Read Poqomchi Flp 1 Bible Online

Flp 1 - Poqomchi bible

Flp 1

¹Re' hin i Pablo, wuch'ihil i Timoteo, hoj raj kamanoom i Jesucristo. Inqatz'ihb'aaj reje huuj wili ye'b'al taq rusuqkiil ak'ux taq i hat k'amal b'eeh, i taq i hat to'ool, chawunchelaal taq i hat, i santo laj aj nimaneel, i wilkaat taq ar Filipo.

²Re' ta naq Ajaab'ees Dios, i QaJaaw Jesucristo neen kiyeew taq cho panawánima i kotob'il, i suq kiil k'uxliis.

³Hermano, jarpech taq tik'ulik panuk'ux, tinut'iosej taq ree nuDios.

⁴Eh noq i nub'an nutiij, xa eliik suq nuk'ux chupahqaljiik i rotob'il i Dios taq chawiij chawunchelaal,

⁵ruum xa re' wo' noq xatoq'aa' taq cho nimanik, xat okik taq haa' chi nutoob'jiik chuq'orariik i ak' k'uhb'aal, eh xakok'ahchi' wo' taq kaat yu'naak.

⁶Re' hin weht'al chi re' Dios, i xutoq'aa' cho rub'anariik i holohik laj rukamaj taq awuuk', ma' rukanaam ta chik rub'aan korehtaal i rumanaa' wach na' chureq ruq'ijil i ruk'uliik ruka'peech i Jesucristo.

⁷Re' hin xti ruk'ul chi je' re' i nukapaaj taq chawiij chawunchelaal, ruum q'e' taq tiwaaj, eh ruum chi hoj junk'ulariik i rotob'il i Dios taq awuuk', atoob' ta pantz'ilom wilkiin, atoob' ta re' noq neenuko'leej riij i ak' k'uhb'aal je' wo' noq nee nuch'ob' rub'ehel chi xa re' wo' re' i korik.

⁸Re' Dios reht'al chi korik chi q'e' taq ti nuk'ax chawunchelaal ruuk' i loq'laj ruk'axb'al i Jesucristo.

⁹Re' hin i nupahqaaj panutiij ree Dios chi nee ta naq inak'ax taq awiib' chi juneliik, eh chi nee ta naq inareq taq ana'ojb'al, eh nee ta naq i ruyeew taq chakapeb'aal ruuk' i rureqariik chi riij i korik,

¹⁰reh chi eliik taq neetichol rusik'ariik wach i ma' xta reet chi b'anarik. Reh chi ma' xta ruch'uwa'iil wach taq ak'achariik, eh ma' xta taq amahk na' k'oloq ruka'peech i Jesucristo.

¹¹Eh naa wo' taq ak'uhtaam chi wilik i ruk'am taq cha weh i holohik laj na'ojb'al, re' i ruyeew ruuk' i rotob'il i Jesucristo, ye'b'al runimaal wach ruloq'il i Dios.

¹²Hat taq hermano, re' hin inwaaj chi nee taq inanab'eej chi re' taqe i ti' k'axik xnuk'ul chaloq, xti korik noq re' re' xkamanik chi xooj rib'iral i ak' k'uhb'aal ree ko'lemb'al iib'.

¹³Eh chu'nchel i kicha'jinik reh i rupaat ajaab'ees, je' wo' taqe tinamit wilkeeb' ayu' Roma, keht'al chi ruum i runimjiik i Jesucristo hin ye'ooj prexo.

¹⁴Eh xkilow i ruk'ihaal hermano chi wilkiin prexo, re' chik i keh xkichop kik'ux chuq'orariik rib'iral i ruk'uhb'aal i Dios, ma' xiyo'jik ta chub'aan, xkikowej la' kik'ux ruuk' i QaJaaw.

¹⁵Wilik ju'jun kiq'orik rib'iral i Jesucristo xa ruuk' kaqwachiil, xa q'ataj wachiis inkaaj. Eh wilik taqe chu'nchel kik'ux inkiq'or rib'iral i Jesucristo,

¹⁶ruum wilik i k'axooj kuuk', keht'al chi re' Dios xpaab'anik cho weh chi re' hin k'ahchi' nuko'liniik riij i ak' k'uhb'aal.

¹⁷Eh wilik taqe i wilik inkaaj chi riij noq inkiq'or rib'iral i Jesucristo, ma' korik ta keh inki a'n xa nkaaj naq kiye'em ruman i ruti'kiil nuk'ux ruum inkilow chi wilkiin prexo.

¹⁸Re' hin ma' xta nwaaj reh xanik' pa' wach ruq'orariik rib'iral i Jesucristo inki a'n korik oon ma' korik keh inki a'n re' re' xasuq wo' nuk'ux i rub'an. Eh chi riij i re', ko wilik i rusuqkiil nuk'ux naa ruwihiik,

¹⁹ruum weht'al chi ruum chi k'ahchi' taq kaat chi tiij chi wiij, eh ruum chi k'ahchi' kiin rutob'eem i Ruxlab'al i Jesucristo jumehq'iil naaweliik chi prexohjik.

²⁰Re' inwaaj i hin re' chi ma' ta naq neenuk'uhtaaj nuk'ixb'ilaal ruuk' i rukamaj i Dios, nee ta la' naq inuchop nuk'ux chuq'orariik i korik. Reh chi neenk'utinik wach wuuk' i runimaal wach i Jesucristo, atoob' ta ko k'achalkiin atoob' ta hin chik kamnaq,

²¹ruum re' hin noq kok'achalkiin re' i Jesucristo naa nunimam. Eh wi xin kimik, jinaj kooch chi weh.

²²Eh wila' ko wilik i nuk'achariik ayu' reh chi ko neenub'an i rukamaj, ra'j ma' nureq ta wo' chik chi riij re' aha' wilik keh i ki'ib' re' re' ma' xta reet chi weh.

²³Re' hin kinqaaj kapeew ma' nureq ta chi riij aha' wilik keh i ki'ib' re' re' naa nuk'ulaam: Wilik naq pech inwaaj kimik, reh chi neekinooj wih-oq ruuk' i Jesucristo, ruum i nukapaaj chi re' re' ma' xta naq reet chi weh.

²⁴Xa re' la', i nukapaaj wo' chik riij chi ajwaal wach chi ko naa nuk'achariik ayu' wach ak'al, reh chi ko neenub'an taq atoob'jiik.

²⁵Eh ruum xnureq chi riij chi koruman chi ko naa nuk'achariik, taq awuuk' reh taq atoob'jiik, reh chi nee taq inareq rukowiil, eh rusuqkiil taq ak'ux ruuk' i runimjiik i QaJaaw Jesucristo.

²⁶Je' re' noq, re' hin naa wo' chik wojiik wih-oq taq awuuk' ruka'peech. Ruuk' i re', naa rusuuqb'iik taq ak'ux ruuk' i Jesucristo.

²⁷Xa re' la', cha chop taq ak'ux chi k'acharik je' rukab' i ruq'or i ru ak' k'uhb'aal i Jesucristo. Atoob' ta neekinooj atoob' ta ma' nee kinooj taq cha wilariik, re' hin xa nwaaj wo' b'iram taq awib'iral chi k'ahchi' taq aye'em ak'ux chi wihik pan jinaj wach k'uxliis, eh chi k'ahchi' taq ko'leem riij i nimanik, i ruk'am chaloq i ak' k'uhb'aal.

²⁸Eh mat yo'jik taq kuum i ki-ixowanik taq awach. Re' taq i naa a'nam re' re' k'uhtb'al reh chikiwach chi re' keh nakojiik pantojb'al mahk, eh chi re' taq i hat naa taq ako'ljiik, re' wili ruuk' i Dios inchalik.

²⁹Re' Dios ma' xata re' ruye'em taq q'ab' aweh chi naa taq animam i Jesucristo. K'ahchi' la' wo' taq awehtriik haa' i ti' k'axik parub'ihnaal i reh.

³⁰Re' taq i hat k'ahchi' taq ak'ulum aweh i ti' k'axik xnuk'ul i xawil taq cho wuuk'. Eh yu'naak xakok'ahchi' wo' taq ab'iram rib'iral chi k'ahchi' nuk'ulum i ti' k'axik.