Read Poqomchi 2 Kor 12 Bible Online

2 Kor 12 - Poqomchi bible

2 Kor 12

¹Xa ma' xta neerutiq weh chi xa neenunimb'isaj nuwach chi wib'il wiib'. Xa re' la' inwaaj nuk'utjaam taq aweh taqe xwilow, taqe i xuk'uhtaaj weh i QaJaaw Jesucristo panusaq wiriik.

²Eh ink'ulik panuk'ux i xwilow chaloq kajlaj haab' yu'naak noq xa re' yu' xink'amarik johtoq paroox ch'iht i taxaaj. Ma' weht'al taj mi chi nuti'jolal oon re' i wánjel nut'iosil xponik ar xa re' wo' Dios reht'al.

³Re' hin ma' weht'al taj mi chi nuti'jolal oon xa re' i wánjel nut'iosil xk'amarik johtoq xa re' wo' Dios reht'al.

⁴Xink'amarik johtoq chupaam i ye'aab' xiik' naah holwochiil, re' i xq'orarik wii' weh i q'orik ma' ib'irimaj ta chaloq eh ma' awach ta wo' aj eh ye'ooj q'ab' chi nee ta rub'an ruq'orariik.

⁵Re' hin nee naq inunimb'isaj nuwach chi riij taqe i xponik b'iraj pan taxaaj. Xa re' la', ma' nee ta ruyee riib', ruum chi wib'il wiib' i hin ma' xta wajaawriik.

⁶Atoob' ta wo' naq inche neenunimb'isaj nuwach, ma' re' ta wo' naqsah cheel na'ojb'al, ruum xti korik ixb'iraj chaloq. Xa re' la' ma' nunimb'isaj ta nuwach, reh chi ma' awach ta nee nq'orik reh chi q'e' nunimb'isaj nuwach ruuk' i nub'an, ruuk' i nuq'or.

⁷Reh chi ma' xnunimb'isaj ta nuwach ruuk' i xiik' naah loq'il xk'uhtjik cho weh pan taxaaj, jinaj i runimaal ti' xye'arik cho weh. Eh yu'naak, je' ruk'ihaal k'iix i ch'apalkeeb' panuti'jolal, rutaaq'aniik chaloq i aj Yahm, re' xraaj i reh chi k'ahchi' rub'anam ti' k'axik weh.

⁸Re' hin oxpech axnupahqaaj panutiij ree QaJaaw Jesucristo chi resaj chi nunaah i ti' k'axik wili.

⁹Eh re' i QaJaaw Jesucristo je' wili i xuq'or weh: Chakuy peet i ti' k'axik, re' hin nee tinutob'eej. Weht'al noq kuuk' i ma' xta kikowiil, ink'utinik i wajaawriik, inki. Re' hin q'e' insuuqb'ik nuk'ux chi ma' xta nukowiil chi wib'il wiib', reh chi neenk'utinik wuuk' i rajaawriik i Jesucristo.

¹⁰Re' hin suq nuk'ux chi ma' xta nukowiil chi wib'il wiib'. Suq nuk'ux noq inuk'ul i b'ajarik, noq ma' xta wilik weh, noq inixowjik nuwach, noq inuk'ul i k'axik chi riij ruk'uhb'aal i Jesucristo. Insuuqb'ik wo' nuk'ux nik' ma' xta nukowiil inwik'raaj, ruum ar i nukoj rehtaal chi wilik wajaawriik.

¹¹Re' hin, xnumin wach i ruye'ariik runimaal nuwach. Ruum xi namin taq chupaam, xanaah re' i ruk'ul naq chi re' taq i hat holohik xat q'orik chi wiij, ruum hin raj tahqaneel i Jesucristo. Re' hin ma' nee ta inkiq'at nuwach i nimaq kiwach aj tahqaneel inki a'n kiib', atoob' ta naq ma' xta wajaawriik noq inkiq'or.

¹²Re' la' taqe i ma' ilooj taj, re' taqe xnuk'uhtaaj chaloq, re' taqe nimaq wach sahchb'al k'uxliis xnub'an cho ruuk' q'unil noq xinwihik taq cho chaxilak xk'uhtanik reh chi korik noq hin manlik raj tahqaneel i Jesucristo.

¹³Re' taq i hat xa jinaj i k'isiin wach ma' xa a'n ta taq wuuk' chuwach i xkian wuuk' taqe aj nimaneel xinik'ik cho wii': Re' chi ma' xnuyeew ta taq ihq cha naah reh i nutoob'jiik. Wila' ma' holohik i xnub'an cha kuy taq numahk.

¹⁴Re' hin xnuyejaa' chik wach chi naawojiik roxpeech taq cha wilariik. Eh na' kinponoq, ma' naa ta wo' chik nuye'em i ihq taq cha naah reh i nuk'uxuljiik, ruum ma' re' taj i chib'ih taq aweh inwaaj, re' la' taq i hat tiwaaj. Eh re' taqe tuutb'ees ajaab'ees kik'uxlanik reh i kiha'lak'uun, ma' re' ta taqe i ha'lak'un kik'uxlanik reh i kituut kajaaw.

¹⁵Re' hin, chu'nchel chib'ih wilik weh ma' ti' ta nuk'ux chusachariik. Eh ma' ti' ta wo' nuk'ux chi nee nuq'uhtisaj wiib' taq cha toob'jiik. Re' hin xti korik chi q'e' taq tiwaaj, atoob' ta re' taq i hat ma' q'e' ta taq kinawaaj.

¹⁶Re' hin xti korik noq ma' xta jino'q ihq xnuyeew taq cha naah ree nuk'uxuljiik, atoob' ta wilik kiq'orik reh taq chaxilak chi xinchol okik taq awuuk' reh taq aajot'ariik.

¹⁷¿Chihreet noq nee taq tinujot'? Ma' awach ta jino'q keh i xnutaq'aaj taq reje awuuk' xi ponik jot' woq taq aweh.

¹⁸Re' hin xnupahqaaj otob'il ree qahermano Tito noq xponik taq cha wilariik, eh jinaj wo' hermano xnutaq'aaj chi ruch'ihil. Re' Tito ma' re' ta taq jot'ol aweh xponik. Ruuk' la' reh taq xakoj rehtaal chi jinaj wach qakapeew, eh jinaj wach qana'ojb'al ruuk' i reh.

¹⁹Re' taq i hat inakapaaj naa taq chi re' inqaq'or wili xa ko'lb'al qiib' taq chawach, reht'al la' Dios chi korik inqaq'or, ruum hoj chik reh i Jesucristo. Eh chu'nchel i xqaq'or wili, hat taq loq'laj hermano, ye'b'al rukowiil taq ak'ux.

²⁰Re' hin kinkapeb'inik chi riij i wojiik k'oloq taq awuuk', ruum mo'-oq xat nureq taq chi je' rukab' inwaaj i hin, xinooj-oq k'oloq taq awuuk' chi ma' je' ta rukab' taq inawaaj i hat. Kiyo'jik ruum ko wilik-oq taq chaxilak pletohinik iib', kaqwachinik iib', josq'iil, niimb'isanik wachiis, moloj wach k'utaaj, ch'olinik iib', q'et q'etiil, tukinik wachiis.

²¹Re' hin yo'jik i nub'an, ruum nee-oq taq inak'uhtaaj nuk'ixb'ilaal chuwach i nuDios ruuk' taq ana'ojb'al. Eh nee-oq kinoq'ik kuum taqe i xa najtir wo' nkitoq'aa' cho mahkunik, eh yu'naak xama' kimayam ta-oq wo' rub'aan i ch'uwa' wach na'ojb'al, kok'ahchi'-oq wo' keeb' chi k'oyomal, chub'aan i yiib' wach tuskil.