Read Poqomchi 1 Tes 3 Bible Online

1 Tes 3 - Poqomchi bible

1 Tes 3

¹Je' re' noq, re' hin ma' xnukuy ta chik nik'-oq najtiil chi ma' inwil ta taq awach, xnuchop nuk'ux chi xinkahnik chi wutkeel ar Atenas.

²Eh ruum i re', xqataq'aaj reje i qahermano Timoteo taq cha wilariik. Re' reh quch kamanoom ruuk' i ruq'orariik rib'iral i ak' k'uhb'aal i ruyeew i Jesucristo. Eh reh chi xuq'or rukorkiil taq aweh chi maakanaa' taq chik i nimanik, eh chi xuyeew rukowiil taq ak'ux.

³Eh reh wo' chi ma' awach ta jino'q taq aweh i neerub'an kiib' ruk'ux chi nimanik ruum taqe ti' k'axik. Aweht'al wo' taq i hat chi naa qik'iik chupaam taqe ti' k'axik re' re',

⁴ruum noq ko wilkooj taq cho chaxilak, xanoq wo' xqaq'or taq chaaweh chi wilik ti' k'axik naa qak'ulum. Eh je' wo' re' i xqak'ul je' rukab' i qaq'orom taq chaaweh.

⁵Ruum aj re' xqataq'aaj reje Timoteo chi rupeech'jiik taq aweh mi suq taq ak'ux, mi k'ahchi' taq aye'em ak'ux chunimjiik i Dios. Re' hin yo'jik i nub'an taq reje aweh, ruum xat ruq'eb'-oq taq pamahk i aj Yahm. Eh wi ta xa a'n taq i je' re', xama' xta naq neerutiq i rukamaj i Dios xponik qa a'n taq awuuk'.

⁶Eh re' i Timoteo xsutinik chik chaloq i reh taq aq'orob'jiik ar Tesalónica. Eh holohik i xk'ulik ruq'or qeh taq chawiij ruuk' taq animaniik, je' wo' ruuk' i k'axooj taq i na a'n chawach. Xk'ulik ruq'or qeh chi ti' taq qoh awik'raaj, eh chi xa nawaaj naq chik taq awilom qawach, je' wo' re' i hoj xa nqaaj naq chik qilom taq awach.

⁷Ruum i wili hermano, chupaam taqe pajarik k'ahchi' qak'ulum je' wo' ruuk' taqe ruti'kiil qak'ux, xiik' naah i rusuqkiil qánima xqak'ul noq xqeht'aliij chi k'ahchi' taq aye'em ak'ux chunimjiik i Jesucristo.

⁸Noq xqeht'aliij chi k'ahchi' rukowjiik taq ak'ux chi nimanik parub'ihnaal i QaJaaw Jesucristo, je' naa kore' xk'achlojik qawach noq xqik'raaj.

⁹Nik' ta naq wach rut'iosjiik neenqa a'n ree qaDios chawiij taq i hat, je' wo' chiriij i runimaal rusuqkiil qak'ux taq inayeew, re' i k'ahchi' qik'raam rusuqkiil pan qánima chuwach i Dios

¹⁰Re' hoj chi q'iij chi aq'ab' inqapahqaaj ree Dios chi nee ruyeew q'ab' qeh chinee wo' chik inqilow qawach taq awuuk'. Eh chi neenqamanaa' wach ruq'orariik taq aweh i komajaa' taq i na a'n pan animaniik.

¹¹Re' hoj inqaaj chi re' ta naq i Dios, re' i QaJaaw, eh je' wo' QaJaaw Jesucristo neentoob'inik qeh, reh chinee wo' chik inqa a'n ojik taq cha wilariik ar.

¹²Eh re' ta wo' naq i QaJaaw Jesucristo neenyee'wik taq panawánima chi k'ul taq neenak'ax awiib' chawach. Eh chu'nchel ta naq aj uuk' nee taq i na a'n i k'axooj, je' rukab' taq ak'axariik inqa a'n i hoj.

¹³Re' ta naq i QaJaaw Jesucristo ye' woq taq rukowiil ak'ux, chuyeew ta naq taq asantohiil. Eh ma' ta naq chik chih taq amahk chuwach i QaJaaw Dios na' sutinoq cho ruka'peech i QaJaaw Jesucristo ruch'ihil taqe kánjel kit'iosil i rak'uun rixq'uun ojinaq taqe ruuk' ar pan taxaaj. Je' ta wo' naq re'.