Read Poqomchi Flp 2 Bible Online

Flp 2 - Poqomchi bible

Flp 2

¹Je' re' noq, ruum chi re' Jesucristo inye'wik taq rukowiil ak'ux, i ruyeew taq aweh i k'axooj i ruyeew taq rusuqkiil awánima, i ruyeew taq aweh i Santolaj Uxlab'al, i aajwanik iib', i ketelinik wachiis,

²chamanaa' taq wach re' i rusuqkiil nuk'ux ruuk' i k'acharik pan jinaj wach k'uxliis, ruuk' i jinaj chi k'axaj iib' taq chawach, ruuk' i jinaj chi uxlab'al, eliik ta naq wach neenqik'raaj taq awuuk'.

³Ma' xtaj i otob'il taq neena a'n chi wilik taq inenawaaj chi riij, ni xata nee taq inanimb'isaj awiib' chub'aan ruuk' la' chaq'lamiil taq naa a'nam. Eh maa awach i ruq'at wach i tokoom.

⁴Mo'-oq awach taq aweh ineerusik' k'axb'al riib' xa reh chi rutkeel, koruman la' wo' hoq chi neerusik' i k'axb'al keh i tokoom.

⁵Chatijej taq awiib' ruuk' i Jesucristo, wih-oq taq awuuk' i k'axooj je' rukab' i xk'ulik ruk'uhtaaj i reh:

⁶Re' reh, ma' re' ta nkiwii' chi eliik wach ruloq'il ruuk' i ruloq'il i Dios, ma' xraaj ta rupajam riib' ruuk' i Dios.

⁷Chu'nchel la' ruk'ux xukanaa' chaloq i ruloq'il eh xk'ulik aasjoq ayu' wach ak'al, xuyejaa' riib' chi xa je' jino'q aj peyjeel.

⁸Eh noq wilik chik chi ruwii' winaq, xuloch' riib' chi rib'il riib'. Eh ruum chi q'e' xnimanik, xuyeew riib' pankimik, re' i k'ixb'ilaal laj kimik xuk'ul wach kuruus.

⁹Ruum aj re', xiik' naah nimaal wach i ruloq'il xye'arik ruum i Dios. Eh xye'arik reh jinaj i b'ihnaal xiik' naah nimaal wach chikiwach chu'nchel i b'ihnaal,

¹⁰reh chi parub'ihnaal i Jesucristo, naakixuk'aam kiib' chu'nchel i wilkeeb' pan taxaaj, je' wo' wilkeeb' wach ak'al, je' wo' taqe wilkeeb' ri'si ak'al,

¹¹reh chi chu'nchel i re' naa kiq'orom chi re' i Jesucristo QaJaaw noq wilik, ye'b'al ruloq'il Ajaab'ees Dios.

¹²Hat taq nuloq'laj hermano, re' taq i hat xayeew taq chak'ux chi nimanik noq xinwihik taq cho awuuk'. Eh yu'naak noq ma' wilkiin ta chik taq awuuk' q'e' wo' chik i nayeew taq ak'ux chi nimanik, eh chako'leej taq riij i ko'lemb'al taq awiib' chu'nchel taq ak'ux,

¹³ruum re' i Dios inye'wik taq pan awánima i rotoowjiik, i rub'aan i holohik. Eh re' wo' reh neentoob'inik taq aweh chub'aan aha' wilik iraaj i reh.

¹⁴Chu'nchel i re', ma' ruuk' ta ch'olinik iib', wech'inik iib' taq neena a'n,

¹⁵reh chi ma' nee ta taq ti mahkunik ni xata chi jariik taq neetiq'ehb'ik wii'. Hat-oq taq rak'uun rixq'uun i Dios chi ma' xta ruch'uwa'iil wach taq awánima hat-oq taq saqum chi kixilak i tinamit yiib' wach i kina'ojb'al, panq'equm wilkeeb',

¹⁶maa kanaa' taq runimjiik i k'uhb'aal inye'wik i ak' k'acharik. Chi je' re', na' k'oloq ruka'peech i Jesucristo neench'iklojik nuk'ux, chi re' kowlaj kamanik, i chopoj k'uxliis xnub'an taq chaawuuk', ma' xooj ta chi re' chi ma' re'.

¹⁷Eh atoob' ta neenchihkik i nukik'eel chi jilow mayiij, reh chi neemanlojik wach taq animaniik, re' hin xasuq wo' nuk'ux. Eh chawunchelaal taq ti ehtrik taq haa' i suq kiil k'uxliis wili.

¹⁸Je' re' noq, suuqb'oq wo' taq ak'ux haa' i hat ti ehtroq wo' taq haa' i rusuqkiil nuk'ux i hin.

¹⁹Wila' re' QaJaaw Jesús xraaj, naa nutaq'aam reje chi jumehq'iil i Timoteo taq cha wilariik, reh chi neensuuqb'ik nuk'ux noq neenb'iraj taq awib'iral ruuk'.

²⁰Re' reh naa nutaq'aam reje, ruum ma' awach ta chik jino'q chuwach i reh jinaj ta wach qakapeb'aal ruuk' chi nee ta ruyeew ruk'ux reh taq atoob'jiik.

²¹Re' taqe junch'uq xa re' inkaaj i keh inkisik', eh ma' nkikapaaj ta rub'aan aha' wilik iraaj i Jesucristo.

²²Re' taq i hat aweht'al taq chik i ru holohik laj na'ojb'al i Timoteo noq xirutoob'eej chuq'orariik rib'iral i ak' k'uhb'aal. Je' rukab' jino'q ak'uunb'ees irutoob'eej i rajaaw xub'an weh.

²³Re' reh naa nutaq'aam taq cha wilariik, xa re' wi xnunab'eej nik' wach naa nukahniik ruuk' taqe wilkiin wii'.

²⁴Inko'q i QaJaaw naa wo' wojiik i hin chi jumehq'iil taq cha wilariik.

²⁵Eh ajwaal wach chi naa wo' chik nutaq'aam reje i hermano Epafrodito taq cha wilariik. Re' reh kirutob'eej chub'anariik i rukamaj i Jesucristo. Re' wo' hermano wili xataq'aaj taq cho wuuk' reh i nutoob'jiik ruuk' i ajwaal wach chi weh ayu'.

²⁶Re' reh q'e' naq iraaj rilom taq awach chawunchelaal, kapeew rub'an taq chawiij, ruum xunab'eej chi xab'iraj b'ila' taq chi xub'an i yab'ilaal.

²⁷Korik chi re' i Epafrodito xyowab'jik, xponik nah kimik. Xa re' la' xketeljik wach ruum i Dios, xk'achreesjik. Eh ma' xata re' reh xketeljik wach xuketelaaj la' wo' nuwach i hin, reh chi ma' xokik ta ruman i ruti'kiil nuk'ux.

²⁸Ruum aj re', jumehq'iil naa nutaq'aam taq reje cha wilariik, reh chi nee taq insuuqb'ik ak'ux noq nee wo' chik taq inawil wach, reh chi ma' nee ta intiib'ik nuk'ux i hin.

²⁹Chak'ul taq re' i qahermano Epafrodito pansuqkiil k'uxliis, parub'ihnaal i QaJaaw. Eh maakanaa' taq kik'axariik i je' rukab' i runa'ojb'al i reh i kina'ojb'al,

³⁰ruum re' reh xponik nah kimik ruuk' i rub'anariik i rukamaj i Jesucristo, eh xuyeew riib' panti' k'axik reh i nutoob'jiik chi kamanik, re' i ma' xuyeew ta riib' chi xk'ulik taq a a'n i hat.