Read Poqomchi Gal 3 Bible Online

Gal 3 - Poqomchi bible

Gal 3

¹Hat taq aj Galacia, ma' xta taq ana'ojb'al ¿Awach xtaqchi'inik taq aweh chi xakanaa' taq runimjiik i korik? Re' hoj ti xqach'ob' wo' naq taq rub'ehel aweh chib'ih reet noq xye'arik wach kuruus i Jesucristo.

²Xa re' i wili inwaaj chi nee taq naq'or weh: ¿Mi ruum i rub'anariik i ruq'or i najtir k'uhb'aal xak'ul taq i Santolaj Uxlab'al, oon ruum i runimjiik i ru ak' k'uhb'aal i Jesucristo?

³¿Chib'ih reet noq ma' xta taq ana'ojb'al? Wila' xatoq'aa' taq cho runimjiik i Jesucristo ruuk' i Santolaj Uxlab'al, ¿chib'ih reet noq inawaaj taq amanaam wach xa ruuk' i rub'anariik inawaaj taq i hat?

⁴¿Mi ma' xta naa rutiqim taq aweh re' i ti' k'axik taq xak'ul ruum i runimjiik i Jesucristo? Noq i nuq'or i hin chi wilik i naa rutiqim taq aweh.

⁵Eh noq re' Dios i ruyeew taq aweh i ruSantolaj Uxlab'al, eh i rub'aan i ma' ilooj taj taq chaxilak, ¿chihreet noq i rub'an noq inaq'or taq i hat? ma' ruum ta i na a'n taq i ruq'or i najtir k'uhb'aal, xa ruum la' chi nanimaj taq i Jesucristo.

⁶Chakoj taq rehtaal i xub'an, Abraham. Re' reh xunimaj i Dios ruum i re' xk'ularik ruum i Dios chi korik wach ruk'ux.

⁷Je' re' noq, inchol taq anab'eem chi re' taqe i manlik riih rumaam i Abraham re' taqe inkiyeew kik'ux chunimjiik i Dios.

⁸Eh pan santo laj huuj i ruq'or chi re' Dios naa ruko'leem taqe i ma' re' ta taqe aj judío naakiye'em kik'ux chunimjiik i Jesucristo. Re' Dios ruq'orom wo' cho reh i Abraham chi riij i ak' k'uhb'aal chi je' wili: Panab'ihnaal i hat, naa nuye'em i wotob'il chikinaah chu'nchel i tinamit wach ak'al, inki reh.

⁹Je' re' noq, awach taqe i kinimanik reh i Dios inkik'ul wo' hoq i rotob'il i Dios, je' rukab' i ruk'ulum chaloq i Abraham ruuk' i runimaniik.

¹⁰Eh awach taqe inkich'ikaa' kik'ux chinaah i ruq'or i najtir k'uhb'aal, panti' k'axik wilkeeb', ruum pan santo laj huuj i ruq'or chi je' wili: Ye'aroq panti' k'axik ruum i Dios awach i ma' rub'an taj chu'nchel i ruq'or taqe i k'uhb'aal i tz'ihb'amaj chaloq panhuuj, inki.

¹¹Eh, ma' jino'q i neenkahnik chi ma' xta ru mahk, xa ruum i rub'anariik i ruq'or i najtir k'uhb'aal. Ruum pan santo laj huuj je' wili ruq'or: Re' korik wach kik'ux ruum chi kiye'em kik'ux chunimjiik i Dios, naa kireqem i kik'achariik, inki.

¹²Eh re' i najtir k'uhb'aal ma' manlik ta ruuk' chi xa neenimjik. Je' la' wili i ruq'or: Awach i rub'an i ruq'or i k'uhb'aal, ruum i re' naa ruwihiik ruk'achariik, inki.

¹³Re' Jesucristo xoj ruko'leej chuwach i ti' k'axik i ruyeew i najtir k'uhb'aal, ruum i ti' k'axik xuk'ul. Je' rukab' i ruq'or pan santo laj huuj chi je' wili: Re' taqe i ju' chee' kit'uyub'jik noq kikanteesjiik, xiik' naah ti'kiil inkik'ul, inki.

¹⁴Je' re' i xuk'ul i Jesucristo, reh chi parub'ihnaal i reh neen kik'ul i rotob'il i Dios i ma' re' ta taqe aj judío, re' i q'orooj cho reh i Abraham, eh reh chi ruuk' i runimjiik i Jesucristo neenqak'ul i Santolaj Uxlab'al, re' i ruq'orom cho rib'iral i Dios.

¹⁵Hat taq nuhermano, re' hin jinaj i na'ojb'al naa nuq'orom taq aweh: Qaq'or chi re' i winaq xub'an chik i k'aay, eh ruyejaam chik i huuj chi riij rukojom chik i rub'ihnaal ar, ma' awach ta chik neenyojwik wach, ni xata neentiqarik naah.

¹⁶Eh pan santo laj huuj i ruq'or chi re' Dios xuq'or cho reh i Abraham chi wilik i naa ruye'em reh, eh je' wo' reh i riih rumaam. Xa re' la' ma' ruq'or taj chi keh taj i ruk'ihaal chi riih rumaam, i ruq'or la' ar chi xa reh i jinaj chi riih rumaam. Eh re' i jinaj re' re', re' i Jesucristo.

¹⁷Re' nuq'or taq aweh wili: Re' xuyejaa' cho wach i Dios chi riij i Cristo korehtaal xub'an chaloq. Re' najtir k'uhb'aal xutaq'aaj chaloq kijib' siento ruuk' lajeeb' ru ka'winaq haab' chi riij re' ma' xub'an rusachariik wach, eh ma' xusach ta wach i rajaawriik.

¹⁸Eh wi ta ruum i rub'anariik i ruq'or i najtir k'uhb'aal inqak'ul i ko'lemb'al qiib', ma' xta naq chik neen kamanik wii' qeh i q'orooj cho rib'iral reh i Abraham. Raaj i wili xa chi siih xuyeew cho qeh i Dios i ruq'orom cho reh i Abraham.

¹⁹Eh wila' je' re', ¿chaaj wo' kamaj re' i najtir k'uhb'aal? Re' re' i xye'arik cho koq'uun xa k'uhtb'al chikiwach i tinamit chi aj mahk taqe. Korehtaal xk'ulik i q'orooj cho rib'iral reh i Abraham chi riij i riih rumaam re' i Jesucristo. Re' k'uhb'aal re' re', re' taqe i ánjel xiq'orik reh i Moisés, eh re' chik i Moisés xq'orik keh i tinamit.

²⁰Eh noq re' Dios inq'orik chi wilik i naa ruye'em ma' kota ruman chi wilik jalal ruq'oral, ruum re' Dios xa jinaj wo' hoq.

²¹Eh re' wili ¿Mi re' raaj ruq'orom chi re' najtir k'uhb'aal ma' ruk'ul ta ruk'ux i ruq'orom cho rib'iral i Dios? Ra'j xti ma' chih ta re' wita re' k'uhb'aal re' re' inye'wik i rikorkiil wach qak'ux, nee naq inkahnik chi ma' xta qamahk xa ruum i rub'anariik i ruq'or i k'uhb'aal.

²²Eh pan santo laj huuj i ruq'or chi chu'nchel wilkeeb' chi ri'sil i rajaawriik i mahk, reh chi awach neekinimanik reh i Jesucristo, neekiko'ljik, eh neen kik'ul i ruq'orom cho rib'iral i Dios.

²³Eh noq komajaa' naq imponik i ruq'ijil i korik laj nimanik wili, xa je' naq qoh cha'jaljik prexo xub'an chaloq i najtir k'uhb'aal, xa uyumb'al pee reh i nimanik xye'arik cho qeh koq'uun.

²⁴Re' i najtir k'uhb'aal xa qacha'jaljiik i xub'an, korehtaal xk'ulik i Jesucristo, xoj ruk'am ri'sirooq, reh chi ruuk' i runimjiik i reh, xoj ruko'leej chuwach i qamahk.

²⁵Eh yu'naak noq wilik chik i korik laj nimanik, ma' re' ta chik chi ri'sil i rajaawriik i najtir k'uhb'aal wilkooj.

²⁶Eh ruum chi nayeew taq ak'ux chunimjiik i Jesucristo, hat taq chik rak'uun rixq'uun i Dios.

²⁷Eh ruum i ruqajiik taq ahaa', wilkaat taq chik ruuk' i Jesucristo. Ruuk' i re' xuyejaa' taq aak'achariik chub'anariik iraaj i reh.

²⁸Yu'naak, ma' tokoom ta chik aj judío chuwach i ma' re' ta aj judío. Eh ma' tokoom ta chik i xa moso, chuwach i patroon, ma' tokoom ta chik i ma' xta nupatroon. Eh ma' tokoom ta chik winaq, chuwach ixoq, xa jinaj la' taq chik awach parub'ihnaal i Jesucristo.

²⁹Eh wila' aq'asam taq chik awiib' reh i Jesucristo, hat taq chik manlik riih rumaam i Abraham, eh naa taq awehtriik i ruq'orooj cho rib'iral ree reh ruum i Dios.