Read Poqomchi Efe 3 Bible Online

Efe 3 - Poqomchi bible

Efe 3

¹Re' hin i Pablo, wilkiin pantz'ilom, ruum i ruq'orariik taq aweh i ruk'uhb'aal i Cristo i ma' hat ta taq aj judío.

²Yu'naak inchol taq anab'eem chi re' Dios ruuk' i rotob'il xirupab'aa' chub'aan i kamanik wili reh toob'al taq aweh.

³Re' Dios xuk'uhtaaj cho weh i ruyejaam cho wach, re' i ma' eht'alimaj ta naq chaloq, re' nuq'orom reje k'isiin rib'iral taq aweh panhuuj.

⁴Eh noq nee taq inawil wach i huuj wili, nee taq inakoj rehtaal chi re' hin korik chi weht'al i ma' eht'alimaj ta naq xk'ulik rub'an i Jesucristo.

⁵Eh ma' awach ta aj eh xye'arik chi naab'jik najtir cho q'iij. Raaj yu'naak, re' Dios ruuk' i ruSantolaj Uxlab'al xuyeew chi naab'jik keh i santo laj jalal ruq'oral, je' wo' qee hoj, i hoj raj tahqaneel i Jesucristo.

⁶Re' chi re' taq i hat i ma' hat ta taq aj judío eliik wach i qakooch naa qak'ulum taq awuuk' i hoj aj judío. Eh naa wo' taq awehtriik haa' parub'ihnaal i Jesucristo i ruq'orom cho rib'iral i Dios, re' i ruq'or i ak' k'uhb'aal.

⁷Eh re' hin xirupab'aa' chaloq i Dios ruuk' i runimaal i rotob'il chi q'orariik rib'iral i ak' k'uhb'aal ruum i re' k'ahchi' nuq'orom yu'naak.

⁸Re' hin xama' xta naq wajaawriik chikiwach i xama' nim ta wach kajaawriik chi kixilak rak'uun rixq'uun i Dios. Eh re' Dios xuyeew weh chi q'orariik taq aweh i ma' hat ta taq aj judío i ak' k'uhb'aal ma' ha' ta chi je' xk'ulik ruyeew i Jesucristo ruuk' i runimaal i rotob'il.

⁹Eh re' Dios, i xtz'uhkrisanik cho reh chu'nchel i xa chib'ih jariik, xuq'or weh chi chu'nchel aj eh naa nuq'orom i ruyejaam cho wach, re' i ma' eht'alimaj ta naq i rutohq'iik chaloq i k'acharik.

¹⁰Re' Dios je' re' i xub'an, reh chi kuuk' chik taqe aj nimaneel, neenkilow yu'naak taqe wilik cho kajaawriik chi taaq'anik pan taxaaj chi re' Dios xiik' naah i runa'ojb'al, eh xanik' wach ruk'uhtjiik xub'an chaloq.

¹¹Re' Dios xub'an i wili je' rukab' i ruyejaam cho wach pampeet reh juneliik, eh korehtaal xooj eloq wach ruuk' i xk'ulik rub'an i QaJaaw Jesucristo.

¹²Eh yu'naak ch'iklik qak'ux chi nee chik inqa a'n okik panotob'il ruuk' i Dios ruum k'ahchi' chik qaye'em qak'ux chunimjiik i Jesucristo.

¹³Ruum aj re', i nupahqaaj taq otob'il aweh chi marub'an taq ki'ib' ak'ux chi nimanik ruum i ti' k'axik k'ahchi' nuk'ulum taq chawiij. Ruum re' wili, naa rukamaniik chi toob'al taq aweh.

¹⁴Ruum aj re', inuxuk'aa' wiib' chi tiij, reh i rupahqaljiik ree Ajaab'ees Dios, re' i raJaaw i QaJaaw Jesucristo, chi nee taq tutoob'eej.

¹⁵Re' i kaJaaw chu'nchel i aj nimaneel, chi je' wilkeeb' pan taxaaj chi je' wilkeeb' wach ak'al.

¹⁶Eh i nupahqaaj wo' reh i Ajaab'ees Dios chi chuyeew taq cho panawánima i loq'laj runimaal i ruk'axb'al, eh chi chuyeew taq rukowiil ak'ux ruuk' i ruSantolaj Uxlab'al.

¹⁷Re' ta naq i Jesucristo neenpatinik taq panawánima ruuk' i nimanik k'ahchi' taq kaat. Eh noq kow taq chik ak'ux, eh wilik taq chik i k'axooj panawánima chi korik,

¹⁸nee taq inareq chi riij kuuk' chu'nchel i aj nimaneel chi re' qak'axariik i rub'an i Jesucristo, ma' pajooj taj i runimaal wach, i runimaal rooq, i ruchamiil paam, runajtiil naah.

¹⁹Re' hin, i nupahqaaj reh i Dios chi nee ta naq inaweht'aliij taq chi re' i k'axooj i rub'an i Jesucristo, xti xiik' wo' chik naah nimaal ruloq'il chuwach inqeht'aliij i hoj. Eh chi je' re', neen wihik taq panawánima chi manlik i rotob'il i Dios.

²⁰Re' i wilik rajaawriik chuye'ariik qeh chi xiik' naah inqapahqaaj reh oon xa neenqakapaaj cho panqak'ux rupahqaljiik. Eh xiik' naah i rotob'il nee ruyeew qeh ruuk' i rajaawriik inkahnik pan qánima.

²¹Re' ta naq i Dios qayeew ruloq'il i hoj i qohnimanik chik reh i Jesucristo. Eh nee ta wo' naq inkiyeew ruloq'il i Dios i jar ch'iht chik chi k'achareel i naakik'iik. Je' ta wo' naq re'.