Read Poqomchi Efe 2 Bible Online

Efe 2 - Poqomchi bible

Efe 2

¹Re' taq i hat hermano, xuyeew taq aak'achariik i Jesucristo noq hat naq taq cho kamnaq chupaam taq mahk.

²I na a'n naq taq chaaweh i yiib' wach na'ojb'al wach ak'al. Eh re' naq taq i na a'n imponik chuwach i ma' tob'laj uxlab'al intaaq'anik cho panteew. Re' iminwik keh chub'aan i yiib' wach na'ojb'al i ma' kinimanik ta ree Dios.

³Chi qunchelaal i hoj, je' wo' naq re' inqa a'n cho najtir. Xa re' naq i ruk'ax wach i qati'jolal inqa a'n. Eh re' naq inqa a'n inqak'ax wach, inqakapaaj i hoj, eh xti ruk'ul wo' naq chi naa ruye'em chi qanaah i rujosq'iil i Dios, eliik naq wach i naa qak'ulum kuuk' i aj mahk.

⁴Raaj i Dios reh xiik' naah i rotob'il, xuketelaaj qawach, eh xti q'e' xojruk'ax,

⁵Eh noq ko hoj naq cho kamnaq chupaam i qamahk, re' Dios xuyeew qak'achariik je' rukab' i xub'an ruuk' i Jesucristo. Eh je' wo' re' xub'an i Dios taq awuuk' i hat xa ruum i rotob'il xatruko'leej taq.

⁶Re' Dios, hoj junwukteesjiik xub'an cho ruuk' i Jesucristo noq xruksaj wo' chik chaloq chi k'achlik wach. Ruuk' i re' xuyeew qa ye'aab' pan taxaaj ruuk' i Jesucristo.

⁷Je' wili i xub'an k'uhtb'al reh chupaam i q'iij chalik reh chi xiik' naah i qak'axariik i rub'an. Eh chi xoj ruk'ax ruuk' i qako'ljiik xk'ulik rub'an i Jesucristo.

⁸Re' taq i hat, xa ruum chi xanimaj taq i Jesucristo, xatruko'leej taq i Dios ruuk' i runimaal rotob'il. Re' ko'lemb'al iib' wili ma' xata cha wib'il taq awiib' xareq xa ruum la' rotob'il i Dios xusiij taq chaaweh.

⁹Eh ma' ruum ta chi wilik ta taq i holohik laj na'ojb'al xa a'n, ruum i re', ma' ruk'ul taj chi awach i nee runimb'isaj riib',

¹⁰ruum re' Dios xyej-anik cho qeh, re' xraaj i reh chi parub'ihnaal i Jesucristo, xuyeew qeh i ak'laj k'acharik. Reh chi naa qa'nam i holohik laj na'ojb'al, je' rukab' i ruyejaam cho wach i reh pampeet.

¹¹Re' taq i hat, i ma' hat ta taq aj judío, k'oloq taq panak'ux chi re' taqe aj judío, re' impoch'arik naah i kik'achab' kojb'al kehtalil chi aj judío taqe, re' taq i hat inkiq'or taq aweh chi ma' poch'ooj ta taq naah ak'achab'.

¹²Eh noq xub'an chaloq, ma' hat ta naq taq raj nimaneel i Jesucristo. Ma' jinaj ta naq taq awach kuuk' i tinamit Israel. Ma' aweh ta naq taq i ak' k'uhb'aal ruq'orom cho rib'iral i Dios. Ma' xta naq ch'iklik taq reje wii' ak'ux, ma' xta naq taq aaDios.

¹³Raaj yu'naak, hat taq chik haa' chunimjiik i Dios xa ruum i rukik'eel i Jesucristo xuchihkaaj. Re' taq i hat najtir najt naq taq wilkaat ruuk' i Dios, yu'naak ruuk' chik taq wilkaat i koq.

¹⁴Re' i Jesucristo xk'ulik kojwoq qeh pansuqkiil k'uxliis, i hoj naq ka'ch'uq chi tinamit noq wilkooj, chi je' aj Judío, chi je' ma' re' ta aj Judío. Re' reh xk'ulik esanoq ree ixowaal, inq'atwik naq chi qawach.

¹⁵Re' Cristo xk'ulik sachwoq wach i kowlaj taaq'anik naq i rub'an i najtir k'uhb'aal. Eh re' i hoj ka'ch'uq chi tinamit i ma' nqaaj ta naq qawach, xoj ru aak'b'isaj, xub'an chi xa jinaj chik qawach, xoj ruyeew pansuqkiil k'uxliis.

¹⁶Eh ruum i ti'laj kimik xuk'ul i Jesucristo wach kuruus, xusach wach ixowanik qiib' inqa a'n naq chi qawach i hoj ka'ch'uq chi tinamit. Eh xojrukoj ruuk' i Dios panotob'il, xojrukanaa' chi xa jinaj chik qawach.

¹⁷Re' Jesucristo xk'ulik ruq'or i ko'lemb'al iib', re' inye'wik suq laj k'uxliis aweh taq i hat, i ma' hat ta taq aj judío, i ma' nanimaj ta naq taq i Dios, eh qeh hoj, i hoj aj judío, i qohnimanik naq ree Dios noq inqaq'or.

¹⁸Eh xa ruum i Jesucristo neenqa a'n okik panotob'il ruuk' Ajaab'ees Dios chi je' i hoj, chi je' taq i hat, re' jinaj chi Santolaj Uxlab'al neentoob'inik qeh chub'aan.

¹⁹Ruum aj re', re' taq i hat ma' hat ta chik taq tokoom tinamit, ma' hat ta taq chik aj patal. Yu'naak xa jinaj chik wach taq ak'axariik i rub'an i Dios kuuk' i rutinamiit, hat taq chik rak'uun rixq'uun i Dios.

²⁰Re' taq i hat, je' taq akab' i paat ch'iklik chi korik chinaah i raa', ruum i nayeew taq ak'ux chunimjiik i xkik'uhtaaj chaloq taqe aj tahqaneel, taqe jalal ruq'oral i Dios. Eh re' i je' ab'aj kojooj chi rukowiil raa' i paat, re' i Jesucristo.

²¹Noq wilkooj ruuk' i Cristo je' qakab' i paat holohik i korjik i rub'an johtoq, noq xa jinaj chik wach qak'ux chunimjiik i Jesucristo. Korehtaal neenqareq chi je' hoj rupaat QaJaaw.

²²Je' wo' re' taq i hat, noq kow taq chik ak'ux chawunchelaal korehtaal taq ti kahnik chi hat taq rupaat i k'achlik Dios, re' impatinik wii' pan Uxlab'al.