Read Poqomchi Efe 4 Bible Online

Efe 4 - Poqomchi bible

Efe 4

¹Re' hin wilkiin pantz'ilom ruum i ruq'orariik i ruk'uhb'aal i QaJaaw Jesucristo, i nupahqaaj taq reje otob'il aweh chi ti k'acharoq taq parukorkiil je' rukab' i xraaj taq awuuk' i Dios noq xusik' taq chaawach.

²Eh xa tiloch'ik tik'upik-oq taq atoob'-oq wach taq ak'ux wilik-oq i q'unil taq awuuk', k'ul taq cha kuy amahk chawach ruuk' k'axooj.

³Chachop taq ak'ux chi wihik pan jinaj wach k'uxliis, chi wihik pansuqkiil k'uxliis ruuk' taq atoob'jiik i rub'an i Santolaj Uxlab'al.

⁴Xa jinaj chi nimanik, jinaj chi Uxlab'al. Je' rukab' noq xusik' taq chaa wach i Dios xa jinaj chi ko'lb'al iib' ch'iklik taq reje wii' ak'ux.

⁵Jinaj i QaJaaw, jinaj chi ye'ej k'uxliis chi nimanik, jinaj chi qasanik ha' qak'ulum.

⁶Xa jinaj i Dios re' reh i QaJaaw wilik cho chi qanaah chi qunchelaal. Eh re' reh q'oreel chinaah chu'nchel i chib'ih jariik wilik.

⁷Eh chi qaju'junaal, reh reh wach i qakooch xqak'ul, re' q'oreel chib'ih kamanikaal i xuyeew qeh i Jesucristo.

⁸Ruum panhuuj reh i Salmo je' wili ruq'or: Jaaw re' hat xat johtik pana ye'aab' eh wilik taqe i panti' k'axik wilkeeb' xak'am taqe johtoq chawiij. Eh xayeew kikooch taqe aatinamiit, inki.

⁹Eh ¿chib'ih iraaj ruq'orom i re', chi xjohtik wo' chik pan taxaaj? Re' re' iraaj ruq'orom chi ar wo' xqajik choo pampeet noq xk'ulik ayu' wach ak'al.

¹⁰Eh re' xqajik chaloq, re' wo' chik i reh xjohtik kochinaah i taxaaj, reh chi nee ruyeew i rotob'il chikinaah i wilkeeb' pan taxaaj, i wilkeeb' wach ak'al.

¹¹Eh re' wo' i Jesucristo xpaab'anik keh aj tahqaneel, wilik taqe xupab'aa' chi jalal ruq'oral i Dios, wilik taqe xupab'aa' chi q'orol rib'iral i ak' k'uhb'aal, wilik taqe xupab'aa' chi k'amal b'eeh, eh chi aj tijoom.

¹²Je' re' xub'an reh chi re' taqe i raj kamanoom neenkian i rukamaj. Ruuk' i re', neenkian ruye'ariik i rukowiil kik'ux taqe aj nimaneel re' taqe jilow rooq q'ab' i Jesucristo.

¹³Eh korehtaal i rub'an jinaj wach qak'ux chi nimanik, reh chi neenqeht'aliij aha' wilik iraaj i Rak'uun i Dios. Ruuk' i re', neenkowjik qak'ux, korehtaal inqareq rukorkiil wach ak'ux chi manlik je' rukab' i Jesucristo korik wach ruk'ux.

¹⁴Chi je' re' ma' je' ta chik runa'ojb'al ha'lak'un i qana'ojb'al, ma' xata eeh neenqaq'or keh chukul q'orik ruuk' i xa chib'ih jariik chi tokoom k'uhb'aal neenkiq'or qeh. Eh ma' nee ta chik inqayee qiib' chi jot'arik keh taqe i xa chukul q'orik.

¹⁵Re' la' i korik naa qaq'orom ruuk' k'axooj keh i qas qachaaq'. Eh k'ahchi'-oq qareqem rukorkiil wach qak'ux je' rukab' i rukorkiil wach ruk'ux i Jesucristo, re' i k'amal qab'eeh i hoj, hoj raj nimaneel.

¹⁶Eh re' wo' Jesucristo i molwik kiwach i aj nimaneel, re' taqe i jilow rooq q'ab' i reh. Eh i ruyeew taqe pan jinaj wach k'uxliis, pansuqkiil k'uxliis. Noq kikamanik chik chi korik i ju'jun chi aj nimaneel, ma' xta chik reet i nimanik neenkian chi kunchelaal, nee chik inki a'n i k'axooj chi korik.

¹⁷Re' wili i nuq'or taq reje aweh, eh i nupahqaaj taq otob'il aweh parub'ihnaal i QaJaaw chi maa a'n taq chik awee hat je' rukab' inki a'n i ma' kinimanik ta ree Dios. Re' keh re' inki a'n i kisahchel laj kapeew.

¹⁸Eh q'equm paam i kikapeb'aal. Re' keh ma' k'ahchi' ta kianam rusuqkiil i k'acharik i ruyeew i Dios, ruum ma' xta kina'ojb'al, eh ruum chi q'e' inki kowb'isaj i kánima.

¹⁹Re' keh ma' xta chik inkaaj reh i k'ixik. Xa re' chik inkiyeew chikiwach rub'aan inkootwaaj i keh. Eh ma' kihi'lik ta chik chub'aan chu'nchel i ch'uwa' wach na'ojb'al.

²⁰Raaj taq i hat i k'ahchi' taq chik animam i Jesucristo, ma' xk'uhtjik ta taq chaaweh chi naa taq a'nam taqe re'.

²¹Eh wila' xti korik chi xab'iraj taq rib'iral i Jesucristo, xk'uhtjik taq chaaweh chi manlik chi xa ruuk' wo' reh wilik i korik.

²²Eh chaq'eb' taq chi riij ak'ux ayiib' wach na'ojb'al i naa a'n taq cho najtir. Maa a'n taq chik aweh i je' rukab' i na a'n naq taq chaloq, ruum re' taqe ruk'axariik wach i yiib' wach na'ojb'al injot'wik taq aweh.

²³Eh inchol taq ajalam wach ana'ojb'al, taq akapeb'aal.

²⁴Re' la' chik i ak' na'ojb'al taq cha a'n, re' i rutz'uhkrisam chaloq i Dios. Eh ti k'acharoq taq chi saq taq wach ana'ojb'al, chi korik taq chik wach ak'ux, pan santohiil.

²⁵Je' re' noq maat chukwik taq chik q'orik, korik la' taq naa aq'oriik kuuk' aawas achaaq', ruum chi qunchelaal xa jinaj chik qawach chi nimanik, eh hoj jilow rooq q'ab' i Jesucristo.

²⁶Nik'-oq xchalik taq ak'aah chawach, mat ik'ik taq q'iij chi k'ahinik taq awiib'. Mayeew taq q'ab' ree k'aah chi nee taq tiruyeew pamahk.

²⁷Mayeew taq q'ab' reh i aj Yahm chi nee taq tirujot'.

²⁸Awach-oq taq aweh i ko rub'an i leq', chukanaa' rub'aan. Ruuk' la' ransil chusik' rutumiin chi je' re' wilik i neerusiij keh i neb'aa' ruuk' i rukamaj neerub'an parukorkiil.

²⁹Maaq'or taq chik aweh i hat i yiib' wach q'orik xa re' la' chik i holohik chi q'orarik taq naa aq'orom. Reh chi ma' nee ta taq inayoj kik'ux i nee ki-ib'irinik taq aweh nee la' i nayeew taq rukowiil kik'ux.

³⁰Eh maayeew taq ruti'kiil ruk'ux i Santolaj Uxlab'al, re' i xkojarik taq wii' awehtalil. Eh re' reh naa ruk'uhtaniik reh chi hat taq chik rak'uun rixq'uun i Dios na' ponoq i ruq'ijil noq naa rumanaam wach taq aako'ljiik.

³¹Eh chawisaj taq iloq panawánima i k'ahinik iib', kaqwachinik iib', k'atzk'otik, choqinik iib', b'ajaj-iib'. Eh je' wo' taqe i xa chib'ih jariik chi yiib' wach na'ojb'al.

³²Xa atoob'-oq la' taq wach ak'ux, k'ul taq chaketelaaj awach. Eh k'ul taq cha kuy amahk chawach, je' rukab' noq xukuy taq chaamahk i Dios i hat parub'ihnaal i Jesucristo.