Read Poqomchi 2 Kor 8 Bible Online

2 Kor 8 - Poqomchi bible

2 Kor 8

¹Hat taq nuhermano, inqaaj qak'utjaam taq aweh i rotob'il i Dios k'ahchi' kik'ulum ju'jun ch'uq chi aj nimaneel wilkeeb' ayu' Macedonia.

²Atoob' ta ma' k'isa ti' k'axik i xkik'ul chi pajb'al keh, xiik' chik naah suq kiil kik'ux. Atoob' ta q'e' taqe neb'aa', xa je' chik taqe b'ehoom, ruum xiik' naah k'ihaal i kilemoxna xkiyeew chi chu'nchel kik'ux.

³Re' hin weht'al chi chu'nchel kik'ux xkiyeew i kilemoxna re' q'oreel nik' k'ihaal i xkikuy ruye'ariik, eh ko xkimanaa' wo' chik ruye'ariik.

⁴Re' keh xa toq' toq' chik xkian qeh chi neenqayeew q'ab' keh chi neekiokik haa' chub'aan i toob'inik quuk' toob'al keh i rutinamiit i Dios wilkeeb' cho Jerusaleem.

⁵Re' hoj ma' nqakapaaj ta naq chi xiik' ta naah i toob'inik naa kianam. Xkiq'asaj la' kiib' chi peet parukamaj i QaJaaw Jesucristo. Eh chi riij i re' xoj kitob'eej i hoj je' rukab' iraaj i Dios.

⁶Ruum aj re', re' hoj xqapahqaaj otob'il reh i Tito chi nee wo' chik inooj taq awuuk', reh chi neerumanaa' wach rumolariik i loq'laj lemóxna, re' wo' rutoq'aam cho rub'aan taq chaxilak pampeet.

⁷Re' taq i hat ti elik taq korik ruuk' animaniik, je' ruuk' taq inaq'or, je' ruuk' taq ana'ojb'al, je' ruuk' taq i to'ooj i na a'n, je' ruuk' i k'axaj iib' je' rukab' i xatqatijej taq cho wii'. Je' ta naq re' noq nee taq ti elik korik chuye'ariik taq alemóxna.

⁸Ruuk' taqe nuq'or wili ma' re' ta taq aminariik chupaam i nub'an. Xa reh la' chi nee taq inanab'eej chi nkiyeew kik'ux chi toob'inik taqe i hermano ayu' Macedonia, reh chi nee wo' taq inak'uhtaaj i hat i chi korik taq aweh i k'axooj i na a'n,

⁹ruum aweht'al chik taq i hat chi re' QaJaaw Jesucristo xiik' naah i rotob'il. Eh xiik' naah i rub'ehomal wilik cho pan taxaaj. Xa ruum taq ako'ljiik i hat, xk'ulik rukuy i neb'a'il ayu' wach ak'al, reh chi ruum i runeb'a'il i reh, xuyeew taq ab'ehomal i hat.

¹⁰Re' hin nuq'or taq aweh chi riij taq alemóxna, noq i nuq'or i hin ma' xta reet taq cha weh. Re' taq i hat ma' xata re' ruye'ariik taq alemóxna xatoq'aa' rub'aan je' yu' jinab'ir chu'nchel la' taq ak'ux xatoq'aa' taq aye'em.

¹¹Eh inchol taq amanaam wach ruye'ariik taq alemóxna atoq'aam taq cho ruye'ariik pampeet, re' q'oreel nik' k'ihaal taq i neenakuy ruye'ariik. Eh nik' wach noq xachop taq chak'ux chuye'ariik pampeet, je' wo' chik re' taq i cha a'n yu'naak,

¹²ruum awach iraaj ruye'ariik i rulemóxna chi chu'nchel ruk'ux, re' Dios neemponik chuwach, re' q'oreel nik' k'ihaal i neerub'an ruye'ariik. Re' Dios ma' ruq'or ta qeh chi neenqayeew i ma' xta wo' quuk'.

¹³Re' k'ahchi' nuq'orom wili, ma' re' ta nwaaj chi riij chi xa ruum i kitoob'jiik taqe awuch hermano, neenakuy chib'ih taq aweh i hat.

¹⁴Re' taq i hat wilik chib'ih taq aweh yu'naak chatoob'eej taq i ma' xta wilik keh, ruum pan jinaj q'iij ma' xta-oq chik wilik taq awee hat, re'-oq chik i keh wilik chib'ih keh, re' chik i keh neekitoob'inik taq aweh i hat, reh chi ma' awach ta taq aweh ineerukuy chib'ih reh.

¹⁵Eh je' rukab' i tz'ihb'amaj pan santo laj huuj chi je' wili: Awach i k'ih xumol, xama' xta wo' i xqohxanik chuwach. Eh awach i k'isiin i xumol, manlik wo' reh, inki.

¹⁶Re' hin inut'iosej ree Dios chi xuyeew cho paránima i qahermano Tito chi xraaj taq atoob'jiik je' rukab' taq atoob'jiik inwaaj i hin.

¹⁷Ruum aj re', noq xnupahqaaj otob'il reh chi naa rojiik taq cha wilariik, xama' nim k'ayeew ta noq xuk'ulaa' weh, ruum q'e' raaj taq atoob'jiik. Yu'naak i reh xa paruk'ux xchalik chi naa rojiik taq cha wilariik.

¹⁸Jinaj i hermano naa nutaq'aam reje chi ruch'ihil i Tito, wilik rib'iral kuum taqe aj nimaneel wilkeeb' xa aha' yuuq', ruum i ruyeew ruk'ux chuq'orariik rib'iral i ak' k'uhb'aal.

¹⁹Eh pankomonil kuuk' i hermano xqapab'aa' i qa hermano re' re', reh chi neenooj chiqiij chukanab'jiik i lemóxna ar Jerusaleem. Eh chi nee qoh rutow chumolariik wach i lemóxna k'ahchi' qamolom wach chi loq'oomb'al ree QaJaaw, eh k'uhtb'al reh chi qaye'em qak'ux chi kitoob'jiik taqe quch aj nimaneel.

²⁰Re' hoj ma' nqaaj ta chi awach neentz'aqwik wach q'orik chiqiij ruum i rumolariik wach i ruk'ihaal lemóxna re' re', je' re' noq xqasik' quch'ihil chub'aan.

²¹Ruum aj re', inqachop qak'ux chub'aan chi holohik nee nelik i kamanik wili. Ma' xata chuwach i QaJaaw inqaaj qak'uhtaam inqaaj la' wo' chi neenkikoj rehtaal i tinamit.

²²Jinaj wo' chik i re' ruuk' i qahermano naa nutaq'aam reje chikiij. Re' reh xata wo' jarpech rub'anam chi qawach chi xa chib'ih pa' jariik i neenpa'ab'jik wii' i ruyeew ruk'ux chub'aan. Eh yu'naak xti ruye'em ruk'ux chi toob'inik, ruum xti ch'iklik ruk'ux taq chawiij.

²³Wila' xkipech'uj taq aweh chib'ih rub'anam i Tito, cha q'or taq chi wuch kamanoom, eh chi re' reh intoob'inik weh ruuk' taq atoob'jiik i hat. Eh je' wo' chikiij i ki'ib' chik, cha q'or taq keh chi re' taqe komoon aj nimaneel xipaab'anik reje keh, yeb'al ruloq'il i Jesucristo.

²⁴Eh cha k'uhtaaj taq cho chikiwach hermano wili chi korik chi wilik taq i k'axooj awuuk', reh chi neenkinab'eej i komoon aj nimaneel wilkeeb' ayu', chi korik inqaq'or keh taq chawiij chi wilik k'axooj taq awuuk'.