Read Poqomchi Jos 17 Bible Online

Jos 17 - Poqomchi bible

Jos 17

¹Noq xsik'ooj chik chi riij, re' ye'aab' wili xkehchaaj i junch'uq chi i riih rumaam Manasés, re' peet rak'uun i José. Eh Maquir i peet rak'uun i Manasés rajaaw i Galaad. Re' taqe riih rumaam i Maquir kow kiib' chi q'aq'inik ruum aj re' xkichop naah i ye'aab' Galaad, i ye'aab' Basán.

²Eh re' i ye'aab' wili xkik'ul chu'nchel riih rumaam i Manasés junch'uq. Re' taqe wili i xik'ulwik reh i ye'aab' wilik chi juntar i nim ha' Jordán: Re' taqe i riih rumaam i Abiezer, taqe riih rumaam i Helec, taqe i riih rumaam i Asriel, taqe riih rumaam i Siquem, taqe i riih rumaam i Hefer, taqe riih rumaam i Semida. Eh xikin riih taqe i José.

³Re' Manasés rajaaw i Maquir, eh re' Maquir rajaaw i Galaad, eh re' Galaad rajaaw i Hefer. Eh re' i Hefer rajaaw i Zelofehad. Eh re' Zelofehad ma' xwihik ta jino'q rak'uun, xarixq'uun i xwihik ho'oob' chi kiib' je' wili i kib'ihnaal: Maala, Noa, Hogla, Milcá, Tirsa.

⁴Re' taqe ixoq re' re' xiooj ruuk' i Eliazar k'amal b'eeh aj tiij, ruuk' i Josué rak'uun i Nun, kuuk' taqe i k'amal kib'eeh i aj Israel, je' wili i xkiq'or: Re' QaJaaw Dios ruq'orom reh i Moisés chi naa wo' taq aye'em qaye'aab' i hoj je' rukab' i xkik'ul i ma' tokoom ta quuk', inki taqe. Eh re' Josué xuyeew wo' kiye'aab' je' rukab' i xkik'ul i ma' tokoom ta kuuk', je' rukab' i ruq'orom i QaJaaw Dios.

⁵Je' aj re' noq re' taqe i riih rumaam Manasés lajeeb' seht chik i naah i kiye'aab' xkik'ul chuwach i xkik'ul Galaad, ruch'ihil i Basán, re' wilik chi juntar i nim ha' Jordán.

⁶Ruum re' taqe i rixq'uun i Zelofehad riih rumaam i Manasés ye'arik wo' kiye'aab' chi kixilak taqe i riih rumaam winaq. Eh re' ye'aab' Galaad xye'arik keh i junch'uq chik chi riih rumaam i Manasés.

⁷Re' kiye'aab' xkik'ul i riih rumaam i Manasés ar xtohq'ik chaloq chupaam i ye'aab' Aser, eh xponik ko chupaam i ye'aab' Micmetat. Re' i ye'aab' wilik chuk'ul wach i ye'aab' Siquem, eh xooj k'oloq chupaam i ye'aab' Tapúa.

⁸Eh re' taqe i ye'aab' ar Tapúa xkahnik chi keh i riih rumaam i Manasés, xa re' la' re' ye'aab' Tapúa wilik pank'ula't i ye'aab' re' re' xkahnik keh i riih rumaam i Efraín.

⁹Eh wilik wo' i ye'aab' xkahnik keh i riih rumaam i Efraín re' ruuk' i kiye'aab' i riih rumaam i Manasés. Re' kiye'aab' i keh, ar xtohq'ik chi chii' i nim ha' Caná. Ar xelik chaloq pansak'aaj reh i rookb'aal q'iij xponik pank'ula't pantz'eet reh i rookb'aal q'iij, xponik inokik wii' i nim ha' chupaam i palaw Mediterráneo.

¹⁰Eh re' i kiye'aab' i riih rumaam i Efraín, ar wilik pansak'aaj reh i rookb'aal q'iij, eh re' kiye'aab' i riih rumaam i Manasés ar wilik pantz'eet reh i rookb'aal q'iij, eh re' i palaw inq'atwik paam. Eh pantz'eet reh i rookb'aal q'iij i ruk'ula'teej i kiye'aab' i Aser, eh parelb'aal reje q'iij i ruk'ula'teej i kiye'aab' i Isacar.

¹¹Eh wilik wo' hoq i tinamit xkik'ul i riih rumaam i Manasés, wilik pankiyuq'ul i Isacar, i Aser je' wili i kib'ihnaal: Bet-seán, Ibleam, Dor, Endor, ruch'ihil taqe i kok' ye'aab' wilkeeb' wii' i patineel kichopom naah. Eh je' wo' hoq i tinamit Maguidor, ruch'ihil ixib' chi tinamit wilkeeb' chinaah i rub'ohl i yuuq'.

¹²Eh re' taqe i riih rumaam i Manasés ma' xkian ta reje rehtesjiik chupaam i tinamit re' re' taqe i aj cananeo, ruum re' taqe i aj cananeo ma' xkaaj ta elik ar, je' re' noq xi kahnik chi wihik chi kixilak.

¹³Eh noq xikowjik i aj Israel i xkiq'or reh taqe i aj cananeo chi naa kianam i tooj, eh xama' xkesaj ta wo' taqe reje ar.

¹⁴Eh re' taqe i riih rumaam José je' wili i xkiq'or reh i Josué: ¿Chib'ih reet noq xa re' i qaye'aab' wili xayeew? Re' hoj k'ahchi' wo' cho kooj rukuxisam QaJaaw Dios ruum i re' hoj k'ih chiqiib', inki taqe.

¹⁵Re' Josué je' wili i xuq'or: Ruum chi k'ih taq chawiib' i hat ma' ti ruk'am ta taq chik i naah taqe yuuq' wilkeeb' wii' taqe i riih rumaam i Efraín. Eh neerub'an chi nee taq tiooj chupaam taqe i ye'aab' nimaq ch'ahn wach kore' taq i hat neenaqasaj wach, chupaam i kiye'aab' i aj eferezeo, i kiye'aab' i aj refaita, inki.

¹⁶Re' taqe i riih rumaam José je' wili i xkiq'or: Korik noq ma' nee ta manlojik qeh i yuuq' re' re'. Eh re' taqe i aj cananeo wilkeeb' ar je' wo' taqe i wilkeeb' chupaam i ye'aab' wach k'ixkaab' wilik kich'ihch' kareta. Eh je' wo' taqe i wilkeeb' Bet-seán, eh i kok' ye'aab' wilkeeb' wii' i patineel, je' wo' taqe i wilkeeb' wach k'ixkaab' Jezreel, inki taqe.

¹⁷Eh re' Josué je' wili i xuq'or keh i riih rumaam i Efraín, i riih rumaam i Manasés: Re' chi re' taq i hat xiik' taq naah ak'ihaal, ruum i re' q'e' taq kow awiib': Ruum aj re' i ruk'ul chi naa taq awehchaam i ye'aab' xnuq'or taq aweh.

¹⁸Re' taqe i yuuq' re' re' chee' wach naa taq awehchaam, eh kore' taq i hat naa aqasanik wach. Eh re' taqe i aj cananeo wilkeeb' ar korehtaal taq inawesaj reje, atoob' ta re' keh q'e' kow kiib', atoob' ta k'ih i kikareta wilik, inki.