Read Poqomchi Jos 15 Bible Online

Jos 15 - Poqomchi bible

Jos 15

¹Re' i ye'aab' wili xye'arik keh i riih rumaam i Judá, noq kisik'im chik chi riij re' q'oreel nik' kik'ihaal chi kiib' chi kich'uhqaal. Ar i tohq'ik reje pank'ula't ruuk' i ye'aab' Edom, imponik pansak'aaj reh i rookb'aal q'iij chupaam i ye'aab' chiq yuuq' reh i ye'aab' Zin.

²Eh re' i k'ula't re' re' imponik pansak'aaj reh i rookb'aal i q'iij reh i kamnaq palaw.

³Eh pansak'aaj reh i rookb'aal q'iij imponik i wilik wii' i yuuq' Acrabim, inik'ik reje panchiq yuuq' wilik ar Zin. Eh i nik'ik reje pansak'aaj reh i rookb'aal q'iij reh i ye'aab' Cades-barnea, eh i nik'ik ponoq Hezrón, injohtik johtoq Adar, eh imponik sutinoq ar Carca.

⁴Eh inik'ik ponoq Asmón, inooj eloq chi chii' i nim ha' inchalik Egipto, ar inooj kuxoq chi chii' i palaw Mediterráneo inooj kuxoq i k'ula't wilik reje pantz'eet reh i rookb'aal q'iij.

⁵Eh re' i ruk'ula'tiil i chii' parelb'aal reje q'iij re' i chii' i kamnaq palaw imponik inokik wii' i nim ha' Jordán. Eh ar intohq'ik reje i ruk'ula'tiil i chii' i wilik reje pantz'eet reh i rookb'aal q'iij.

⁶Eh injohtik johtoq chupaam i ye'aab' Bet-hogla, inik'ik pantz'eet reh i rookb'aal q'iij reh i ye'aab' Bet-arabá, eh inooj i wilik wii' i paat ab'aj Bohán ruye'aab' i rak'uun i Rubén.

⁷Chi riij i re' inik'ik reje i wilik wii' i ye'aab' Debir ar wach k'ixkaab' Acor, imponik sutinoq chupaam i ye'aab' Gilgal wilik chi k'ul wach i yuuq' Adumín, pantz'eet reh i rookb'aal q'iij reh i nim ha'. Re' k'ula't i nik'ik ponoq i wilik wii' i k'achlik ha' En-semes rub'ihnaal, eh inooj eloq i wilik wii' i nim ha' Rogel.

⁸Eh inik'ik ponoq wach k'ixkaab' Ben-hinom pansak'aaj reh i rookb'aal q'iij reh i ye'aab' jebuseo, re' wo' hoq i Jerusaleem. Chi riij i re' inik'ik ponoq chinaah i yuuq' chi k'ul wach i k'ixkaab' Hinom wilik reje parookb'aal q'iij, eh pantz'eet reje reh i rookb'aal q'iij reh i ye'aab' Refaim.

⁹Re' k'ula't re' re' imponik sutinoq kochinaah i yuuq' imponik i wilik wii' i k'achlik ha' wilik Neftoa. Eh imponik chupaam taqe i tinamit wilkeeb' chinaah i yuuq' Efrón, inik'ik ponoq chupaam i ye'aab' Baala, eh Quiriat-jearim wo' inkiq'or reh.

¹⁰Eh Baala imponik sutinoq i ruk'ula'tiil i ye'aab' re' re' inooj reje chi korkiil i rookb'aal q'iij chinaah i yuuq' Seir, inik'ik chucheel i yuuq' Jearim. Eh imponik Quesolón wilik reje pansak'aaj reh i rookb'aal q'iij imponik Bet-semes, eh inik'ik pan tinamit Timna.

¹¹Eh re' i ye'aab' re' re' pantz'eet reh i rookb'aal q'iij, intohq'ik chaloq chinaah i yuuq' Ecrón, inooj reje Sicrón, xik'ik chinaah i yuuq' Baala, xik'ik wo' ponoq Jabneel. Eh ko ar xooj kuxoq wach chi chii' i palaw Mediterráneo.

¹²Eh re' i ruk'ula'tiil i ye'aab' re' re' pansak'aaj reh i rookb'aal q'iij re' i palaw Mediterráneo. Re' taqe wili i ruk'ula'tiil i ye'aab' xch'aqarik keh i junch'uq chi riih rumaam i Judá re' q'oreel nik' kik'ihaal chi kiib'.

¹³Re' i Josué xuyeew ruye'aab' i Caleb rak'uun i Jefone chi kixilak i riih rumaam i Judá, je' rukab' xuq'or i QaJaaw Dios reh i Josué. Re' ye'aab' xye'arik reh re' i Quiriat-arba, eh Hebrón wo' inkiq'or reh, re' i kitinamiit i riih rumaam nimlaj winaq Anac rub'ihnaal.

¹⁴Re' Caleb xresaj taqe chupaam i ye'aab' re' re' ixib' chi rak'uun i Anac, je' wili i kib'ihnaal: Sesai, Ahimán, Talmai.

¹⁵Eh noq rehchaaj i ye'aab' re' re' xooj wo' chi rehtesjiik taqe i wilkeeb' Debir. Re' tinamit Debir Quiriat-sefer i b'ih inkiq'or cho najtir.

¹⁶Eh re' Caleb je' wili i xuq'or: Awach i nenooj chi q'aq'inik, eh nee ruchop naah i tinamit Quiriat-sefer, re' hin neenuyeew chi rehk'een i wixq'uun Acsa rub'ihnaal, inki.

¹⁷Re' i tinamit re' re', re' Otoniel xchopwik naah rak'uun i Cenaz ruchaaq wo' i Caleb, eh xuyeew wo' chi rehk'een i Otoniel i rixq'uun Acsa i rub'ihnaal.

¹⁸Eh noq ojik chik inki a'n pankipaat re' Otoniel xuq'or reh i Acsa chi chupahqaaj reh i rajaaw chi ye'aroq ruye'aab' tikb'al chib'ih reh. Re' i Acsa xqajik chi riij i b'uurux. Eh re' i Caleb xupahqaaj reh i rixq'uun chi je' wili: Chib'ih naq inawaaj inki.

¹⁹Re' reh je' wili xuq'or: Re' hin weht'al chi xayeew chik weh i chiq yuuq' Neguev, xa re' la' inwaaj wo' chik nee nayeew weh i ye'aab' wilik wii' i k'achlik ha', inki. Eh re' Caleb xuyeew wo' keh i ye'aab' wilik wii' i k'achlik ha' taxaaj je' wo' hoq i wilik wii' i k'achlik ha' panyuuq'.

²⁰Re' taqe i tinamit wili xkehchaaj i junch'uq chi riih rumaam i Judá nik' kik'ihaal chi kiib' chi kich'uhqaal.

²¹Re' taqe i tinamit xkehchaaj pansak'aaj reh i rookb'aal q'iij pank'ula't reje ruuk' i Edom je' wili kib'ihnaal: Cabseel, Edar, Jagur.

²²Cina, Dimona, Adada,

²³Cedes, Hazor, Itnán,

²⁴Zif, Telem, Bealot,

²⁵Hazor-hadata, Queriot, Hezrón Hazor i rukab' b'ih.

²⁶Amam, Sema, Molada,

²⁷Hazar-gada, Hesmón, Bet-pelet,

²⁸Hazar-sual, Beerseba, Bizotia,

²⁹Baala, Lim, Esem,

³⁰Eltolad, Quesil, Horma,

³¹Siclag, Madmana, Sansana,

³²Lebaot, Silhim, Aín, Rimón, b'elejeeb' ru ka'winaq chu'nchel i tinamit xkehchaaj, haa' taqe i kok' ye'aab' wilkeeb' wii' patineel.

³³Eh re' taqe i tinamit xkehchaaj i wach k'ixkaab' je' wili kib'ihnaal: Estaol, Zora, Asena,

³⁴Zanoa, En-ganim, Tapúa, Enam,

³⁵Jarmut, Adulam, Soco, Azeca,

³⁶Saaraim, Aditaim, Gedera, Gederotaim, kajlaj taqe chi tinamit chu'nchel, haa' taqe kok' ye'aab' wilkeeb' wii' patineel.

³⁷Zenán, Hadasa, Migdal-gad,

³⁸Dileán, Mizpa, Jocteel,

³⁹Loquis, Boscat, Eglón,

⁴⁰Cabón, Lohmam, Quitlis,

⁴¹Gederot, Bet-dagón, Naama, Maceda, waqlaj taqe chi tinamit chu'nchel, haa' taqe i kok' ye'aab' wilkeeb' wii' patineel.

⁴²Re' re' taqe i tinamit Libna, Eter, Asán,

⁴³Jifta, Asena, Nezib.

⁴⁴Keila, Aczib, Maresá, b'elejeeb' taqe chi tinamit chu'nchel, haa' taqe i kok' ye'aab' wilkeeb' wii' patineel.

⁴⁵Eh haa' i tinamit Ecrón, haa' taqe i kok' tinamit, haa' taqe i kok' ye'aab' wilkeeb' wii' patineel.

⁴⁶Ar intohq'ik cho Ecrón imponik ko chi chii' i palaw Mediterráneo, eh haa' chu'nchel i tinamit wilik chuka'jaah i tinamit Asdod, haa' i kok' ye'aab' wilkeeb' wii' i patineel.

⁴⁷Eh haa' tinamit Asdod, i kok' tinamit, haa' i kok' ye'aab' wilkeeb' wii' i patineel, haa' i tinamit Gaza, haa' taqe kok' tinamit i kok' ye'aab' wilkeeb' wii' i patineel. Eh xponik chi chii' i nim ha' inchalik Egipto, xponik chi chii' i nimlaj palaw.

⁴⁸Eh chupaam i raxchee' re' taqe i aj Judá xkehchaaj taqe i tinamit je' wili kib'ihnaal: Samir, Jatir, Soco.

⁴⁹Dana, Quiriat-sana, Debir wo' chik i rub'ihnaal inkiq'or.

⁵⁰Re' Anab, re' Estemoa, re' Anim.

⁵¹Gosén, Holón, Gilo, junlaj chi tinamit chu'nchel, haa' taqe i kok' ye'aab' wilkeeb' wii' i patineel.

⁵²Re' taqe haa' i tinamit Arab, Duma, Esán,

⁵³Janum, Bet-tapúa, Afeca,

⁵⁴Humta, Quiriat-arba, Hebrón wo' chik i b'ih inkiq'or, Sior, b'elejeeb' chi tinamit, haa' taqe kok' ye'aab' wilkeeb' wii' patineel.

⁵⁵Eh haa' wo' taqe i tinamit je' wili kib'ihnaal: Maón, Carmel, Zif, Juta,

⁵⁶Jerzeel, Jocdeam, Zanoa,

⁵⁷Caín, Gabaa, Timna, lajeeb' taqe chi tinamit, haa' taqe kok' ye'aab' wilkeeb' wii' i patineel.

⁵⁸Eh haa' taqe i tinamit je' wili i kib'ihnaal: Halhul, Bet-sur, Gedor,

⁵⁹Maarat, Bet-anot, Eltecón, waqiib' taqe chi tinamit, haa' taqe i kok' ye'aab' wilkeeb' wii' i patineel.

⁶⁰Re' wo' haa' taqe tinamit je' wili kib'ihnaal: Quiriat-baal, Quiriat-jearim wo' inkiq'or reh, Rabá, re' haa' taqe i kok' ye'aab' wilkeeb' wii' patineel.

⁶¹Eh chupaam i ye'aab' chiq yuuq' xkehchaaj taqe i tinamit je' wili kib'ihnaal: Bet-arabá, Midín, Secaca,

⁶²Nibsán, re' tinamit i nelik wii' i aatz'aam, En-gadi, waqiib' taqe chi tinamit, haa' taqe i kok' ye'aab' wilkeeb' wii' patineel. Re' i xkehchaaj i riih rumaam i Judá.

⁶³Eh re' keh ma' xkian ta reje kehteesjiik taqe i aj jebuseo wilkeeb' ar Jerusaleem. Je' re' noq re' taqe i aj jebuseo ar Jerusaleem xi kahnik chi jumpech chi kixilak i riih rumaam i Judá.