Read Poqomchi Gal 4 Bible Online

Gal 4 - Poqomchi bible

Gal 4

¹Eh i nuq'or wo' taq aweh i wili: Noq ko k'isiin i naa rehchaniik reh i chib'ih reh i rutuut rajaaw, xa komajaa' wo' nee rehchaaj chi korik. Xa ko je' wo' rukab' i wilik chi mosojik, atoob' ta re' wo' naq i reh naa rehchaniik reh chu'nchel.

²Eh ko wilik pee jino'q incha'jinik reh, chi rilariik i naa ruye'ariik reh. Eh kore' wo' naa ruk'ulum, noq poninaq chik i ruhab'ul, ruq'atam i rajaaw.

³Je' wo' re' i xqak'ul i hoj noq ko je' naq hoj cho kok' ha'lak'un noq komajaa' ink'ulik i Jesucristo, ruum inqanimaj naq i xa chib'ih jariik imb'aan, re' ruuk' i xa na'ojb'al ayu' wach ak'al.

⁴Eh noq xponik i q'iij ruq'atam chaloq i Dios, xutaq'aaj chaloq i Rak'uun ayu' wach ak'al chi xk'ulik aasjoq ruuk' jinaj ixoq, chi ri'sil i rajaawriik i najtir k'uhb'aal.

⁵Reh i qako'ljiik chuwach i rajaawriik i najtir k'uhb'aal inchopwik naq qanaah, eh reh wo' chi xoj rukoj chi hoj manlik rak'uun rixq'uun.

⁶Eh k'uhtb'al reh chi hoj manlik rak'uun rixq'uun i Dios, xuyeew cho pan qánima i Ruxlab'al i Rak'uun. Eh re' Uxlab'al re' re' je' wili i ruq'or johtoq chi kow: Hat WaJaaw inki.

⁷Re' hat yu'naak, ma' hat ta chik moso minooj pankowlaj kamanik hat la' chik rak'uun rixq'uun i Dios. Eh ruum i re', naa awehtriik haa' i kooch ruq'orom cho rib'iral parub'ihnaal i Jesucristo.

⁸Re' taq i hat hermano noq komajaa' taq inanimaj i k'achlik Dios, xa nayeew naq chik taq ak'ux chi kilooq'jiik tiyoox, re' ma' re' ta wo' taqe Dios.

⁹Eh yu'naak, noq xanimaj taq chik i k'achlik Dios, oon x-eht'alinik taq chaawach chi peet Dios. ¿Chib'ih chik reet noq inawaaj wo' chik taq aaka'pechem anajtir na'ojb'al, inawaaj wo' chik taq aloq'em taqe i tiyoox re' re' xama' xta wo' kajaawriik?

¹⁰Re' taq i hat maa a'n taq chik i ninq'iij taq i na a'n xanik', rajlaal pooh, pank'amb'al rub'eeh poh, rajlaal haab'.

¹¹Re' hin kinqaaj kapeew taq awuum, ruum je' inchi xama' xta xutiq wach i rukamaj i Dios poninaq nub'anam taq chaxilak.

¹²Hat taq nuhermano, i nupahqaaj taq otob'il aweh, cha tijej taq aweh i nub'an i hin, ruum re' hin xnub'an jinaj nuwach taq awuuk' i hat. Eh re' taq i hat ma' xta ti' k'axik taq a'nam cho weh.

¹³Aweht'al wo' taq i hat chi xa ruum yab'ilaal xin kahnik ar Galacia. Xa ruum i re' xnub'an ruq'orariik taq aweh pampeet i ak' k'uhb'aal.

¹⁴Eh ni xata ruum i yab'ilaal re' re' xawixowaaj taq nuwach, ni xata ruum i re' xinakaaj taq cho chaxilak. Xinak'ul la' taq awuuk' chi je' jino'q ruánjel i Dios, je' kink'ularik Jesucristo taq xi na' a'n.

¹⁵¿Aha' chik xooj i rusuqkiil taq awánima chi wiij noq xinwihik taq chaawuuk' najtir? Re' hin weht'al chi korik chi hat taq atoob'. Wi ta xuyee riib' chi xawisaj taq iloq i naq'awach, xayeew naa naq taq chi k'axb'al weh.

¹⁶Eh raaj yu'naak, ¿mi nawixowaaj taq chik nuwach re' xa ruum chi nuq'orom taq chaaweh i korik?

¹⁷Re' taqe aj taqchi' re' re' tikik'ax tii chik taq inki a'n kiib'. Xanaah re', xa re' inkaaj i chi neenyoj taq ak'ux chunimjiik i ak' k'uhb'aal qaq'orom taq chaaweh. Re' naq chik inkik'uhtaaj i keh inkaaj chi nee taq inaq'or rib'iral.

¹⁸Re' hin i nuq'or taq aweh chi ma' xta reet chi neen taq tikitob'eej chi juneliik, xa re' la' korik-oq keh, mo'q xa re' neenkian noq wilkiin taq chaxilak.

¹⁹Hat taq wak'uun wixq'uun noq wilkaat q'e' ti' i wánima taq awuum, je' ti'kiil i nik'ik ixoq noq ink'ulik ruk'ux. Re' i ti' wili, ma' ik'ik ta reh, kore' wo' naa nenik'ik wila' xaq'asaj taq awiib' chi korik reh i Jesucristo.

²⁰Re' hin xanwaaj naq chik chi wilkiin ta ponoq taq awuuk' yu'naak, reh chi nee naq inureq chi riij nik' wach taq aq'orob'jiik inawaaj, ruum re' hin ma' nureq ta chik chi riij chib'ih taq i naa nub'anam awuuk'.

²¹Re' taq i hat, i nik' taq ak'ihaal inawaaj taq wihik chi ri'sil i rajaawriik i najtir k'uhb'aal, cha q'or taq weh i wili: ¿Mi ma' ab'iram taq cho chi korik re' i ruq'or i k'uhb'aal re' re'?

²²I ruq'or ar chi re' Abraham ki'ib' i rak'uun xwihik. Jinaj i rak'uun xwihik ruuk' i raj pooh. Eh jinaj i rak'uun, xwihik ruuk' i xti rehk'een.

²³Re' rak'uun i x-aasjik ruuk' i raj pooh xa je' rukab' noq ki-aasjik chu'nchel i ha'lak'un. Eh re' i rak'uun x-aasjik ruuk' i xti rehk'een, x-aasjik ruum q'orooj cho rib'iral keh ruum i Dios.

²⁴Re' ki'ib' chi ixoq wili kijalwaach i ki'ib' chi k'uhb'aal. Re' peet k'uhb'aal, re' i xk'ularik cho chinaah i yuuq' Sinaí, re' Agar i rujalwaach. Eh re' i kinimanik reh k'uhb'aal re' re' i rukanaa' taqe chi xa je' minooj pankowlaj kamanik.

²⁵Re' Agar rujalwaach i yuuq' Sinaí, re' i wilik ar Arabia, eh rujalwaach wo' hoq i Jerusaleem wilik yu'naak ruum re' taqe patineel wilkeeb' ar, xa ko je' wo' minooj taqe pankowlaj kamanik ruum i najtir k'uhb'aal.

²⁶Eh raaj i Sara reh rujalwaach i Jerusaleem wilik cho pan taxaaj, je' qatuut noq wilik, ruum ma' je' ta chik hoj ruye'em pankowlaj kamanik i hoj chik rak'uun rixq'uun.

²⁷Eh pan santo laj huuj je' wili ruq'or chi riij i Sara: Suuqb'oq ak'ux i hat tuut, i ma' hat ta ak'unoom ixoq. Chak'er aachii' ruum i rusuqkiil ak'ux, ruum ma' xawiik'raaj ta chaaweh ruti'kiil ak'unanik ruum je' hat, kanamaj ruum ab'ahiil, ma' k'isiin awak'uun awixq'uun naa ruwihiik chuwach i rak'uun rixq'uun ixoq i xa chi mosojik naq wilik, inki.

²⁸Je' re' noq re' hoj yu'naak hermano, je' chik qakab' Isaac, ruum xojrukoj chik chi hoj rak'uun rixq'uun i Dios je' rukab' i ruq'orom cho rib'iral reh i Abraham.

²⁹Eh nik' wach i xk'ularik cho najtir, je' wo' re' k'ahchi' ruk'ulariik yu'naak: Re' k'isa k'un, i aasjinaq chaloq chi je' rukab' noq ki-aasjik chu'nchel i ha'lak'un, xrixowaaj cho wach i k'isa k'un i aasjinaq cho ruuk' i rajaawriik i Santolaj Uxlab'al.

³⁰Eh ¿chib'ih jariik i ruq'or pan santo laj huuj chi je' wili? Chakaaj reje ixoq xa chi mosojik wilik ruch'ihil i k'isa rak'uun, ruum re' rak'uun aj poh, ma' ruk'ul ta chi neenehtrik haa' i rukooch naa ruye'ariik reh i k'isa rak'uun i xti manlik ehk'eenb'ees, inki.

³¹Je' re' noq re' hoj hermano, ma' je' ta chik hoj rak'uun rixq'uun ixoq xa chi mosojik naq wilik. Je' la' hoj rak'uun rixq'uun i xti manlik ehk'eenb'ees.