹⁵Eh re' hoj ma' jaruuj neenqanimb'isaj qawach ruuk' kamanik tokoom b'aninaq cho ruk'axkiil. Inqaaj la' hoj chi kopeet naa qakamaniik taq chaxilak, reh chi nee taq inkoowjik ak'ux ruuk' taq animaniik, atoob' ta xa ar pee nee qoh wihik chi kamanik aha' hoj ruye'em wii' i Dios.

¹⁶Chi je' re' neenqa a'n ruq'orariik rib'iral i ak' k'uhb'aal ko wulu' reje reh i ye'aab' wilkaat taq wii' i hat. Xa re' la', ma' nee ta chik inqamin qiib' aha' q'orooj chik wii' i ak' k'uhb'aal, reh chi ma' nee ta nqanimb'isaj qawach ruuk' i kamanik rub'anam i tokoom,

¹⁷ruum pan santo laj huuj je' wili i ruq'or: Awach iraaj chi neen wihik runimaal wach, wih-oq runimaal wach parub'ihnaal i QaJaaw, inki.

¹⁸Awach i xa chi rib'il riib' i ruyeew runimaal wach, ma' xta neenokik wii'. Re' la' i xiik' naah loq'il awach inye'arik runimaal wach ruum i QaJaaw Jesucristo.