Read Poqomchi Col 2 Bible Online

Col 2 - Poqomchi bible

Col 2

¹Re' taq i hat hermano, i wilkaat taq ar Colosas, inwaaj chi nee taq inanab'eej chi nuchop reje nuk'ux chi tiij taq chawiij, je' wo' chikiij i hermano wilkeeb' Laodicea, je' wo' chikiij i ma' jank'al ta nkilow nuwach.

²Re' hin inuchop nuk'ux taq chawiij, reh chi re' Dios neen ye'wik taq rusuqkiil ak'ux, reh chi jinaj-oq taq wach awánima chuk'axariik taq awiib', reh chi neenareq taq chi riij i ma' eht'alimaj ta naq i ruyejaam cho wach i Dios, re' i ko'linik i rub'an i Jesucristo.

³Xa re' wo' Jesucristo inye'wik qana'ojb'al chi manlik, xa ruum i reh inqareq chi riij i korik.

⁴Re' wili i nuq'or taq reje aweh, ruum inwaaj i hin chi ma' awach ta neenjot'wik taq aweh ruuk' i je' tii chik holohik laj q'orik inkiq'or.

⁵Atoob' ta ma' wilkiin ta taq awuuk', wilkiin la' taq awuuk' panuxlab'al, ruum q'e' taq ti' tiwik'raaj reje. Eh re' xti nsuuqb'ik wii' nuk'ux i hin re' chimb'iraj taq awib'iral chi k'acharik taq i na a'n parukorkiil, eh korik taq wach ak'ux chunimjiik i Jesucristo.

⁶Ruum aj re', re' taq i hat, nik' wach noq xak'ul taq panawánima i QaJaaw Jesucristo, je' wo' re' i k'acharik taq cha a'n pan jinaj wach k'uxliis ruuk' i reh.

⁷Xti chopolkaat-oq taq chi korik panak'achariik ruuk' i Jesucristo. Reh reh-oq taq rukowjiik ak'ux chunimjiik i reh, je' rukab' i k'uhtamaj taq chaaweh. Eliik wo' taq chat'iosej ree Dios i rotob'il.

⁸Eh chawik'raaj taq awiib' mankiyoj taq ak'ux ruuk' i na'ojb'al xama' xta ruk'am chaloq. Re' keh xa chukul q'orik taqe, xa runa'ojb'al winaq inkik'uhtaaj, ma' ruuk' taj i Jesucristo inchalik inkik'uhtaaj.

⁹Chanab'eej taq chi re' i ruwii' eh chu'nchel i rajaawriik i Dios, xa re' wo' i Jesucristo xk'ulik k'uhtanoq reh noq xk'ulik chi ruwii' winaq ayu' wach ak'al.

¹⁰Eh re' taq i hat xareq taq chik ana'ojb'al chi manlik, ruuk' i Jesucristo. Eh weht'al taq chik chi xa re' wo' reh xiik' naah rajaawriik chikinaah chu'nchel i wilik kajawriik chi taaq'anik.

¹¹Eh ruum chi wilkaat taq chik pan jinaj wach k'uxliis chunimjiik i Jesucristo, je' naa xpoch'arik taq naah ak'achab', xa re' la' ma' je' ta rukab' imb'aan keh i aj Judío noq koxi-aasjik. Panawánima la' taq xub'an i Jesucristo, re' chi xusach wach chu'nchel taq aamahk.

¹²Eh je' naa taq hat jumuhqiik ruuk' i Jesucristo noq xqahteesjik taq ahaa' Je' naa taq xatk'aach cho haa' ruuk' ruka'peech i hat, noq xk'aach wo' chik chaloq i reh, ruum xanimaj taq chik chi re' Dios ruuk' i rajaawriik xuksaj chaloq i Jesucristo.

¹³Re' taq i hat, hat naq taq cho kamnaq panamahk ruum ma' xta naq taq panawánima i Dios. Raaj yu'naak, xuyee taq chik chaaweh i Dios i ak' k'acharik parub'ihnaal i Jesucristo, ruum xukuy chik chu'nchel taq amahk.

¹⁴Re' Dios ineesanik iloq reh i qamahk nik' nimaal i qakojom chaloq noq ma' xqanimaj ta taqe chaloq i qoh rumin naq chub'anariik i najtir k'uhb'aal. Chu'nchel i qamahk re' re' xutoj chik riij i Jesucristo noq xkimik wach kuruus.

¹⁵Eh re' Dios, ruum i rukimiik i Jesucristo wach kuruus, xresaj i runimaal kiwach i wilik naq kajaawriik, chi je' nilarik kiwach, chi je' ma' nilarik ta kiwach. Eh chu'nchel i tinamit xkinab'eej chi re' Dios x-eesanik kajaawriik.

¹⁶Re' taq i hat hermano, maa b'iraj taq keh i neekiwech'inik taq aweh chi riij taq awa' ahaa', chi riij i xa chib'ih ninq'ijal, chi riij i runinq'ijiik i ak' poh, chi riij sabatu' q'iij.

¹⁷Noq xwihik cho rajaawriik chu'nchel i na'ojb'al re' re', xa rehtalil pee chaloq i xti korik xk'ulik iloq koq'uun, re' korik re' re', re' Jesucristo.

¹⁸Eh maa q'eb' taq akooch kuum i xa ch'ub'ik tii chik wach kik'ux inki a'n kiib' chi jot'ooj. Re' keh, re' taqe ánjel inkiloq'ej inkiq'or chi wilik i ruk'uhtaaj riib' keh, ro'q ta ma' kilom ta wo' wach, eh xa nim chik kiwach inki a'n kiib' ruuk' i ki ma' holohik ta laj kapeew.

¹⁹Re' taqe re' ma' wilkeeb' ta ruuk' i Jesucristo, re' K'amal qab'eeh i hoj, hoj chik aj nimaneel. Re' wo' Jesucristo ink'isanik qeh panuxlab'al i jilow ruti'jolal noq wilkooj, eh i ruyeew rukowiil qak'ux chi manlik eh qoh ruk'am ruuk' pansuqkiil k'uxliis.

²⁰Re' taq i hat hermano, je' naa taq hat junkimiik ruuk' i Jesucristo, ruum akanaam taq chik rub'aan i yiib' wach na'ojb'al. Eh ¿chib'ih reet noq xa ko k'acharik wo' taq i na a'n je' rukab' i k'acharik inki a'n i yiib' wach kina'ojb'al?

²¹Eh je' rukab' inq'orarik chi je' wili: Maachop i xa chib'ih jariik maa k'ux aweh i wulu' maatz'a'j aweh i re', ruum mahk chi b'anarik inki.

²²Chu'nchel i na'ojb'al re' re' xa chi riij taqe xa chib'ih jariik inq'orik, re' ruuk' insahchik kiwach noq kikojarik, xa ruk'uhb'aal winaq, eh xa winaq taqe kik'uhtanik reh.

²³Re' taqe re', xa holohik na'ojb'al chik noq inq'orarik, ruum je' tii chik rulooq'jiik i Dios inki a'n noq ink'utinik xa kiloch'ik chik inki a'n kiib', eh inkik'saj chi ti' k'axik i kiti'jolal. Chu'nchel inkik'uhtaaj re' re', ma' xta i rutiq wach, ni xata ruum i re' inkikanaa' i yiib' wach na'ojb'al inkik'ax wach.