Read Poqomchi Efe 1 Bible Online

Efe 1 - Poqomchi bible

Efe 1

¹Re' hin i Pablo, hin raj tahqaneel i Jesucristo, ruum je' re' i xraaj i Dios wuuk'. Inutz'ihb'aaj reje huuj wili ye'b'al taq rusuqkiil ak'ux taq i hat wilik taq santohiil korik taq wach ak'ux chunimjiik i Jesucristo i wilkaat taq Éfeso.

²Re' ta naq Ajaab'ees Dios, i QaJaaw Jesucristo neen kiyeew taq cho panawánima i kotob'il, i suq kiil k'uxliis.

³Hermano, qayeew taq ruloq'il i Dios, re' raJaaw i QaJaaw Jesucristo. Ruum re' Dios parub'ihnaal i Jesucristo i ruyeew cho qeh chu'nchel i rotob'il panuxlab'al kopan taxaaj.

⁴Re' Dios noq komajaa' i rutz'uhkrisaj i wach ak'al, xanoq wo' xusik' cho qawach parub'ihnaal i Jesucristo reh chi naa qak'achariik pan santohiil, eh chi ma' xta qamahk.

⁵Eh ruuk' ruk'axb'al xraaj chi parub'ihnaal i Jesucristo xojrukoj chi hoj rak'uun rixq'uun. Re' Dios paruk'ux xchalik chi je' re' otob'il xub'an quuk'.

⁶Reh chi neenqayeew ruloq'il i Dios chi eliik ruum i loq'laj rotob'il xub'an quuk'. Reh wo' chi xoj ruk'ul ruuk' parub'ihnaal i loq'laj Rak'uun.

⁷Ruuk' i runimaal i ruk'axb'al i Dios, xojruko'leej ruuk' i rukik'eel xuchihkaaj i Rak'uun noq xkimik, reh chi xukuy chu'nchel i qamahk.

⁸Re' Dios xuyeew qeh chu'nchel i holohik laj na'ojb'al, je' wo' hoq i rureqariik chi riij i rub'ehel.

⁹Eh re' Dios xuyeew wo' qeh chi naab'jik i xchalik paruk'ux i reh, re' i ma' eht'alimaj ta naq i ruyejaam cho wach i chi narojiik eloq wach re' i ruq'orom chaloq najtir.

¹⁰Eh naa rojiik eloq wach manlik paruq'ijil. Re' Dios naa rumolom kiwach i rutz'uhkrisam chaloq, chi je' wilkeeb' pan taxaaj chi je' wilkeeb' wach ak'al naa ruye'em taqe chi ri'sil i rajaawriik i Jesucristo.

¹¹Re' i hoj xanoq wo' xusik' cho qawach i Dios, chi xoj rukoj chi rak'uun rixq'uun parub'ihnaal i Jesucristo. Eh xuyeew qeh i qakooch xuyejaa' cho wach pampeet i Dios, re' imb'anik reh chu'nchel i chib'ih jariik, je' rukab' iraaj i reh.

¹²Re' Dios xusik' cho qawach, re' xraaj i reh chi peet i hoj xqayeew qak'ux chunimjiik i Jesucristo. Eh re' wo' xraaj chi xqak'uhtaaj i runimaal i rotob'il xuyeew cho qeh.

¹³Eh je' wo' re' taq i xa a'n i hat, i ma' hat ta taq aj judío. Noq xab'iraj taq i korik, re' i ak' k'uhb'aal ko'lb'al taq awiib', xanimaj taq i Jesucristo. Eh re' Dios xatrukanaa' taq chi hat rak'uun rixq'uun, xukoj taq awehtalil ruuk' i Santolaj Uxlab'al ruq'orom cho rib'iral.

¹⁴Re' Santolaj Uxlab'al xa raa' ri'sil peet i qakooch naa ruye'em qeh i Dios noq naa rumanaam wach i qako'ljiik i hoj rak'uun rixq'uun, reh chi naaqaye'em runimaal wach i ruloq'il.

¹⁵Ruum i wili hermano, noq xb'iraj taq awib'iral chi aye'em taq ak'ux chunimjiik i QaJaaw Jesucristo, chi nayeew taq ak'ux chi kik'axariik taqe rak'uun rixq'uun i Dios,

¹⁶ma' nukanaa' ta chik rut'iosjiik ree Dios taq chawiij. Eh xa eliik chik taq tik'ulik panuk'ux noq i nub'an nutiij.

¹⁷Re' hin i nupahqaaj panutiij reh i loq'laj Ajaab'ees Dios, i RaJaaw i QaJaaw Jesucristo, chi chuyeew taq ana'ojb'al chupaam taq animaniik, eh chi chuyeew taq ana'ojb'al chureqariik chi riij iraaj i reh.

¹⁸Eh i nupahqaaj ree Dios chi chusaquumb'isaj paam taq akapeb'aal, reh chi nee taq inaweht'aliij chib'ih reet noq xusik' taq chaawach i Dios, chib'ih taq k'ahchi' awuy-eem, eh chi nee taq inaweht'aliij chi ma' k'isiin ta loq'il i kikooch naa ruye'em i santo laj rutinamiit.

¹⁹Eh reh wo' chi nee taq inaweht'aliij chi re' Dios xiik' naah nimaal rajaawriik i ruyeew qeh i hoj i qohnimanik reh. Re' wo' rajaawriik wili xuk'uhtaaj qeh,

²⁰noq xruksaj wo' chik chaloq i Jesucristo chi k'achlik wach, eh xutzunaa' parusak'aaj q'ab' ar pan taxaaj.

²¹Eh re' Jesucristo xuyeew rajaawriik chikinaah chu'nchel i xa reh reh wach kajaawriik chi taaq'anik, chi je' wilkeeb' pan taxaaj, chi je' wilkeeb'wach ak'al. Eh naa wo' ruwihiik rajaawriik chupaam i junch'iht chik chi k'acharik.

²²Eh chu'nchel i xa chib'ih jariik wilik xuq'asaj pan q'ab' i Jesucristo, re' wo' reh xupab'aa' chi k'amal kib'eeh taqe komoon aj nimaneel.

²³Re' taqe jilow rooq q'ab' i Jesucristo, re' kimananik wach i ruloq'il, re' inye'wik reh, ineht'alinik reh chu'nchel chib'ih jariik i wilik.