Read Poqomchi Col 1 Bible Online

Col 1 - Poqomchi bible

Col 1

¹Re' hin i Pablo, hin jinaj raj tahqaneel i Jesucristo, ruum je' re' xchalik paruk'ux i Dios. Wuch'ihil i hermano Timoteo,

²noq inutz'ihb'aaj reje huuj wili aweh taq i hat santo laj raj nimaneel i Jesucristo, i wilkaat taq Colosas. Re' ta naq i Ajaab'ees Dios nee ruyeew i rotob'il taq cha naah, ruch'ihil i suq kiil k'uxliis inchalik ruuk' i reh.

³Hermano, noq inqa'an qatiij taq chawiij, eliik tiqat'iosej taq ree Dios, re' raJaaw i QaJaaw Jesucristo,

⁴ruum xqib'iraj taq awib'iral chi nayeew taq ak'ux chunimjiik i Jesucristo, chi k'ahchi' taq ak'axam chi kunchelaal i santo laj aj nimaneel.

⁵Re' k'axooj re' re' i na a'n taq, ruum xab'iraj taq chik rib'iral i korik laj k'uhb'aal, re' i ak' k'uhb'aal xareq taq chi riij chi wilik taq akooch rumolom taq chaaweh i Dios pan taxaaj, re' i ch'iklik taq reje wii' ak'ux.

⁶Re' k'uhb'aal wili, i xq'orarik taq chaaweh i hat, k'ahchi' rojiik rib'iral chi junsuut i wach ak'al, eh ma' k'isiin i k'ahchi' kinimaniik reh. Eh k'ahchi' rujaljiik wach i kina'ojb'al, je' rukab' i xub'an taq chaawuuk' i hat xa re' wo' noq xab'iraj taq chaloq i ruk'axb'al i Dios, eh xareq taq chi riij chi xa re' wo' re' i korik.

⁷Ra'j i ruk'axb'al i Dios i wili i xuk'uhtaaj taq chaaweh i qahermano, Epafras rub'ihnaal, i q'e' suq qak'ux chi riij quch kamanoom. Eh re' reh xti manlik raj kamanoom i Jesucristo reh taq atoob'jiik.

⁸Re' Epafras xk'ulik q'oroq taq awib'iral qeh chi re' Santolaj Uxlab'al k'ahchi' taq kaat rutob'eem chub'anariik i k'axaj iib'.

⁹Xa re' wo' noq xqib'iraj taq awib'iral, re' hoj ma' qakanaam ta chik i qatiij taq chawiij. K'ahchi' qapahqaam ree Dios chi neenareq taq chi riij chi manlik iraaj i reh. K'ahchi' wo' qapahqaam ree Dios chi neeruyee taq chaaweh chu'nchel i holohik laj na'ojb'al, i holohik laj kapeew ruuk' i nimanik k'ahchi' taq kaat.

¹⁰Chi je' re', nee taq ti k'acharik parukorkiil i hat taq chik rak'uun rixq'uun i QaJaaw, eh xa re' taq chik naa a'nam imponik chuwach i reh, reh chi nee taq inak'uhtaaj i holohik chi b'anarik, eh chi reh reh taq areqem chi riij i na'ojb'al inchalik ruuk' i Dios.

¹¹Ruum aj re' inqapahqaaj reh i Dios chi ruuk' i runimaal rajaawriik nee ruyeew taq rukowiil ak'ux. Reh chi nee taq inakuy rik'teesjiik ruuk' q'unil chu'nchel i ti' k'axik.

¹²Eh nee wo' taq inat'iosej reh i Ajaab'ees Dios ruuk' suq kiil k'uxliis, ruum k'ahchi' ruye'em taq asaquumaal, reh i ruk'ulariik taq akooch, i hat taq chik i santo laj aj nimaneel.

¹³Re' wo' qaDios x-esanik cho qeh pan rajaawriik i q'equm. Yu'naak pa runimaal rajaawriik chik i Rak'uun i q'e' ruk'axam wilkooj.

¹⁴Eh re' wo' Rak'uun i Dios xko'linik qeh noq xuyeew riib' chi kimik. Ruuk' i re', xukuy xusach chu'nchel i qamahk.

¹⁵Re' i Jesucristo xk'ulik k'uhtanoq reh i ruwii' i Dios ma' nilarik ta wach, re' i Jesucristo xa wilik wo' chaloq noq komajaa' i rutz'uhkrisaj chu'nchel i xa chib'ih jariik.

¹⁶Xa ruum wo' Ak'uunb'ees Jesucristo, xutz'uhkrisaj chaloq i Dios chu'nchel i xa chib'ih jariik wilkeeb' pan taxaaj, i wilkeeb' wach ak'al, chi je' nilarik kiwach, chi je' ma' nilarik ta kiwach, re' taqe xa reh reh wach chi taaq'anik inki a'n cho panuxlab'al, eh pan q'ab' taqe xukanaa'.

¹⁷Re' Jesucristo xa wilik wo' chaloq noq komajaa' chii wilik, eh pan kiye'aab' taqe ruye'em chi tuslik kiwach taqe i xa chib'ih jariik.

¹⁸Re' wo' hoq i Jesucristo xkahnik chi k'amal kib'eeh aj nimaneel, re' taqe jilow ruti'jolal noq wilkeeb' re' reh i peet. Re' wo' reh i peet xwuktik chaloq chi k'achlik wach. Eh xkahnik chi k'amal kib'eeh chu'nchel i xa chib'ih jariik wilik.

¹⁹Re' Dios paruk'ux xchalik chi re' i Jesucristo xk'ulik k'uhtanoq reh i ruwii', eh chu'nchel i rajaawriik,

²⁰Eh re' Dios xraaj chi parub'ihnaal i Jesucristo xuk'am taqe ruuk' pansuqkiil k'uxliis chu'nchel i wilkeeb' wach ak'al, i wilkeeb' pan taxaaj. Xuk'am taqe pansuqkiil k'uxliis ruuk' i reh ruum i rukik'eel i Jesucristo xelik noq xkimik wach kuruus.

²¹Re' taq i hat hermano, noq xub'an chaloq, ma' eht'alimaj ta naq taq chaawach ruum i Dios, ruum inawixowaaj naq taq wach. Je' naq re' taq i na a'n ruuk' i ruyib'kiil wach taq ana'ojb'al.

²²Eh xa ruum i ti'laj kimik xuk'ul i Jesucristo chuti'jolal, xat ruq'asaj taq chuwach i Dios chi wilik taq asantohiil, chi ma' xta chik k'isinoq ruch'uwa'iil wach taq awánima, eh chi ma' xta taq chik amahk.

²³Je' re' noq, xti chayeew taq ak'ux chi nimanik, chuk'am raa' taq panawánima. Eh maakanaa' taq chik i ko'lemb'al taq aweh, re' i ch'iklik taq reje wii' ak'ux. Re' ak' k'uhb'aal taq xab'iraj re' wo' re' i k'ahchi' ruq'orariik rib'iral sut i wach ak'al. Eh re' hin i Pablo, hin paab'amaj chuq'orariik rib'iral.

²⁴Hermano, re' hin ma' nutib'isaj ta nuk'ux chi k'ahchi' nuk'ulum i ti' k'axik taq chawiij. Chi je' re', neemanlojik wach ruk'ulariik chi nuti'jolal i ti' k'axik je' rukab' i xuk'ul i Jesucristo chikiij i kinimanik reh, re' taqe i jilow rooq q'ab' noq wilkeeb'.

²⁵Re' hin, re' Dios xpaab'anik weh chi hin jinaj raj kamanoom chi kixilak i kinimanik reh. Re' re' i nukamaj xuyeew, reh chi naa taq kaat nutob'eem i hat ruuk' i ruq'orariik taq aweh chi manlik wach i ruk'uhb'aal.

²⁶Re' ruk'uhb'aal i Dios wili, ma' awach ta neht'alinik cho reh najtir q'iij. Raaj yu'naak, xuyeew chik chi naab'jik i Dios keh i santo laj aj nimaneel.

²⁷Re' reh xraaj ruye'em chi naab'jik taq aweh i hat ma' hat ta taq aj Judío i runimaal ruloq'il, i ma' eht'alimaj ta naq chaloq. Re' ma' eht'alimaj ta naq, re' i Jesucristo i wilik taq chik panawánima yu'naak, ruum i reh ch'iklik taq ak'ux ruuk' i ruloq'il naa taq ak'ulum.

²⁸Re' hoj re' Jesucristo k'ahchi' qaq'orom rib'iral. Parub'ihnaal i reh k'ahchi' qakojom kina'ojb'al taqe qas qachaaq'. Eh k'ahchi' wo' qak'uhtaam keh chi kireq chi riij chi korik nik' wach runimjiik i Jesucristo.

²⁹Re' hin k'ahchi' nuchopom nuk'ux chi kamanik, eh ma' kinhi'lik taj. Chu'nchel la' nub'an ruuk' i rajaawriik i ruyeew weh i Jesucristo.