Read Poqomchi Efe 5 Bible Online

Efe 5 - Poqomchi bible

Efe 5

¹Re' taq i hat, i hat taq chik rak'uun rixq'uun i Dios, q'e' taq hat ruk'axam, cha tijej taq awiib' ruuk' i reh.

²Eh cha k'ax taq awiib', je' rukab' i qak'axariik xub'an i Jesucristo, noq xuq'asaj riib' pankimik quum i hoj, xuq'asaj riib' chi jinaj mayiij, q'e' ink'ohnik imponik chuwach i Dios.

³Eh ma' ruk'ul taj chi nee taq inak'utjaaj aweh k'oyomal, i xa chib'ih chik jariik chi ch'uwa' wach na'ojb'al, ni xata re' ruk'axariik wach i tokoom aj eh ruum hat taq chik santo laj aj nimaneel.

⁴Maaq'or taq aweh i k'ixb'ilaal chi q'orarik. Mo'-oq awach taq aweh i xa teheeh wach chuq'orariik i memil laj q'orik. Eh mo'-oq awach taq aweh inq'orik yiib' wach sa'al, re' la' t'iosinik taq naa a'nam.

⁵Aweht'al taq i hat chi re' k'oyoom, chi re' b'anal reh i ch'uwa' wach na'ojb'al, oon k'axal wach b'ehomal, re' taqe re' eliik wach ruuk' i loq'inik tiyoox ma' jaruuj naa rokiik pa runimaal rajaawriik i Jesucristo pa runimaal rajaawriik i Dios.

⁶Maayeew taq chik awiib' chi jot'arik keh i xama' xta rutiq wach inkiq'or, eh ruum taqe yiib' wach na'ojb'al re' re', naa ruye'em chaloq i rujosq'iil i Dios chikinaah i ma' kinimanik ta ree reh.

⁷Ma a'n taq chik aweh re' hat i yiib' wach na'ojb'al inki a'n i keh.

⁸Re' taq i hat najtir, panq'equm naq taq k'acharik i na a'n. Raaj i yu'naak, pan saqum taq chik k'acharik i na a'n ruuk' i qajaaw. Chak'uhtaaj taq re' chi hat taq chik rak'uun rixq'uun i saqum,

⁹ruum noq wilik chik i Santolaj Uxlab'al pan ánima, re' otob'il, re' holohik, re' i korik laj k'acharik i ruyeew.

¹⁰Ruum aj re', cha chop taq ak'ux chub'anariik imponik chuwach i QaJaaw Jesucristo.

¹¹Matokik taq haa' chub'anariik taqe xama' xta kamaj inki a'n i wilkeeb' chi k'acharik panq'equm. Chaq'or la' taq rukorkiil keh chi ma' toob' taj inki a'n

¹²K'ixb'ilaal nare' chi q'orarik aha' wilik inki a'n chi q'eeqmaal taqe ma' re' ta aj nimaneel re' re'.

¹³Eh noq inooj naab'joq taqe inki a'n chi q'eeqmaal, ruum i rureqariik i saqum inkireq chi riij chi ma' toob' taj inki a'n

¹⁴ruum aj re', tz'ihb'amaj chi je' wili: Re' hat, i je' suq awiriik, na'lojoq aweh. Eh re' hat i je' hat kamnaq, wukteen chaloq chi kixilak i kamnaq. Re' Cristo neensihq'inik aweh, inki.

¹⁵Ruum aj re', chawik'raaj taq awiib' i hat. Mo'q xa hat taq min min chub'anariik taq ayiib' wach na'ojb'al, wilik-oq la' taq ana'ojb'al.

¹⁶Re' la' taq cha a'n i ruk'ul chi b'anarik, ruum re' taqe q'iij wilkooj wii', k'axik i k'acharik.

¹⁷Mo'q xa teheeh taq awach chub'aan i re' ma' re'. Chachop la' taq ak'ux chureqariik chi riij iraaj i QaJaaw Jesucristo chi nee taq i na a'n.

¹⁸Ma a'n wo' taq aweh i xohk'rik, ruum re' re' i ruyoj i na'ojb'al. Re' la' i Santolaj Uxlab'al wih-oq taq panawánima chi manlik.

¹⁹Chak'utjaaj la' taq chawach i rotob'il i wilik pan Salmo. Cha a'n taq atz'uuy. Eh titz'uyinoq taq chi chu'nchel awánima chi ye'b'al ruloq'il i QaJaaw Jesucristo.

²⁰Eliik wo' taq chat'iosej ree Ajaab'ees Dios parub'ihnaal i QaJaaw Jesucristo chu'nchel i ruyeew chaaweh.

²¹Re' taq i hat, k'ul taq naa animam awiib' chawach, reh chi nee taq inayohleej i Jesucristo.

²²Re' taq i hat ehk'eenb'ees, tinimanoq taq chikiwach ab'ahiil je' rukab' runimjiik i QaJaaw taq i na a'n,

²³ruum re' b'ahiilb'ees k'amal rub'eeh i ehk'eenb'ees, je' rukab' i Jesucristo re' reh k'amal kib'eeh aj nimaneel. Eh re' wo' reh inko'linik keh, eh jilow taqe rooq q'ab' noq wilkeeb'.

²⁴Eh nik' wach noq kinimanik taqe aj nimaneel chuwach i Jesucristo, je' wo' re' noq naakinimaniik taqe ehk'eenb'ees chuwach i kib'ahiil ruuk' chu'nchel i ruk'ul chi b'anarik.

²⁵Je' wo' re' taq i cha a'n i hat b'ahiilb'ees cha k'ax taq awehk'een je' rukab' i xub'an i Jesucristo xuk'ax taqe aj nimaneel, eh xuyeew riib' chi kimik chikiij.

²⁶Re' wili i xub'an i kuuk' i aj nimaneel, re' xraaj i reh chi xuyeew keh i santo laj k'acharik, eh xutz'aj wach i kánima ruuk' i ruq'oral i Dios je' wo' ruuk' ha'.

²⁷Re' xraaj Jesucristo chi neeruk'ul taqe ruuk' aj nimaneel chi wilik kiloq'il, chi ma' xta k'isinoq ruch'uwa'iil wach i kánima, eh ma' xta k'isinoq kimahk, korik la' wach kik'ux, wilik kisantohiil.

²⁸Je' wo' hoq i b'ahiilb'ees inchol ruk'axam i rehk'een, ruum awach i ruk'ax i rehk'een, iraaj ruq'orom chi re' wo' reh ruk'ax riib',

²⁹ruum ma' awach ta jino'q neerixowaaj wach i ruti'jolal chi rib'il riib' i ruk'ax la' i ruk'uxlaaj chi korik, je' rukab' i rub'an i Jesucristo kuuk' i aj nimaneel, i ruk'ax taqe,

³⁰ruum jilow rooq q'ab' taqe noq wilkeeb'. Eh re' hoj i qohnimanik reh, hoj wo' jilow rooq q'ab' i Jesucristo noq wilkooj.

³¹Ruum aj re', re' winaq naa reliik nah q'ab' i rutuut rajaaw, ruuk' chik i rehk'een naa ruk'ulaam wach i ruk'achariik pankaxarohiil. Re' taqe i ki'ib' re' re', xa jinaj chik taqe.

³²Re' ma' eht'alimaj ta naq wili, xiik' naah loq'il. Eh re' k'ahchi' nuq'orom taq awee hin chi riij i Jesucristo inq'orik, chikiij taqe i aj nimaneel.

³³Je' re' noq re' taq i hat b'ahiilb'ees, cha k'ax taq awehk'een cha ju' junaal je' rukab' noq inak'ax taq awiib' i hat. Eh re' ju'jun chi ehk'eenb'ees, inchol wo' runimam i rub'ahiil.