Read Poqomchi Jos 1 Bible Online

Jos 1 - Poqomchi bible

Jos 1

¹Noq kamnaq chik i Moisés, re' i QaJaaw Dios xuq'oreej i Josué rak'uun i Nun re' wo' hoq ixtowik cho reh i Moisés je' wili i xuq'or reh:

²Re' i Moisés waj kamanoom xkimik chik yu'naak re' chik i hat naa aaq'asaniik reje keh chu'nchel i aj Israel chi juntar i nim ha' Jordán. Eh naa taq aq'ahxiik reje chupaam i ye'aab' okik weh chi ruye'ariik taq aweh i hat, hat taq aj Israel.

³Eh re' hin naa nuye'em taq aweh chu'nchel i ye'aab' naa taq aponiik wii', je' rukab' i xnuq'or reh i Moisés, noq xub'an.

⁴Re' hin naa taq nuye'em aweh i ye'aab', naa rutohq'iik chaloq chupaam i ye'aab' chiq yuuq', naa ruponiik paraxchee' Líbano, naa ruponiik chi chii' i nim ha' Éufrates, eh chu'nchel kiye'aab' i aj heteo, eh naa ruponiik ko chi chii' i palaw Mediterráneo.

⁵Re' hat Josué ma' awach ta naa ruq'atwiik awach nik' najtiil naa aak'achariik ruum re' hin naa nuwihiik awuuk' cha toob'jiik, ma' jaruuj naa kaat nukanaam cha wutkeel, je' rukab' noq xnutob'eej i Moisés.

⁶Je' re' noq chakowej awiib' cha chop ak'ux, ruum re' hat naa aach'aqwiik i ye'aab' keh i aj Israel i naa kichopom naah. Re' i ye'aab' nuq'orom chee xti korik keh aamaam awati't chi naa nuye'em keh.

⁷Xa re' i nupahqaaj aweh i hin chi chakowej awiib', eh cha chop ak'ux chi korik, eh cha a'n chu'nchel i ruq'or i nuk'uhb'aal xuq'or aweh i waj kamanoom Moisés. Maacanaa' rub'aan, maa t'ooj panasak'aaj, ni xata panatz'eet reh chi nee ti elik korik ruuk' chu'nchel i naa a'nam.

⁸Eh ma' naa ta akanaam ruq'orariik i nuk'uhb'aal, chi q'iij chi aq'ab' naa atijem riij i nuk'uhb'aal tz'ihb'amaj chupaam i huuj, reh chi neena a'n chi korik taqe i ruq'or. Chi je' re' nee ti elik korik, eh chu'nchel nee nelik korik chawach.

⁹Je' re' noq re' hin kinq'orik aweh chi chakowej awiib' cha chop ak'ux, mat yo'jik, eh marub'an kiib' ak'ux, ruum re' hin aaWaJaaw aaDios naa nuwihiik awuuk' chatoob'jiik xa aha' pa' nee tiooj, i nuchjik ruum i Dios.

¹⁰Eh re' Josué xumol kiwach taqe i k'amal kib'eeh i ju'jun ch'uq chi aj Israel, je' wili i xuq'or keh:

¹¹Re' taq i hat ik'een taq chupaam taqe i itz'ihy naah paat cha q'or taq keh i wilkeeb' ar, chi kiyejaa' kiwa' kihaa', ruum panixib' q'iij inqaq'at reje wach i nim ha' Jordán, reh chi naa rojiik qachopom naah i ye'aab' naa ruye'em qeh i QaJaaw Dios, inki.

¹²Eh re' i Josué xuq'oreej taqe i junch'uq chi riih rumaam Rubén, i junch'uq chi riih rumaam i Gad, je' wo' hoq i yejaal ch'uq chi riih rumaam i Manasés, je' wili i xuq'or keh:

¹³Mansahchik taq panak'ux i xuq'or taq aweh i Moisés chi naa taq a'nam re' raj kamanoom i QaJaaw, re' noq xuq'or chi je' wili: Re' taq aaWaJaaw aaDios naa ruye'em taq aweh i ye'aab' re' re', reh chi ar taq naa ahi'liik, inki.

¹⁴Eh re' taq awehk'een, taqe aachikoop cha kanaa' taq ayu' chupaam i ye'aab' xuyeew taq kahnoq aweh i Moisés, chi juntar chee nim ha' Jordán. Eh re' taq i hat winaq i ko hat kow konee taq i nakuy i q'aq'inik cha chop taq atz'a'aamb'aal reh q'aq'inik hiy taq chi peet b'eeh chikiwach awuch aj Israel.

¹⁵Eh korehtaal inye'arik i kiye'aab' ruum i QaJaaw Dios, je' rukab' noq xuyeew taq aye'aab' i hat. Eh korehtaal wo' inkehchaaj i ye'aab' naa ruye'ariik keh ruum i QaJaaw Dios. Eh chi riij i re' naa wo' chik asutiniik taq cho panaye'aab' chuwach chaloq i nim ha' Jordán, panelb'aal reje i q'iij. Eh kora'j taq i naa awehchaam chi korik re' i ye'aab' xuyeew taq kahnoq aweh i Moisés raj kamanoom i Dios, inki.

¹⁶Eh re' keh je' wili inchaq'wik xkian: Re' hoj neen qa a'n chu'nchel i xaq'or qeh, nee wo' hoq ooj xa aha' pa' nee qoh ataq'aaj.

¹⁷Xa naa wo' qa'nam chi juneliik aha' wilik naa aq'orom, je' wo' rukab' noq xqa a'n aha' wilik i xuq'or qeh i Moisés. Xa re' la' wi eliik xwihik awuuk' i QaJaaw Dios, je' rukab' noq wihik ruuk' i Moisés.

¹⁸Eh awach i ma' nee ta tirunimaj, eh ma' nee ta rub'an aha' wilik taqe i neenaq'or re' reh inchol chi neenkanteesjik, xa re' inqaq'or aweh i hat chi chakowej awiib', eh cha chop ak'ux, inki taqe.