Read Poqomchi Col 4 Bible Online

Col 4 - Poqomchi bible

Col 4

¹Re' taq i hat patroon, re' ruk'ul chi b'anarik taq cha a'n kuuk' amoso, panotob'il taq chaq'oreej taqe. K'oloq taq panak'ux chi re' taq i hat jinaj wo' i ehchan taq aweh wilik cho pan taxaaj.

²Eh re' taq i hat hermano, maakanaa' taq rub'aan aatiij chuwach i Dios, chat'iosej taq i rotob'il. Xa eliik-oq na'lik taq aweh.

³Cha a'n wo' taq cho atiij chiqiij i hoj, reh chi neeruyee q'ab' qeh i Dios ruq'orariik i k'uhb'aal ree ko'lemb'al iib', re' i ma' eht'alimaj ta naq chaloq chi riij i Jesucristo, re' hin ruum i ruq'orariik rib'iral i re' hin kiye'em prexo.

⁴Eh cha a'n wo' taq chaatiij chi wiij i hin, reh chi nee nub'an ruch'ob'ariik rub'ehel chi korik i k'uhb'aal re' re'.

⁵Eh re' taq i hat ticholoq taq k'acharik chi kixilak i ma' re' ta taqe aj nimaneel, maasub' taq i q'iij cha q'or la' taq rib'iral keh i ak' k'uhb'aal.

⁶Eh juneliik pan chaq'lamiil taq naa aq'oriik kuuk', ko cha sik' taq chi riij i naa aq'orom, reh chi ma' awach taj i nee taq inaq'oj xikin. Eh ticholoq taq kichaq'weesjiik i ju'jun.

⁷Eh re' qahermano Tíquico naa ruq'oriik ponoq taq aweh chib'ih k'ahchi' kiin ayu'. Re' reh i ruyee ruk'ux chi nuto'ariik ruuk' i rub'anariik i rukamaj i QaJaaw Jesucristo.

⁸Re' reh naa nutaq'aam taq reje awuuk', reh chi nee ruq'or ponoq taq aweh chib'ih k'ahchi' qa'nam ayu' hoj. Chi je' re' neeruyee ponoq rukowiil taq ak'ux.

⁹Re' Tíquico, ruch'ihil i qahermano Onésimo, noq narojiik k'oloq taq awuuk'. Re' Onésimo q'e' atoob', eh korik wach ruk'ux, aatinamiit wo' taq i hat. Re' keh naa kiq'oriik ponoq taq aweh chib'ih k'ahchi' ruk'ulariik ayu'.

¹⁰Eh re' qahermano Aristarco, i wuch aj tz'ilom, i rutaq'aaj taq reje rusuqkiil ak'ux, je' wo' i qahermano Marcos, i rikaaq' i Bernabé. Re' taq i hat ab'iram taq chik rib'iral i Marcos wila' xooj k'oloq taq awuuk', panotob'il taq chak'ul chaloq.

¹¹Re' i qahermano, Jesús rub'ihnaal, i Justo wo' chik inkiq'or reh, i rutaq'aaj wo' taq reje rusuqkiil ak'ux i reh. Xa re' wo' tii taqe ixib' wili wuch aj judío taqe xitowik weh ayu' chuq'orariik rib'iral i runimaal rajaawriik i Dios. Re' tii keh xiye'wik rukowiil nuk'ux.

¹²Re' qahermano Epafras i rutaq'aaj taq reje rusuqkiil ak'ux, raj kamanoom wo' i Jesucristo, eh aatinamiit wo' taq. Eh juneliik i ruyeew ruk'ux chi tiij taq chawiij, reh chi neenkowjik taq ak'ux chi nimanik, eh reh wo' chi aq'asam-oq taq awiib' chub'anariik iraaj i Dios.

¹³Re' hin i Pablo, hin kineht'alinik reh chi korik chi re' Epafras q'e' taq ti' tiriik'raaj reje. Eh ti' wo' riik'raaj taqe reje i qahermano wilkeeb' Laodicea, eh je' wo' taqe i wilkeeb' Hierápolis.

¹⁴Re' Lucas, i loq'laj aj iq'omaneel, i rutaq'aaj wo' taq reje rusuqkiil ak'ux i reh, je' wo' i winaq, Demas rub'ihnaal.

¹⁵Eh chayeew taq rusuqkiil kik'ux i qahermano wilkeeb' Laodicea, je' wo' hoq i qahermana, Ninfas, ruch'ihil taqe inkimol kiib' parupaat chulooq'jiik i Dios.

¹⁶Noq ilooj chik wach taq chaxilak i huuj wili, nee taq inataq'aaj reje keh i qahermano wilkeeb' Laodicea, reh chi nee wo' inilarik wach chi kixilak i keh. Eh re' huuj naa nutaq'aam reje kuuk' i keh nee wo' nenilarik wach chaxilak taq i hat.

¹⁷Eh cha q'or taq ree qahermano Arquipo chi re' hin xinq'orik reje chi marukanaa' chik rub'aan i rukamaj i QaJaaw ye'ooj cho chinaah.

¹⁸Re' hin i Pablo, hin xintz'ihb'anik reje i rusuqkiil taq ak'ux chupaam i huuj wili. Eh mansahchik taq panak'ux chi wilkiin chi prexohjik. Re' ta naq i Dios toob'inoq taq aweh ar. Je' ta wo' naq re'.